mustafa nano

nano-monologu.jpg
ger ta12:07 | 11/01/2020

Mustafa Nano në monologun e tij në “Provokacija” është ndalur te çështja e dëbimit të nësuesit turk, Harun Çelik nga Shqipëria.

Mes të tjerash, Nano zbulon sipas tij Çelik u dëbua nga vendi  sepse kryeministri Rama nuk ka fuqi “t’ia prishë Erdoganit”.

Teksa e quan poshtërsi, Nano i kërkon mësuesit turk falje publike në emër edhe atë atyre që mendojnë si ai.

Monologu i plotë nga Mustafa Nano:

Në datën 1 janar, një shtetas turk me emrin Harun Çelik, i hipi një avioni të linjës Air Albania, dhe u kthye në vendin e tij, në Turqi. Por nuk u kthye si një udhëtar i zakonshëm. Nuk u kthye as me dëshirën e tij. Përkundrazi, u kthye pa dëshirën e tij. Dhe u kthye në pranga. Ishin autoritetet shqiptare që ua dorëzuan atyre turke. Ndonëse ai iu tha: “Ju lutem, mos më çoni në Turqi, pasi unë jam gylenist, dhe si i tillë, jeta ime është në rrezik”,  autoritetet tona as që deshën t’ia dinin. Ato bënë çfarë iu kërkua nga Ankaraja. E bënë këtë me ngut, me zell, në shkelje të procedurave ligjore që ekzistojnë në Shqipëri.

Ai iu dorëzua autoriteteve turke në Rinas vetëm disa orë pas marrjes së vendimit për largimin e tij. Vetëm disa orë, në një kohë që duheshin pritur disa ditë, në një kohë që duhej pritur ankimimi i tij ndaj këtij vendimi. Pse u veprua kështu? U veprua kështu, sepse kryeministri shqiptar nuk ka fuqi t’ia prishë Erdoganit. Nuk ka fuqi t’i thotë: “I dashur Rexhep, të kam xhan e të kam shpirt, dhe ti e di që nuk të gënjej kur them se të kam xhan e të kam shpirt, por këtë gjë mos ma kërko. Këtë gjë nuk ta bëj dot, pasi së pari kjo është një gjë që vendoset nga gjykatat tona, dhe së dyti unë nuk kam ndërmend të dal kundër qëndrimeve të SHBA-ve në këtë pikë, pasi SHBA-të janë aleati ynë i madh, pa kushte, për jetë. Edhe juve turqit jeni aleatët tanë, jeni shumë të rëndësishëm madje, por nuk jeni më të rëndësishëm sesa amerikanët.”

Kjo do të ishte alamet alibie për Ramën. Por ai nuk e shfrytëzoi këtë alibi. Sepse për të është më e rëndësishme t’i bëhet rrogoz Erdoganit.

Harun Çelik, me profesion mësues, është në Turqi tanimë. Askush nuk e di se çfarë do të ndodhë me të. Dhe mua më vjen që, në emër të të gjithë atyre shqiptarëve që këtë punë e shohin si unë, t’i kërkoj falje publikisht.

“Të kërkoj ndjesë i dashur Harun! Nuk është se më dhemb kauza jote. Madje, në do ta dish, as që më bëhet vonë për kauzën tënde. Jo për gjë, por nuk e kam të qartë deri në fund se çfarë jeni ju gylenistët e për çfarë luftoni e sakrifikoni. Por unë mendoj se shoqëria shqiptare, dhe sidomos shteti shqiptar, duhet të të merrte në mbrojtje, duhet të të jepte azilin politik. Sepse dikush mund të dorëzohet në duart e dikujt që thotë: ma jepni se dua ta gjykoj mbi bazën e provave që kam mbledhur, por nuk mund të dorëzohet në duart e dikujt që thotë: ma sillni këtu terroristin. Sepse kështu i bie që tjetrit i është dhënë dënimi pa u bërë gjyqi.

Edhe njëherë, të kërkoj ndjesë, i dashur Harun, për këtë poshtërsi të kryer nga autoritetet e shtetit tim!”/abcnews.al

dritan-shano-provokacija-1280x714.jpg
nev ila22:16 | 07/01/2020

Ekonomisti Dritan Shano ka qenë i ftuar mbrëmjen e sotme në Provokacija me Mustafa Nanon.

Dritan Shano ndau me publikun opinionet e tij në lidhje me atë çfarë po ndodh në arenën ndërkombëtare politike por edhe në vend. Si anëtar i Partisë Demokratike Shano tregoi se si dukeshin në këndvështrimin e tij liderët politikë të vendit.

Pjesë nga biseda në studion e Provokacija:

Dritan Shano: Sjellja e Ramës nuk ka lidhje me qeverisjen por me pushtetin. Bllokimi i mendjes së shqiptarit me imazhin e vet, me poturet e veta, me komunikimin e vet me specie jo njerëzore, e bën këtë që shqiptari mos të ketë kohë të mendojë po të merret vetëm me atë që ai servir. Ndoshta i është rritur popullariteti por kjo shkon në proporcion të drejtë me largimin e shqiptarëve nga vendi. Të dy këto gjëra janë të lidhura me njëra tjetrën. Ai ka këtë sjellje sepse ka PR kështu dhe se kështu është, pra janë të dyja të kombinuara.

Mustafa Nano: Për tu kthyer te diskutimi për Kodin Zgjedhor, prisja nga opozita që ti fokusonte energjitë e veta në këtë gjë, mirëpo nuk po e shoh këtë gjë, cfarë ndodh?

Dritan Shano: Mendoj që PD do duhet ti kishte bërë ato propozime. Por kjo vjen nga pozitat e një njeriu që guxon të mendojë me kokën e vet. Dritan Shano ka mandatuar Lulzim Bashën të merret me këtë punë. Si anëtar i këshillit kombëtar, si anëtar i Partisë demokratike kam hedhur votën që ta kem kryetar. Është detyra e kryetarit ta zgjidhë, të propozojë dhe të merret me këtë gjë, nuk dua të diskutoj për temporitmin që ai zgjedh pasi është strategji e tij kjo gjë, është risku i tij. Ai në një moment tjetër do të tentojë të rizgjidhet dhe nëse nuk më ka dhënë mua ato produkte që unë pres prej tij, njëri nga këto është propozimi për Kodin Zgjedhor, atëherë unë do të mendohem dy herë përpara se ti hedh votën nesër, çfarë vlere ka kjo për Bashën? Zero! Sepse mendoj që brenda partisë do të ketë njerëz të tjerë që nuk do i japin peshën që i jap unë kësaj çështjeje.

Mustafa Nano: Po nëse në 100 gjëra që Basha duhet të bëj, ai ka bërë vetëm 1, a ka mundësi që masa e madhe ta largojë nga drejtimi?

Dritan Shano: Unë mendoj që po, sepse të gjithë hedhin votën atje. Votën e lexojnë anëtarët e Partisë Demokratike dhe Partia Demokratike në këtë mes ka çfarë ti tregojë çdo force politike tjetër, sepse në ndryshonim nga të gjithë forcat e tjera politike, në PD zhvillohen zgjedhjet në mënyrë të rregullt. Në PS më kujtohet që që prej 2009 nuk ka më zgjedhje. Ajo që po ndodh në Shqipëri është që janë po të njëjtët njerëz prej 30 vjetësh, po të njëjtat fytyra. Problemi i Shqipërisë dhe mungesa e aktivizmit individual është pikërisht kjo gjë , që ne na është bërë normale tashmë që dikush na rri sipër kokës prej 10 apo 20 vjetëve. Këto gjëra nëpër botë nuk ndodhin, ne prodhojmë përsëri zota, të vegjël por përsëri zota. /abcnews.al

nano.jpg
ger ta21:09 | 07/01/2020

Mustafa Nano në monologun e tij për këtë javë në “Provokacija” është ndalur sërish te muzika e lehtë.

Sipas Nanos, ai por edhe gjenerata e tij e kanë të vështirë ta kuptojnë një këngë të muzikës së  lehtë shqiptare pa parë edhe tekstin.

Si ilustrim moderatori solli italianin Fabrizio de Andre dhe këngën e tij “Bocca di rosa”. Sipas Nanos tek kjo këngë del në pah vlera e veçantë e tekstit, dhe është leksion i mirë për shumë kantautorë shqiptarë.

Unë një këngë të muzikës së lehtë e kam të vështirë ta kuptoj pa tekstin, apo ta marr të shkëputur nga teksti. Kam përshtypjen se ka edhe shumë njerë të tjerë që ashtu si edhe unë një këngë të bukur të muzikës së lehtë nuk e kuptojnë dot pa një tekst të bukur. Ndoshta këta njerëz njësoj me mua janë pjesë të një gjenerate të caktuar dhe prandaj kanë këtë qasje. Por ndoshta kjo vjen edhe prej faktit që kanë qenë ndjekës të një tradite të huaj, ku teksti shenjëtrohet në mënyrë të veçantë.

Për ilustrim po marr emrin e një kantaautori italian Fabrizio de Andre dhe për ilustrim por marr një këngë të tij, “Bocca di rosa”. Është një nga këngët e bukura, ka një tekst të bukur. Me këte jam marrë në stand up-in tim të fundit.

Kush di italisht mund ta shijojë në mënyrë të plotë këtë këngë, ku del në pah vlera e veçantë që ka teksti në një këngë te muzikës së lehtë. Sipas meje ky është një leksion i mirë për shumë kantaautorë shqiptarë. Ky ishte monologu im për sonte”, shprehet Nano./abcnews.al

m-nano.jpg
ger ta07:06 | 28/12/2019

Situata politike në Kosovë, pasi vendi është ende pa një qeveri, ishte tema e monologut të Mustafa Nanos në “Provokacija”.

Nano është shprehur se lideri i LDK, Isa Mustafa duhet të japë dorëheqjen, pasi gjendja e tij fizike nuk është e mirë.

Mustafa e ka pranuar vetë një gjë të tillë publikisht, ndërsa  Nano u shpreh se këto ditë Mustafa është parë duke ecur me një patericë në dorë në rrugët e Prishtinës, në tentativë për të arritur marrëveshjen.

Teksa i ka uruar shërim të shpejtë, Nano ka theksuar se Mustafa duhet të japë dorëheqjen, pasi nuk është i pazëvendësueshëm.

Mesazhi i plotë i Mustafa Nanos:

Në Prishtinë pas zgjedhjeve të fundit të cilat u fituan nga VV dhe nga LDK-ja, duke parë që ato të dyja janë partitë që kanë vendosur të negociojnë, ka kohë pra që kanë filluar negociatat. Gjatë kohës që këto negociata janë zhvilluar ne kemi pasur mundësi të shohim, përveç të tjerash nëpër rrugët e Prishtinës zotin Isa Mustafa të ecë ngadalë, shumë ngadalë, gati-gati të zvarrisë këmbët e veta për të shkuar diku, apo për tu larguar. Ka patur gjithmonë në dorën e djathtë një patericë, tek e cila është mbështetur dhe në krahun e majtë ka pasur një person që e mbajtur për krahu dhe e ka ndihmuar që të ecë. Ai është i sëmurë, këtë gjë e ka pranuar vetë publikisht, ka pothuajse 2 vjet, vuan një sindromë e rrallë që quhet “Guillain Barre” dhe ka të bëjë me një dobësim muskulor që përparon me ritme të shpejta.

Pra është një sëmundje problematike në rrethanat në të cilat ndodhet Isa Mustafa. Ai ka mundur të frenojë përparimin e kësaj sëmundje në sajë të kurave dhe në sajë të kujdesit të mjekëve për fat të mirë mendjen e ka qiqërr sepse sëmundja nuk ka afektuar procesin e tij të të menduarit dhe kjo është ok, por fizikisht është i pamundur. Në vend të tij unë do të jepja dorëheqjen dhe do të tërhiqesha nga politika dhe do të fokusohesha tek shëndeti im personal, është një gjë që do ta bëja dhe nuk do shihnja asnjë në botë pse të mos e bëja sepse funksionet e Isa Mustafës në këtë rast dhe detyra që ai ka si kryetar i LDK-së një nga më të rëndësishmet. Kjo detyrë kërkon energji fizike, që Isa Mustafa sot nuk i ka.

Unë mendoj se ai duhet ta kishte dhënë dorëheqjen sepse ai mund të zëvendësohet, të gjithë njerëzit në këtë botë janë të zëvendësueshëm. Vetëm profetët nuk janë të zëvendësueshëm, mirëpo, profetët kanë  një mandat që ua jep tjetërkush. Edhe profet është ai tjetërkushi që unë ju përmenda që mund t’ua heqë mandatin, të gjithë të tjerët janë të zëvendësueshëm dhe unë dua të them se Isa Mustafa nuk është profet, edhe ai vetë e di që nuk është profet. Isa Mustafa nuk është as Buda, nuk është as ndonjë perandor, ndonjë mbret, diktator se edhe këta për arsye të ndryshme e kanë të vështirë të japin dorëheqjen. Ai nuk është as Papa i Romës, ndonëse edhe Papa për arsye shëndetësore ka ndodhur që ka dhënë dorëheqjen. Pra Isa Mustafa mund të zëvendësohet, sipas meje ka gjithmonë kohë që ai të japë dorëheqjen dhe duhet ta bëjë këtë për të mirën e partisë së vet, familjes së vet dhe mbi të gjitha për të mirën e vetë që unë ia urj nga studioja e “Provokacija” nga thellësia e zemrës sime, shërim të shpejtë dhe të plotë. Mirëpo, deri atëherë do të ishte mirë që ai të jepte dorëheqjen sepse e gjitha kjo që po ndodh përveç të tjerash është pak groteske dhe qesharake. Është qesharake të shohësh një lider politik që vjen vërdallë, stërmundohet dhe torturohet, vjen vërdallë nëpër rrugë për të bërë disa negociata që fare mirë mund t’i bënte dikush tjetër.

Përsëris edhe njëherë, shërim të shpejtë dhe të plotë zotit Isa Mustafa. Ky ishte monologum im për sonte. /abcnews.al

 

 

 

 

sara-bajraktari.jpg
nev ila23:01 | 27/12/2019

Fituesja e çmimit të tretë në Festivalin e këngës në RTSH, këngëtarja 16 vjeçare Sara Bajraktari, ishte e ftuar mbrëmjen e sotme në studion e Provokacija, me gazetarin Mustafa Nano.

16 vjeçarja ndau me publikun, ndjesitë dhe emocionet që kishte përjetuar, jo vetëm në festivalin e këngës, por edhe gjatë performancave të ndryshme, në skena të tjera.

Përveç kësaj, këngëtarja e re tha se nuk e priste të vlerësohej me çmimin e tretë, duke qenë se konkurronte me emra të mëdhenj të muzikës shqiptare, në festival.

Pjesë nga biseda:

Mustafa Nano: Çfarë bëtë pas fitores?

Sara Bajraktari: Qava që të lirohesha..më vonë sigurisht që po gëzoja.

Mustafa Nano: Skena a ju jep emocion?

Sara Bajraktari: Shumë..

Mustafa Nano: Në momentin që këndoni në skenë a i shihni spektatorët apo nuk e keni mendjen fare tek ata?

Sara Bajraktari: Unë futem në personazhin e këngës, harrohem aty, fokusohem diku dhe thjesht këndoj këngën e mundohem ta përcjell te publiku.

Mustafa Nano: Dmth e supozoni sallën bosh?

Sara Bajraktari: Nuk e marr parasysh fare, nuk e llogaris.

Mustafa Nano: Këtë këngë e ka bërë Adrian Hila?

Sara Bajraktari: Po…

Mustafa Nano: Ishte Adrian Hila që të zgjodhi ty apo ja kërkove ti këngën?

Sara Bajraktari: Unë mund t;ia kërkoja këngën dhe mund të mos më zgjidhte por që jam shumë e lumtur që mori përsipër të realizojë këngën time.

Mustafa Nano: Sa kohë duhet të realizoni këngën?

Sara Bajraktari: Orkestrimi dhe muzika është në dorën e kompozitorit, ndërsa këndimi është pjesa ime që sigurisht kërkon shumë prova.

Mustafa Nano: Cili është këngëtari shqiptar që ju e çmoni?

Sara Bajraktari: Egzona Ademi dhe Aurela Gace./abcnews.al

 

provokacija-monologu.jpg
nev ila09:21 | 25/12/2019

Do ju kallëzoj disa fotografi. Fotografia e parë është fotografia e Sali Berishës me Simon Stefanin. Burri i shkurtër në mes, me syze është Simon Stefani.

Është një fotografi tjetër ku ka dalë Berisha me Hysni Kapon.

Siç e thashë janë foto të vjetra, dhe nuk i kam nxjerrë këtu për të diskretituar Sali Berishën.

Po marr guximin të them se fotot janë OK, sepse jam i sigurtë që kanë qenë me mijëra njerëz, që kanë dashur të jenë në vendin e Sali Berishës, kanë dashur të jenë në këto foto.

Rrethanat e kanë dashur që në këto foto të jetë Sali Berisha.

Është dhe një tjetër foto e famshme ku Sali Berisha ka dalë në foto me familjen e Enver Hoxhës, shihet që janë në një barkë të thjeshtë, duhet të jenë në Drilon.

Është dhe një foto tjetër ku Sali Berisha është po me familjen e Hoxhës, por në një dhomë, në një shtëpi. Duhet të jetë me siguri shtëpia e ndonjërit prej fëmijëve të Enver Hoxhës.

Këto foto nuk i kam ekspozuar sot, për të kritikuar apo qortuar apo denigruar Sali Berishën. E përsëris, për mua këto foto janë Ok-ej për të njëjtën arsye që iu thashë.

Kanë qenë me mijëra shqiptarë që do të donin të ishin në vendin e Sali Berishës, sidomos në rrethanat e fotos së fundit, pra paranë familjes së Enver Hoxhës.

Mund të pranohet gjithashtu që ky njeri ka qenë 25 vjet anëtar i Partisë së Punës së Shqipërisë, mund të pranohet, mund të jetë Ok-ej dhe ky fakt.

Mund të jetë Ok-ej edhe fakti që ka qenë sekretar i organizatës bazë në ndërmarrjen ku ka punuar, në spitalin që ka ekzistuar atëherë në Tiranë.

Mund të pranohet edhe fakti që, ndonëse ka qenë me këtë lloj biografie dhe këtë lloj backgroundi, ky njeri u zgjodh dy herë President i Republikës, ky njeri ishte 2 mandate Kryeministër i Republikës së Shqipërisë, dhe kjo është Ok-ej.

Po çfarë nuk mund të pranohet? Është një gjë tjetër.

Nuk mund të pranohet që mbështetësit e këtij njeriu, si psh. Gazmend Bardhi, Tomorr Alizoti, Agron Tufa, apo të tjerë, ti vërsulen sot një personi si Arben Kraja të cilin unë nuk e njoh, këto kohë e mora vesh se paska një njeri që quhet Arben Kraja dhe që është zgjedhur në krye të SPAK-ut.

Nuk mund të pranohet që këta njerëz ti vërsulen Arben Krajës,  dhe ti vërsulen për faktin, që Arben Kraja 30 vite të shkuara, ka qenë prokuror, dhe nga pozitat e prokurorit ka dënuar mbi bazën e ligjeve të shpifura të diktaturës që ishin në fuqi.

Ka vendosur dhe mbi bazën e mendësive të veta komuniste, por në këtë rast jam i bindur se ka qenë mbi bazën e ligjeve që kanë qenë të shkruara, dhe që për mua kanë qenë ligje të shpifura. Mbi bazën e atyre ligjeve ka dënuar disa njerëz për moralin e tyre antikomunist.

Ti vërsulen këtij njeriu ata njerëz, për të cilët unë fola, që kanë qenë mbështetës të atij njeriu që unë fola, kjo është për të marrë malet.

Kjo është për të marrë ekzilin, kjo është arsye për të marrë ekzilin. Kështu që unë po e mbyll me një pyetje;

Si ka mundësi që këta njerëz janë të provokuar, që sot në krye të SPAK-ut është Arben Kraja, që paska qenë prokuror në vitin e fundit të dikaturës komuniste? Për mua qofshin këta që janë!./abcnews.al

bardhyl-musai.jpg
nev ila22:43 | 24/12/2019

I ftuar në “Provokacija” përballë Mustafa Nanos ka qenë Bardhyl Musai, pedagog në Universitetin e Tiranës.

Pedagogu Musai foli për provimin e PISA-s, një lloj testimi për moshat 15 vjeçare ku Shqipëria bën pjesë që prej vitit 2002.

Sipas pedagogut ky provim është tepër i rëndësishëm për të zhvilluar politikat arsimore, për të ditur të metat e sistemit aktual arsimor, si dhe ku duhet ndërhyrë për ta përmirësuar atë.

Pjesë nga biseda në studio: 

Bardhyl Musai: Provimi i PISA (Project for International Student Assesment) ka lindur si rezultat i lëvizjes së lirë në tregun global të punës për shkak të interesit të biznesit kryesisht, për të ditur se njerëzit që lëvizin në këtë treg global të punës, çfarë shkollimi kanë nga vendet ku vijnë.  Shqipëria i është bashkangjitur në vitin 2002 në këtë testim. Shumë vende e kanë shfrytëzuar  PISA-n për politikë arsimore, pra nga njëra anë, të dihet në mënyrë globale se si janë sistemet arsimore në vende të ndryshme të botës, për të ditur përgatitjen e këtyre njerëzve në lëvizjen e tregut global të punës, dhe nga ana tjetër, rezultatet e PISA-s analizohen nga shtetet për të bërë politikë arsimore. Pisa nuk ka të bëjë me përmbajtjen shkollore të secilit vend. Ka të bëjë me shprehitë jetësore, që kryesisht kanë të bëjnë me shprehitë e të menduarit, dhe për përshtatjen në situata të jetës reale. Për të bërë politikë arsimore, duhet të mbështetemi në dy gjëra themelore: e para në hulumtim dhe testimet ndërkombëtare PISA, dhe testimi kombëtar i maturës shtetërore, janë dy testime që na orientojnë për të bërë politika arsimore , për të ditur të metat e sistemit dhe ndërhyrjen. Nga ana tjetër mbështeten në teori apo doktrina arsimore.

Mustafa Nano: Cili është testimi më i rëndësishëm i qeverisë shqiptare, ai i maturës që bëhet këtu apo është PISA?

Bardhyl Musai: Për mendimin tim janë të dy të rëndësishëm, sepse PISA ka të bëjë me këtë fashë të nxënësve 15 vjeçar, dhe për të ditur ndërhyrjet që bëhen në sistem ndërsa matura shtetërore ka të bëjë jo vetëm me hyrjen në universitete por edhe me dy cilësi të tjera; e para shteti jep llogari përpara qytetarëve, se si taksapagues të arsimit, për cilësinë e shërbimit  arsimor që ofron, dhe tjetra është përgatitja e rinisë për sfidat që i pret në të ardhmen. Pra të dyja kanë rëndësinë e vet por me ngjyrime të ndryshme./abcnews.al

patoziii.png
R D00:19 | 21/12/2019

Kreu i Bindjes Demokratike, Astrit Patozi duke folur në intervistën me Mustafa Nanon në “Provokacija” u shpreh me ironi se tre dinozaurët e politikës u gëzuan shumë për krijimin e SPAK-ut, duke nënkuptuar partitë e mëdha.

“Kjo është në një shoqëri që ka humbur ekuilibrin dhe ndaj kemi një politike që vegjeton sipër kënetës. Ditën që u ngrit SPAK-u u krijua ideja se ishte ditë e madhe dhe 3 dinozaurët e politikës nxituan të bënin falenderime. Një mik i imi më tha se më duken si delet kur takojnë për herë të parë ujkun. Ka një hipkrizi të madhe. Janë të njëjtët faktorë që kanë vonuar SPAK-un dhe tani gëzohen sikur SPAK-u do të hetojë viktimat e termetit dhe jo politikanët e lartë”, tha Patozi.

I pyetur nga Mustafa Nano nëse ka filluar të funksionojë reforma në drejtësi, pasi tashmë janë dënuar Tahiri dhe Salianji, Astrit Patozi u shpreh se “këto janë disa sinjale, por unë pres të ketë dënime ekzemplare dhe jo si ato të Nexhmije Hoxhës”.

Më pas Patozi iu përgjigj disa pyetjeve për veten.

Mustafa Nano: Je ai që ke qenë?

Patozi: Jam përpjekur të jem i vertete. Koncesioni më i madh i imi në politikë është: Heshtja! Pra kam heshtur edhe kur mund të flisja. Por ama kur kam vendosur të flas kam thënë atë që kam besuar.

“Unë pretendoj të jem atipik dhe jo patetitk siç janë shumica e politikanëve” tha ai.

Ndërsa për kundështarët në politike, ai tha se “sot kemi një qeveri të keqe dhe një opozitë të vogël dhe kjo mund të zgjasë nëse nuk do ketë ndonjë gjysmë revolucioni”./abcnews.al

raimonda-shundi.png
R D22:48 | 20/12/2019

Mbrëmjen e sotme një ndër të ftuarit e Mustafa Nanos në Provokacija ishte aktorja Raimonda Shundi. Ajo është një ndër protagonistet kryesore të protestës kundër shembjes së Teatrit Kombëtar. Gjatë bisedës Mustafa Nano tregoi se kishte qenë para pak ditësh në Teater bashke me Blendi Fevziun, por theksoi se ai nuk e mbështet kauzën e artistëve.

“Rezistenca juaj ka qenë heroike dhe mund të mbeteni në histori. Mua më duket fantastike rezistenca juaj, por saktësia e kauzës jo. Më ka mbajtur larg kësaj kauze, fakti se është politizuar. Ka një audience e ngushtëzuar”, tha Nano. Ndërsa Shundi tha se artistët janë detyruar të marrin mbështetjen e së djathtës pasi gjendeshin në sulmin e forcës tjeter politike.

“Teatri është i mrekulleushëm si mund ta heqësh atë komiditet që ka spektatori?”, tha ajo, duke shtuar se ai teatër është memorie, histori jo vetëm për artistët por edhe qytetarët. /abcnews.al

nano-2.jpg
in a21:53 | 20/12/2019

Nga Mustafa Nano

-Monolog

Gjatë një aktiviteti që mbahej në hollin e katit të parë të kryeministrisë ku merrte pjesë edhe kryeministri Rama, më bëri përshtypje numri kamerave. Më ka lënë shenjë të pashlyeshme numri i cili ishte shumë i vogël, kishte vetëm dy kamera. Ishin kamerat e kanalit interesant televiziv, me emrin ERTV. Çfarë është ERTV? Është një kanal televiziv në profilin e “Facebook” të kryeministrit Rama. Sipas kryeministrit Rama pas ERTV-së janë një grup i vogël njerëzish që punojnë në zyrën medias të Partisë Socialiste, janë të gjithë nga Fressh.

Njerëzit që punojnë te ky televizion janë militantë edhe pse do të duheshin të ishin gazetarë. Rama pretendon që janë tre, por do të donim që ai ta provonte që janë tre. Në emër të transparencës duhet të provonte që vërtet paguhen nga PS. Por edhe nëse kryeministri e provon këtë lind një diskutim më i madh.

Nuk ndodh kurrë që kryeministri i Italisë Giuseppe Conte të punësojë njerëz që paguhen nga partia. Këto janë çudira që ndodhin vetëm në Republikën e Shqipërisë, ku duket që në vend të kryeministrit kemi akoma një sekretar të parë të komitetit qendror të Partisë Socialiste. Problemi më i madh është që të drejtën ekskluzive për të filmuar në pallatin kryeministror e kanë vetëm kamerat e këtij kanali. Kjo është përbuzja më e madhe që i bëhet kësaj shoqërie.

Transparenca nuk mund të garantohet nga kamera që janë të komanduara nga vetë kryeministri. Vetëm 10% e aktiviteteve filmohen nga kamera të tjera dhe janë kryesisht takime me personalitete të huaja. Me sa duket nuk do të turpërohet me të huajt sepse do ta vinin re mungesën e kamerave të tjera. Rama këtë e ka evituar ndërsa për mjedisin e brendshëm nuk e ka evituar sepse mendon se këtu nuk ka përse të fëlliqet. Ai duhet ti hapë dyert e kryeministrisë ndaj kujtdo që ka një kamera./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono