New york

scccc.jpg
Sid Orela20:17 | 30/03/2020

Epidemia e koronavirusit në Itali dhe Nju Jork më në fund po ngadalësohet. Kështu ka deklaruar një shkencëtar, fitues i çmimit Nobel, nga Universiteti i Stanford-it.

Profesori Michael Levitt, i cili parashikoi me saktësi sesa raste të konfirmuara dhe vdekje do të kishte në Kinë, është shprehur se Italia dhe Nju Jorku janë tashmë drejt “shërimit”. Si Italia ashtu edhe Nju Jorku mbeten dy vendet më të prekura nga Covid-19 në botë, me 157,000 raste të kombinuara nga 736,000 që janë globalisht, shkruan abcnews.al

Italia u bë epiqendra e krizës në botë pasi Kina filloi që ta kishte situatën nën kontroll, por SHBA-të, me një popullsi pesë herë më të madhe, u radhitën shpejt në vendin e parë në botë. Sa i përket SHBA-ve, Nju Jorku mbetet shteti më i prekur me 66,497 raste të konfirmuar dhe 1,218 viktima.

Profesori Levitt u shpreh se Italia tashmë ka nisur që ta kthejë faqen dhe numri i rasteve ditore duket se mbështet pretendimin e tij.

Situata e Nju Jorkut është më pak e sigurt, numri i rasteve të reja ka rënë në tre ditët e fundit në pak më shumë se 7,000 persona në ditë. Por, rritja ishte shumë e madhe ditë më parë. Kjo javë do të jetë vendimtare për të parë nëse kurba e epidemisë do të nisë rënien apo jo. /abcnews.al/

82b459a3-6174-465b-a015-5c52cd90ce11.jpg
So Nila15:35 | 30/03/2020

Spitali Mount Sinai në New York po punon me një organizatë humanitare  për të ngritur një spital  në Central Park për të ndihmuar në fluksin e vazhdueshëm të pacientëve gjatë pandemisë koronavirus.

Tendat në Central Park pritet të kenë 70 shtretër të rregullt dhe 10 shtretër të kujdesit intensiv dhe do të hapet të martën, tha një zëdhënës i spitalit.

Spitali do të ndërtohet në partneritet me Samaritan’s Purse, një organizatë ungjillore e ndihmës së krishterë.

Punonjësit e kujdesit shëndetësor në të gjithë SHBA janë duke u përgatitur për fluksin e pacientëve dhe janë duke bërë thirrje për mungesën e pajisjeve mbrojtëse dhe respiratorëve të nevojshëm për të trajtuar nurmin e lartë të rasteve.

Në një konferencë shtypi të dielën, Guvernatori Andrew Cuomo tha se ai pret që të ketë një numër të lartë vdekjesh nga virusi në shtetin e Nju Jorkut. Deri më tani, 59.513 njerëz kanë testuar pozitiv për COVID-19, sëmundja e shkaktuar nga koronavirusi dhe 965 kanë vdekur.

Një spital tjetër në terren ka qenë gjithashtu në ndërtim e sipër nga Korpusi i Inxhinierëve të Ushtrisë amerikane në Qendrën e Kongresit Javits të qytetit. Spitali i përkohshëm pritet të hapet të hënën me gati 3,000 shtretër, dhe është planifikuar që të trajtohen pacientët që nuk kanë COVID-19./abcnews.al

 

Shqiptari.jpg
Veronik Istrefaj15:18 | 29/03/2020

Koronavirus ka marrë një tjetër jetë sot. Në Amerikë, saktësisht në New York, shqiptaro-amerikani, Andre Ljujovic, është ndarë nga jeta, për shkak të këtij virusi famëkeq.

Lajmi është raportuar nga gazeta Illyria në Amerikë, një lajm shumë i trishtë. Ljujovic ishte futbollist për ekipin e shkollës së tij (Futboll Amerikan, aktivizohej për Cruisaders), ndërsa më herët, në muajin tetor, sapo ishte martuar me Janet Gazivoda.

Prindërit e Ljujovic kishin emigruar herët në Shtetet e Bashkuara të Amerikës dhe vetë djaloshi shqiptar, ka lindur përtej oqeanit./abcnews.al

 

Andre Ljuljovic me fanellën e Cruisaders
merlin_170596812_92d31e40-0875-46db-b2ee-94f798ae654c-mobileMasterAt3x-1280x853.jpg
So Nila15:15 | 27/03/2020

Në New York ka nisur marrja e masave drastike për përballimin e të sëmurëve me COVID-19, teksa spitalet po përballen me një krizë të vërtetë prej pamjaftueshmërisë së pajisjeve të nevojshme.

