skandal

zvkryeministri-770x400.jpg
ad min19:00 | 18/05/2019

Një ditë pas skandalit të korrupsionit në të cilin u përfshi, zv/kancelari austriak Strahe ka dhënë dorëheqjen. Edhe pse gjatë deklaratës për media t’ia pretendoi se ishte viktimë e një sulmi politik

Zëvendës kancelari austriak Heinz Kristian Strahe, ka dhënë dorëheqjen një ditë pas publikimit të një filmimi sekret që e përfshinte atë në një skandal korrupsioni.

Sipas videos Strahe po diskutonte kontrata qeverie me një investitor rus në shkëmbim të mbështetjes financiare për fushatën elektorale. Ai gjithashtu tregon për ngritjen e një sistemi donacionesh jot ë ligjshëm për partinë e ekstremit të djathtë të cilën drejton: Partia e Lirisë.

Në konfirmimin për dorëheqjen e tij ai u shpreh se do të zëvendësohej nga ministri i Transportit. Ai theksoi se po largohej që të shmangte dëme të mëtejshme ndaj qeverisë duke pretenduar se kishte qenë një viktimë e shënjestruar e një sulmi politik. Ai tha se mënyrat e këtij sulmi ishin të paligjshme

Më parë kancelari austriak Sebastian Kurz i Partisë së Qendrës: partia e njerëzve, kishte ndërprerë çdo marrëdhënie pune me zëvendësin e tij

Filmimi u publikua të premten në një reportazh të përbashkët të “Der Shpigel” dhe të përditshmes Süddeutsche Zeitung.

Takimi është zhvilluar në Ibiza mes politikanit dhe mbesës joshëse të një oligarku rus. Kjo e fundit pranonte të investonte 250 milion euro për të blerë të përditshmen austriake “Kronen Zeitung”. Burimi i këtyre parave ishte i panjohur. Strahe i thotë se nëse ajo do të blinte gazetën dhe tre javë para zgjedhjeve rendit partinë e tij sit ë parën, atëherë më vonë të dy mund të flisnin për gjithçka.

Gruaja në të vërtetë ishte e infiltruar. Në shtatë orë takim ish zv/kancelari austriak dhe krahu i tij i djathtë Johan Gudens lavdërojnë sistemin e kryeministrit hungarez Viktor Orban, dhe kontrollin që ai i bën medias në vend./ABC News Albania 24/7

federata.png
ad min08:16 | 03/04/2019

Futbolli gjerman tronditet nga një skandal i madh financiar. Presidenti Grindel detyrohet të japë dorëheqjen pas akuzave për financime të padeklaruara

Ky njeri i fortë dha dorëheqjen pikërisht për diçka të tillë.

Helmut Kohli nuk u fal nga publiku gjerman pas skandalit të 2 milionë dojçmarkave me burim të padeklaruar, dhe kur babai i bashkimit të Gjermanisë u rrëzua, si mund të mbahej shefi i Federatës së Futbollit?

Rajnhard Grindel dha dorëheqjen pas akuzave nga mediat për financime të pajustifikuara për të.

Revista “Der Shpigel” shkruan se presidenti i DFB-së kishte marrë të ardhura prej 78 000 eurosh, të dhëna nga një kompani e lidhur me federatën, por që nuk ishte bërë publikisht e njohur.

Po ashtu, Grindel u akuzua se kishte marrë dhurata të shtrenjta, si një orë dorë që kushtonte 6 000 euro.

“Bild” u tall: Zyra ishte nja dy numra më e madhe seç duhej për Grinelin! Ish-presidenti sqaron dorëheqjen: Jam thellësisht i tronditur!

“Deili Meil” britanike komenton: Presidenti i Futbollit gjerman dorëhiqet pas 3 vitesh në detyrë, për shkak të pagesave të pajustifikuara!

Dorëheqja e Grindelit ishte një goditje e rëndë për imazhin e futbollit të Gjermanisë, dhe për vetë shtetin e madh europian, vetëm disa muaj pasi ai fitoi të drejtën për të organizuar Kampionatin Europian të vitit 2024.

Lajmet janë që presidenti i ri mund të jetë pikërisht ambasadori i nderit i Gjermanisë për Euro 2024-ën, ish-kapiteni i kombëtares, Filip Lahm.

Gjithsesi, Lahm është shprehur se nuk ka ndërmend të kandidojnë.

Grindel ishte presidenti i dytë radhazi, që largohet me turp, pasi paraardhësi i tij, Volfgang Nirsbah, dha dorëheqjen pas skandalit të pagesave të dyshimta të bëra në FIFA për të fituar të drejtën e organizimit të Kupës së Botës 2006.

Kjo tronditje mund të ndihet edhe në kombëtaren gjermane, e cila më në fund nisi ta merrte veten pas dështimit në Botëror, siç e tregoi me fitoren 3-2 në fushën e Holandës, në eliminatoret e Evropianit./abcnews.al

lulzim-basha123.jpg
ad min18:57 | 18/12/2018

PD paralajmëron publikimin e dokumenteve që tregojnë se sipas saj një tjetër aferë të qeverisë tek “Unaza e Re”.  Deklaratën e bëri kreu demokrat Lulzim Basha sot pasdite në krah të një grupi banorësh të kësaj zone.

“Nesër opozita, PD do të publikojë një pjesë tjetër po kaq të errët të kësaj afere korruptive. Jo vetëm që Edi Rama ka dashur të vjedhë dhe përpiqet të vjedhë këtu mbi 40 milionë euro në buxhetin e shtetit, por sëbashku me figurat e krimit të organizuar, mbi rrënojat e shtëpive që do të prishë do të ndërtojë pallate shumëkatëshe. Nesër para qytetarëve do të shpaloset me dokumente zyrtare se si Edi Rama dhe Erjon Veliaj ndryshuan planin urbanistik për t’i dhënë leje një krimineli të dënuar me 21 vjet burg për trafik droge, një personi që njihet si mik, bashkëpunëtor i kupolës socialiste Edmond Bego. Mosveprimi i Prokurorisë tregon jo thjesht kapjen e prokurorisë nga Edi Rama, fundin e drejtësisë në Shqipëri, tregon po kështu se Arta Marku dhe kupola e saj janë bashkëfajtorë dhe çdokush ka të drejtën që t’i pyesë dhe t’i akuzojë sot: a jeni dhe ju pjesë e pazarit të ndyrë të krimit të organizuar për të shkatërruar shtëpitë e shqiptarëve dhe për të pastruar paratë me shumëkatëshet që do të ndërtojë këtu eksponenti i krimit të organizuar”./abcnews.al

damian-gjiknuriio.jpg
ad min13:27 | 08/12/2018

Një ditë pas pezullimit të punës në lotin e parë të projektit të Unazës së Madhe të Tiranës nga ARRSH, ka reaguar edhe ministri i Infrastrukturës dhe Energjisë, Damian Gjiknuri.

Në një postim në rrjetet sociale, Gjiknuri thekson se autoritetet në qeverisjen e sotme po bëjnë detyrën. Ai theksoi se kompania e përfshirë në skandalin që u zbulua në media nuk ka marrë para nga buxheti i shtetit. Së shpejti do të vijë edhe verifikimi i autoriteteve amerikane dhe nëse konfirmon falsifikimin e dokumenteve, atëherë do të zgjidhet kontrata dhe rasti do të referohet në organet e drejtësisë.

Reagimi i plotë i ministrit Gjiknuri në Facebook:

Atyre që duan të bëjnë politikë me Unazën e Re dhe kujtojnë se gjetën shtegun e revolucionit, pasi u katandisën me 100 protestues profesionistë të Bashkisë Kamëz nga mbrapa, u them kaq:

Ndryshe nga ju që kur qeverisnit shisnit Shqipërinë me letra fallco, sot autoritetet e shtetit po bëjnë detyrën.

ARRSH ka pezulluar projektin për lotin nr.1.

Unë si ministër i jam drejtuar autoriteteve amerikane për verifikimin zyrtar të shqetësimit të bërë publik në media.

Kompania në fjalë nuk ka marrë asnjë qindarkë nga Buxheti i Shtetit dhe garancia e saj financiare do të sekuestrohet, në rast se dokumentet e paraqitura prej tyre në garë nuk janë autentike.

Në fillim-javën e ardhshme, presim përgjigjen e autoriteteve amerikane. Nëse përgjigja do të konfirmojë falsifikimin e dokumenteve nga kompania, atëherë padiskutim do të reagojmë menjëherë me zgjidhjen e njëanshme të kontratës dhe referimin e rastit pranë organeve të drejtësisë.

Ky është dallimi i madh mes nesh dhe jush. Ne nuk i fshihemi asnjë përgjegjësie shtetërore dhe as kemi gjë për të fshehur. E thënë ndryshe, shqetësimi juaj është si të shisni baltë për të mbuluar të kaluarën tuaj, ndërsa qëllimi ynë është si të hapim rrugët e zhvillimit të Shqipërisë që ju rrënuat./abcnews.al

giANN.png
ad min16:23 | 03/11/2018

Presidenti i FIFA-s, Infantino, ndodhet përpara një skandali të madh. Ai akuzohet se ndihmoi Manchester City-n dhe Paris Saint Germain që t’i shpëtonin dënimit për shkelje të rregullave financiare të UEFA-s.

Skandalet dhe shkeljet e ligjeve nuk janë ekskluzivitet shqiptar. U kuptua me Zep Blaterin, por ja që edhe presidenti pasardhës i FIFA-s nuk ndodhet në pozitë më të mirë. Xhani Infantino akuzohet se ka shkelur ligjet e vetë institucioneve të futbollit dhe kjo kur ishte sekretar i përgjithshëm i UEFA-s.

Revista gjermane “Der Shpigel” boton dokumente sipas të cilave, Infantino ndihmoi klube miliarderë si Manchester City e Paris SG që t’i shmangeshin dënimeve të rënda për shkelje të rregullave të Lojës së Ndershme Financiare. Hajdutët e informatikës, hakerat, kanë vjedhur dokumente sekrete nga UEFA, që tregojnë se presidenti i sotëm i FIFA-s pranoi të fshihte “mëkatet” e City-t e PSG-së, duke i ndihmuar që të dënoheshin lehtë.

Në sezonet 2011-12 dhe 2012-13, dy klubet patën humbje të përbashkëta prej gati 200 milionë eurosh, shumë më tepër se kufiri i lejuar. Infantino bëri bisedime me drejtuesit e tyre, Al Helaifin e Paris SG dhe Haldun Al Mubarakun e Sitit, pas kurrizit të inspektorëve të pavarur, duke bërë të mundur që ata të mos përjashtoheshin nga Championsi. Gjithçka përfundoi me një gjobë, edhe pse të lartë, prej dhjetëra milionë eurosh.

Titujt e “Der Shpigelit” ishin shumë domethënës”.

“Si paratë e naftës shtrembërojnë futbollin”!

Përshëndetje kapo! Shërbeju dhe sundo! Si presidenti i FIFA-s dështoi në pastrimin e futbollit!

Infantino iu përgjigj akuzave, duke thënë se ato vijnë nga kundërshtarë të tij që kanë humbur pushtetin.

“Gjithnjë është e vështirë të ndryshosh gjërat, – u shpreh ai, – FIFA po bën reforma të rëndësishme dhe e prisja që të hasja në rezistencën e atyre që nuk do të mund të përfitojnë më nga sistemi ku kanë bërë pjesë”.

Presidenti i FIFA-s nuk tregoi se cilët ishin kundërshtarët e tij, ndërsa nuk ka mundur të hedhë poshtë akuzat e bëra ndaj tij. Pritet që skandali të zgjerohet dhe nuk dihet fati i City-t dhe PSG-së, pra nëse ata do të dënohen, apo nëse do të jenë të detyruar të shesin disa nga yjet më të rëndësishëm për të rregulluar bilancet./abcnews.al

shkoder12.jpg
ad min12:11 | 21/09/2018

Gjykata e Shkodrës ka shtyrë seancën për njohjen me masën e sigurisë për të  arrestuarit e skandalit të ilaçeve. Pala mbrojtëse kërkoi kohë nga Gjykata dhe prokuroria për t’u njohur me akuzat.

Ky vendim unanim u mirëprit nga palët dhe seanca u la për të shtunën në mëngjes në orën 9.00. Të arrestuar janë mjekët Përparim Çela e Luan Dragusha dhe infermierin Renato Kepi.

Kurse në arrest shtëpie janë punonjësit Amanda Matlija, Juliana Zhuri e Albana Mehmetaj dhe farmacistja Karmen Kaculi. Kurse shpallur në kërkim mjekët Edi Smajli dhe Dhurata Uruçi.

Të gjithë akuzohen për shpërdorim detyre, pasi kanë porositur e prokuruar pas miratimit të Ministrisë së Shëndetësisë, ilace dhe materiale mjekësore për kabinetin e hemodinamikës, në një sasi jashtë çdo kriteri, apo kapaciteti të spitalit rajonal të Shkodrës.

Vlera e materialeve të porositura për vitin 2016-2017 shkon në shifrën mbi 570 milionë lekë. Një ditë më pas kolegët e tyre dolën në mbrojtje dhe i kërkuan prokurorisë të rishikojë akuzat./abcnews.al

KISHA-SKANDALI.mpg_snapshot_00.23-1280x695.jpg
ad min13:02 | 15/08/2018

Një kishë katolike në Pensilvani të Shteteve të Bashkuara të Amerikës është përfshirë nga skandali pasi është zbuluar se gjatë viteve 300 priftërinj të saj kanë abuzuar seksualisht me mijëra fëmijë.

Skandal i ri abuzimesh seksuale në kishën katolike amerikane. Gjykata e lartë e Pensilvanisë ka bërë publik raportin e jurisë së madhe ku listohen qindra fetarë të përfshirë në 70 vitet e fundit. Publikimi i këtij raporti është vonuar pasi disa priftërinj pretendonin se po i shkeleshin të drejtat kushtetuese. Por gjykatësit vendosën ta publikonin me të gjithë emrat dhe detajet e ngjarjeve.

Mund të jenë 300 priftërinj që janë identifikuar gjatë hetimeve. Shpërndarja e raportit i jep fund 18 muaj hetimeve të drejtuara nga prokurori i Përgjithshëm Xhosh Shapiro, në gjashtë prej tetë dioqezave dhe pason atë të një jurie tjetër të madhe që ka zbuluar abuzime dhe fshehjen e tyre në dy dioqezat e tjera.

Publikimi vjen pas dorëheqjes së kardinalit Teodor Mekerik, një figurë e rëndësishme e kishës amerikane, i akzuuar se ka abuzuar me të mitur por dhe me të rritur prej dekadash./abcnews.al

kockat.jpg
ad min15:05 | 06/05/2018

Në vendin ku një burrë u shkrumbua brenda makinës, ka ende mbetje kockash.  Gazetari i ABC News, i cili filmoi orëve të para të kësaj të diele tregon se mes blozës dalloi dhe copëza eshtrash të njeriut të djegur. Ekspertët duket se kanë realizuar një këqyrje të dobët të vendit të ngjarjes, i cili një ditë më pas duhet të ishte pastruar plotësisht.

Siç shikoni dhe nga pamjet, aty në Derven, ku të shtunën u gjet makina e djegur e brenda saj një burrë i karbonizuar, shumë detaje janë lënë pas. Makina është larguar nga policia dhe grupi hetimor po merret me identifikimin e viktimës. Paraprakisht dyshohet të jetë shtetasi Xhavit Osmanit nga Pestova e Vushtrrisë.

Zëdhënës i Policisë për rajonin e Mitrovicës, Avni Zahiti u ka thënë mediave vendase se më 4 Maj, familjarët e kanë raportuar si të zhdukur një person me identitetin e njejtë me trupin e pajetë që u gjend dje në Fushë-Krujë. Kurse burime të policisë shqiptare treguan se Xhavit Osmani, 60 vjeç, disa ditë më parë ka hyrë bashkë me mjetin e tij nga Morina.

Ka dyshime që burri mund të jetë ekzekutuar më parë dhe më pas makina bashkë me trupin e tij u dërguan në vendin ku dhe i është vënë flaka. Gjasat janë për një hakmarrje nga ish-miqtë e kosovarit në Fushë-Krujë.

Një zyrtar i policisë i tha ABC News, që vendasit e njihnin Osmanin si pronar të një lokali me muzikë, në të cilin punojnë dhe vajza nga zona, ku u gjet makina e djegur. Kështu të paktën e njohin kosovarin në Fushë Krujë. Megjithatë pritet ADN dhe ballafaqimi me familjarët për të saktësuar zyrtarisht nëse viktima është Xhavit Osmani, apo jo./abcnews.al

amber.png
ad min11:34 | 30/04/2018

Ministrja e Brendshme e Britanisë, Amber Rudd ka dhënë dorëheqjen. Vendimi i saj erdhi pas presionit të opozitës, pasi ajo ishte përfshirë në skandalin me kuotat e emigrantëve nga Karaibet, që dëboheshin nga Mbretëria e Bashkuar.

Prej ditësh në shënjestër, ministrja e Brendshme britanike, Amber Rudd, në fund është dorëzuar dhe ka dhënë dorëheqjen, në valën e zbulimeve për të drejtat e mohuara ndaj një gjenerate emigrantësh të ish-kolonive të Karaibeve. Ky vendim i saj është pranuar edhe nga kryeministrja Theresa May. Ngjarja me skandalin “Windrush”, prej mijëra emigrant të Karaibeve që kanë mbërritur në Mbretërinë e Bashkuar në vitet ‘70 – varka e parë e mbërritur në Londër ishte emërtuar “Windrush” – për të rindërtuar vendin pas Luftës së Dytë Botërore.

Këta emigrantë kishin përfituar të drejtën për të qëndruar në Britani për një kohë të pacaktuar. Disa prej tyre kanë dhe shtetësinë britanike pasi kanë lindur në periudhë koloniale. Por ata që nuk kanë kërkuar kurrë shtetësinë, e kanë parë veten të trajtohen si emigrantë të paligjshëm, dhe rrezikojnë dëbimin nëse nuk mbledhin prova për çdo vit qëndrimi në Mbretërinë e Bashkuar. Amber Rudd u përfshi në skandal pasi konfirmoi në sallë se nuk ishte në dijeni të kuotave të dëbimit të përvitshme të vendosura nga dikasteri i saj.

Më pas tentoi përgënjeshtrimin me anë të një shënimi. Por në atë pikë, ministrja ka kërkuar ndjesë publike, një shembull ky që u ndoq dhe nga kryeministrja May, përballë liderëve të 12 vendeve të mbledhur në Londër për një samit të Commonwealth.

Por e gjithë kjo nuk e zbuti protestën e opozitës Laburiste, e cila bëri thirrje për dorëheqjen e ministres së Brendshme. Qeveria konservatore vazhdoi ta mbrojë atë, duke pasur frikë, ndër të tjera, që të humbiste një tjetër ministër udhëheqës, si ish-sekretari i Mbrojtjes, Michael Fallon, i cili përfundoi në skandalin e ngacmimeve në Westminster. Me anë të këtij skandali, opozita kërkonte që të godiste drejtëpërdrejtë kryeministren May, por në fund ajo vendosi të pranonte dorëheqjen e Amber Rudd./abcnews.al

junichi-fukuda.jpg
ad min09:50 | 19/04/2018

Një zyrtar i rëndësishëm japonez dha dorëheqjen nga detyra pas akuzave për ngacmime seksuale ndaj disa gazetareve.
Junichi Fukuda i ka mohuar akuzat e raportuara nga revista “Shukan Shincho”, që gjithashtu thotë se ka prova kundër tij.
Sipas revistës, Fukuda, një nga drejtuesit më të rëndësishëm në Ministrinë e Financave, ka bërë komente seksuale drejt disa femrave gazetare.
Në materialin që u shfaq në fillim të javës tregohet edhe një klip audio, ku dëgjohej zëri i Fukudës duke thënë: “Mund të të përqafoj”? dhe “Mund të të prek gjoksin”?
Ndërkohë, një drejtues tjetër vendor në Japoni, u dorëhoq pak kohë më parë mbi akuzat se paguante femra për të pasur marrëdhënie.
Deri më tani, shoqëria konservative japoneze ka qenë e ngadaltë për t’iu bashkuar lëvizjes mbarëbotërore #MeToo.
Nxitur nga skandali i Harvey Weinstein në Hollywood, lëvizja #MeToo, kundër ngacmimeve seksuale, filloi të përhapet në shumë vende të ndryshme të botës./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono