Loading ...Avancojnë punimet përgjatë korridorit VIII .
Ministria e Infrastrukturës dhe Energjisë njofton të gjithë drejtuesit e mjeteve që është hapur për qarkullim një tjetër segment i rëndësishëm me gjatësi prej 7.5 kilometrash .
Ky segment do të jetë me dy korsi dhe nis nga fshati Labinot –Fushë deri 500 metra pas fshatit Mirakë . Hapja e këtij segmenti pritet të përmirësojë ndjeshëm qarkullimin, të rrisë sigurinë rrugore dhe të shkurtojë kohën e udhëtimit për qytetarët dhe bizneset që përdorin këtë aks çdo ditë për të lëvizur nga Tirana në drejtim të Juglindjes dhe anasjelltas.
Ky investim është pjesë e projektit për zgjerimin e rrugës Elbasan–Qafë Thanë, një nga akset më të rëndësishme të infrastrukturës rrugore në vend dhe pjesë e Korridorit VIII, që lidh Shqipërinë me vendet e rajonit.
Me avancimin e punimeve, zgjerimi i plotë i këtij aksi synon të ofrojë standarde më të larta infrastrukturore dhe një lidhje më të shpejtë e më të sigurt mes Elbasanit, Qafë Thanës dhe më tej me Korridorin VIII.
Korridori VIII ka rëndësi strategjike për transportin e pasagjerëve dhe mallrave, pasi krijon një lidhje lindje–perëndim në Ballkan dhe lehtësi për shkëmbimet tregtare mes rajonit.