“The New York Times” bën të ditur se në spitalin New York-Presbyterian ka nisur aplikimi i metodës së trajtimit të dy pacientëve me një ventilator të vetëm.

Sipas tyre, kjo metodë është përdorur vetëm dy herë të tjera: Në masakrën e armatosur në Las Vegas në 2017-ën dhe pak ditë më parë në Itali, e aplikuar nga mjeku Marco Garrone.

Kjo metodë e rrezikshme por e domosdoshme në situatën “jetë a vdekje”, realizohet duke lidhur në një pajisje ventilimi, dy tuba nëpërmjet një pjese të veçantë.

Situata në New York është përkeqësuar thellësisht në vetëm pak ditë duke e çuar numrin e të prekurve në më shumë se 37 mijë, ndërkohë që guvernatori Andrew Cuomo ka bërë të ditur se u duhen 30 mijë ventilatorë, ndërsa në gjendje kanë vetëm 11 mijë të tillë./abcnews.al

LCMJ65FWDREIPJK2PWP33NJ2LY.jpg
So Nila14:20 | 23/03/2020

Komisioneri i Policisë së Nju Jorkut, Dermot Shea, tha të dielën se 98 pjesëtarë të policisë lokale kanë dalë pozitivë në testet për koronavirus.

Duke folur në një konferencë të përbashkët për gazetarë me kryetarin e Nju Jorkut, Bill de Blasio, Shea tha se 70 nga të infektuarit janë oficerë në uniformë, kurse 28 të tjerë janë pjesë e stafit civil, shkruan “Anadolu”.

“Sa i përket testimit, numrat janë duke u rritur, sepse testimet janë duke u shtuar në tërë qytetin. Prandaj, kjo nuk është e papritur”, tha ai.

Shea shtoi se policia nuk i ka përcjellë personat me të cilët policët e infektuar kanë pasur kontakte gjatë punës. “Jemi në një realitet të ri dhe kjo gjë nuk është diçka që mund të bëhet”, tha de Blasio.

Rreth 33 mijë persona janë infektuar dhe mbi 400 kanë vdekur nga koronavirusi në Shtetet e Bashkuara. 114 viktima janë shënuar vetëm në Nju Jork.

Shtëpia e Bardhë është duke zhvilluar negociata urgjente me anëtarët e Senatit për miratimin e një pakoje të madhe ekonomike prej 1 trilion dollarëve për luftën kundër efekteve të koronavirusit./abcnews.al

26229860-8137097-President_Trump_pictured_Friday_declared_New_York_a_major_disast-a-165_1584767966908.jpg
So Nila11:51 | 21/03/2020

Donald Trump e ka shpallur New York-un një zonë të rrezikshmërisë së lartë, teksa numri i rasteve me koronavirus rritet dhe ai bëhet epiqendra e shpërthimit në Shtetet e Bashkuara.

Ushtria amerikane do të jetë gati për ndihmë dhe trupat amerikane ushtarake të inxhinierëve kanë thënë se planifikojnë të shndërrojnë hotele, zona sportive, konvikte dhe ndërtesa të tjera në dhoma spitali.

Kryebashkiaku i New York, Bill de Blasio, nxiti Trump të dërgojë ushtrinë dhe mbështetje logjistike për fuqizuar vendet e goditura ashpër si New York, Kaliforni dhe Seattle.

Deklarata e presidentit vjen pasi një spital në Bronks tha se nuk kishte mjaftueshëm pajisje oksigjeni.

Ditën e djeshme pacientët u panë teksa prisnin në rradhë shumë të gjata për tu testuar pranë spitalit Queens’ Elmhurst Hospital.

New York ka numrin më të madh të rasteve të konfirmuara me COVID-19, me 8403 të infektuar dhe  46 vdekje./abcnews.al

PRI_145044015.jpg
Sid Orela22:57 | 04/03/2020

Të paktën 1000 persona që mund të kenë rënë në kontakt me një avokat në Nju Jork janë urdhëruar që të vetë-izolohen. Sipas raportimeve avokati në fjalë ka infektuar bashkëshorten, dy fëmijët dhe një fqinj.

Në total, në SHBA rezultojnë 137 raste të konfirmuara me COVID-19 ndërsa numri i personave që kanë humbur jetën është nëntë.

Avokati 50-vjeçar, i cili jeton në Westchester dhe i duhet të udhëtojë deri në Manhattan ku ka firmën ligjore, u konfirmua si rasti i dytë ditën e martë. Nga ana tjetër Kalifornia regjistroi vdekjen e parë të mërkurën pasi një pacient me probleme të tjera shëndetësore nuk mundi ta fitonte betejen për jetën.

Autoritetet e Shëndetit në Los Angeles, ku banojnë rreth 10 milionë persona, kanë shpallur emergjencën shëndetësore pasi u zbuluan 6 raste të reja në më pak se 48 orë.

Edhe rastet e Nju Jorkut u rritën në gjashtë të mërkurën pasi familja e avokatit rezultoi të ishte pozitive me koronavirusin.

Në të gjithë botën raportohet të jenë 95,040 raste të konfirmuara me koronavirusin nga të cilët 3,249 kanë humbur jetën dhe 51,433 të tjerë janë shëruar plotësisht./abcnews.al/

lake-erie-hoover-beach-ice-today-main-200302_b9f9db54ee8e1cdaec73cd2d1e978bcf.fit-2000w-1280x640.jpg
So Nila09:20 | 03/03/2020

Personat që jetojnë përgjatë bregut të Liqenit Erie në New York u zgjuan këtë fundjavë nën një makth dimri, pasi shtëpitë e tyre ishin plotësisht në akull.

Sipas Today, Ed Mis ka jetuar në shtëpinë e tij në Hamburg, për tetë vitet e fundit dhe është shprehur se vendi mbulohet nga dëbora, por nuk kishte ndodhur si kësaj rradhe.

“Duket çdo gjë  joreale, është kaq errësi brenda shtëpisë sime. Mund të duket edhe pak e frikshme”, u shpreh Mis.

Shtëpia e tij rreth 9 milje në jug të Buffalos është e mbuluar me disa metra akull dhe oborri i tij i shtëpisë ka rreth 4 metër trashësi akulli.

Ai shtoi se të enjten nuk kishte akull në oborrin apo shtëpinë e tij,  por deri të premten në mëngjes shtëpia e tij dhe të tjerat ishin mbuluar plotësisht.

Akulli i bën shtëpitë të duken sikur janë skulptura si në filmin “Frozen”.

Ndërsa pamja është padyshim surreale dhe e jashtëzakonshme, banorët janë të shqetësuar se mund të shkaktojë dëme strukturore në shtëpitë e tyre.

“Ne jemi të shqetësuar për integritetin, për dështimin e strukturës kur ajo fillon të shkrihet, për shkak të peshës në çati”, tha Mis.

Erërat krijuan valë të mëdha, duke çuar ujin e liqenit lart në breg, sipas “Weather Channel”.

Akulli ka filluar të shkrihet pak që nga e premtja, por ai shpreson që guvernatori do të aprovojë një deklaratë emergjente për të ndihmuar lagjen të rikuperohet.

“Është një pamje e bukur, por nuk dua të jetoj përsëri  kështu”, u shpreh Mis./abcnews.al

 

 

 

 

 

 

 

00WEINSTEINTIMELINE1-mediumSquareAt3X-1280x1280.jpg
R D23:58 | 24/02/2020

Producenti kinematografik amerikan Harvey Weinstein është cilësuar fajtor për agresione seksuale dhe përdhunime. Verdikti i Gjykatës së Nju Jorkut erdhi pas tre javësh dëshmish intensive, ku akuzueset e kanë denoncuar Weinstein për abuzim seksual dhe përdhunim ndaj tyre.

Trupit gjykues i janë dashur 5 ditë për të marrë këtë vendim.

Producenti i njohur rrezikon nga 5-25 vjet heqje lirie për akuzat: Akt seksual kriminal i gradës së parë dhe përdhunim të gradës së tretë. Nga tre verdiktet që u dhanë nga gjyqtarët, dy i përkisnin akuzës më të rëndë, agresionit seksual, akuzë kjo e cila mund të sillte për producentin dënimin me burgim të përjetshëm.

Gjashtë gra kanë dëshmuar kundër 67-vjecarit në procesin e New York-ut, por akuza ishte ndërtuar vetëm mbi dëshmitë e dy prej tyre, ish asistetja e Weinstein “Miriam Hailey” dhe aspiruesja për aktore “Jessica Mann”.

4 gratë e tjera kanë shërbyer si mbështetëse dhe konfirmuese të dëshmive të Hailey dhe Mann.

Weinstein do të përballet me akuzën për ngacmime seksuale dhe për përdhunime edhe në një gjykatë të Los Angeles. Në total, 80 gra e kanë akuzuar Weinstein për abuzime seksuale në periudha të ndryshme kohore. /abcnews.al

marko-kepi-endri-xhafo.jpg
nev ila19:24 | 18/02/2020

I ftuar në ABC News, në studio me gazetarin Endri Xhafo, Marko Kepi tha se është duke u punuar për ndërtimin e shtëpive që janë shkatërruar në zonën e Krujës dhe Shijakut. Tashmë “Rrënjët Shqiptare” kanë arritur të ndërtojnë 4 shtëpi.

Përballë gazetarit Xhafo, Marko Kepi dha mendimin e tij për donacionin e qeverisë amerikane ndaj qeverisë shqiptare për tërmetin, ku sipas tij kjo varet nga besimi që ata kanë në qeverinë shqiptare.

Kepi tha se e mendonte kështu duke u nisur edhe nga një takim që kishte zhvilluar në ambasadën amerikane në Shqipëri ku kishte marrë si këshillë që fondet që kishin mbledhur ti menaxhonin vetë dhe jo duke i kaluar nga qeveria.

Marko Kepi gjithashtu foli edhe për angazhimin e tij në shoqatën “Rrënjë shqiptare”. Gjatë bisedës në studio Kepi tha se Shqipëria është i vetmi shtet që nuk i përgjigjet kërkesave të shoqatave të shqiptarëve në Amerikë. Ai tha se shteti shqiptar asnjëherë nuk i ka ndihmuar ndërsa shteti i Kosovës kontribuon.

Pjesë nga biseda në studio:

Endri Xhafo: Në lidhje me angazhimin tuaj me “Albanian Roots”, cilat janë aktivitetet kryesore të kësaj shoqate, që me sa kuptoj do të mbajë gjallë lidhjet e shqiptarëve të Amerikës me Shqipërinë dhe me trojet ku ka shqiptarë.

Marko Kepi: Organizatën e kemi filluar në Universitet, me një grup shqiptarësh, ato pak shqiptarë që ishim në Universitet donim që të lidheshim bashkë e mos të humbnim origjinën tonë. Qëllimi ishte që përveç klubit që hapën të cilin e quajtëm klubi i shqiptarëve, pasi të kryenim shkollën, si shoqëri ta zmadhonim sa më shumë komunitetin shqiptar.

Endri Xhafo: Jeni prej 10 vitesh organizator i paradës së shqiptarëve që dalin në rrugët e New Yorkut si ju lindi ideja për ta organizuar këtë?

Marko Kepi: Ideja u lindi disa studentëve që ishin në shkollën ku dhe unë mësoja, por unë merresha me politikë që 17 vjec, ata erdhën tek unë dhe më thanë se Irlandezët kanë paradën e vet, Italianët kanë paradën e vet, na ndihmon që edhe ne shqiptarët të bëjmë një paradë. Meqë njihja shumë politikanë ata erdhën dhe kërkuan ndihmë për këtë, pasi parada kushton dhe kërkon disa angazhime të tjera për tu organizuar.

Endri Xhafo: Parada bëhet me rastin e festave të nëntorit?

Marko Kepi: JO, parada emrin e ka “Parada e emigrantëve” dhe aty marrin pjesë 55 shtete të tjera ku vendi ynë është më i vogli. Gjithë shtetet e tjera që të marrin pjesë aty japin fondet e tyre, Shteti i Rumanisë u jepte fonde shoqatave të tyre që të bëheshin pjesë e paradave, kurse ne shqiptarët ishim thjesht vullnetarë.

Endri Xhafo: Dmth shtete të ndryshme e shohin si moment PR këtë, marrëdhënie me publikun?

Marko Kepi: Po , sepse është një vend ku mund të ekspozosh turizmin e vendit tënd, është një vend që merr përmasa mediatike në mes të New Yorkut, ku mund të shihet nga gjithë ajo popullsi aty.

Endri Xhafo: Po ju keni marrë ndihmë nga shteti shqiptar?

Marko Kepi: Asnjëherë, i kemi bërë kërkesa shumë herë dhe asnjëherë nuk kanë marrë pjesë. Shteti i Kosovës merr pjesë kurse shteti shqiptar asnjëherë. Ne punojmë vullnetarisht dhe mundohemi të reklamojmë sa më shumë Shqipërinë.

Endri Xhafo: Ju jeni pjesë e trupave të marinës, nga ju lindi dëshira ?

Marko Kepi: Për herë të parë i kam parë në Shkodër gjatë luftës së Kosovës. Aty pashë trupa nga shumë shtete dhe kur pashë trupat amerikane më dhanë një përshtypje që ishin shumë ndryshe nga të tjerët. Mu dukën më të fortë. Në Shkodër nuk kisha shanse por kur familja emigroi në Amerikë mu dha shansi ta provoja nëse mund të kualifikohesha, dhe ja arrita më në fund./abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono