Siguria e Rrjetit 5G në Ballkan dhe përballja me rrezikun e ndërhyrjes kineze dhe ruse në këtë treg, ishte tema e forumit të organizuar në ShBA, ku mori pjesë dhe zoti Fatmir Mediu, në cilësinë e bashkëkryetarit të këtij Forumi për Sigurinë. Ndërtimi me shpejtësi i rrjeteve 5 G nga Kina, tendenca për të dominuar në këtë treg, si dhe ndërhyrjet për të shpërndarë teknologjinë kineze edhe në vendet e Ballkanit, janë kthyer në një shqetësim për Shtetet e Bashkuara të Amerikës.
Përfaqësues të Kongresit Amerikan u shprehën gjatë këtij takimi se mundësia e aksesit nga ana e kinezevë në shkëmbimin e informacioneve, kryesisht ushtarake mes vendeve anëtarë të NATO-s, është një rrezik real për interesat e vendeve të Ballkanit.
Gjatë këtij takimi zoti Mediu, i cili edhe më herët është shprehur mbi këtë rrezik potencial, theksoi se Shqipëria është duke punuar në bashkërendim me aletatët e saj amerikanë, në forcimin e kapaciteteve dhe teknologjisë 5 G.
Shqipëria është vendi i tretë që po nënshkruan një marrëveshje bashkëpunimi me SHBA, bazuar mbi Protokollin e Pragës dhe besoj që është një lëvizje në drejtimin e duhur – u shpreh Mediu.
Dhe në këtë pikëpamje kompanitë mobile që operojnë në Shqipëri janë të lidhura në këtë pozicion, që ka të bëjë më sigurinë 5 G, shmangien e investimeve që cënojnë sigurinë dhe interesat tona kombëtare, sidomos patneritetin tonë në NATO” deklaroi Mediu gjatë fjalës së tij në këtë Forum Sigurie.
Mbi 1 miliard dollarë investime parashikon projektligji që kanë propozuar një grup senatorësh amerikanë në përshpejtimin e ndërtimit të rrjeteve 5 G dhe avancimin e kësaj teknologjie, në mënyrë që të përdoret në fushat më jetike të shoqërisë, në banka, spitale, hoteleri, telefona privatë, por edhe në shkëmbimin dhe mbrojtjen e informacioneve të klasifikuara./abcnews.al
