Në seancën plenare të kësaj të enjteje deputetët e opozitës kanë kërkuar interpelancë urgjente me ministrin e Brendshëm, Sandër Lleshaj në lidhje me grabitjen në Rinas. Gjatë fjalës së tij në foltoren e Kuvendit, Lleshaj tha se nuk kemi të bëjmë me cënim të sigurisë kombëtare.
Sipas tij, kjo ngjarje është një seri dështimesh e disa hallkash që janë përgjegjëse për sigurinë e aeroportit.
“Ngjarja është e rëndësishme sepse është e përsëritur dhe ngarkon me përgjegjësi shumëkënd. Kjo ngjarje ka marrë vëmendjen e duhur të Policisë së Shtetit, pavarësisht ngarkesave të shumta paralele që ka Policia e Shtetit për të menaxhuar situata të ndërlikuara që rrallë herë e kanë përqendruar fokusin e saj. Ka pasur një gatishmëri të madhe për të prodhuar skenarë apokaliptikë të ndërtuar me argumentit çfarë do kishte ndodhur.
Rëndësia e madhe e çdo diskutimi duhet të fokusohet në kuptimin e mirë ngjarjesh që është një episod e një serie ngjarjesh për të parandaluar në të ardhmen, për të nxjerrë përgjegjësitë personale dhe institucionale. Nuk është shkatërrim i sigurisë kombëtare të Shqipërisë. Siguria kombëtare e Shqipërisë nuk mund të cënohet nga 5 vetë”, tha ai.
Lleshaj tha se duhet përmendur fakti që siguria e aeroportit është transferuar në duar private. Gjithashtu Lleshaj theksoi se policia është njoftuar nga palë të treta, ndërsa operatori i sigurisë që funksion brenda aeroportit “Nënë Tereza” ka njoftuar me 5 minuta vonesë dhe nuk ka hapur portën për policinë.
“Është dëshmi e një seri dështimesh e disa hallkave që janë përgjegjësie për sigurinë e aeroporti. Përgjegjësia e sigurisë së aeroportit i është transferuar një operatori privat. Askush nuk e ka atakuar faktin bazë që çështja e rëndësishme e sigurisë së aeroportit të është transferuar në duar private.
Policia kishte marrë në rrugë të treta njoftimin për ngjarjen dhe cënimin e sigurisë. Në rrugë zyrtare salla ka njoftuar Komisariatin e Rinasit 6 minuta e 30 sekonda më vonë. Në të njëjtën kohë, TIA ka njoftuar Aviacionin Civil 30 minuta pasi ka ndodhur ngjarja. Kontraktori privat i sigurisë së aeroportit nuk ka lejuar FNSH të hyjë në aeroport për arsye se porta përkatëse nuk është hapur”, tha Lleshaj./abcnews.al
