mustafa nano

MUC-NANO-1280x776.jpg
ger ta21:12 | 10/03/2020

Në monologun e tij këtë të martë në “Provokacija”, Mustafa Nano është ndalur tek situata e krijuar nga koronavirusi në vend. Konkretisht Nano ka komentuar task-forcën që është njoftuar se do të ngrihet nga Presidenca për të monitoruar situatën në terren.

Sipas moderatorit kjo lëvizje e Ilir Metës është qesharake dhe e çuditshme. Nano thekson se Meta në një situatë të tillë duhet të kishte thirrur në zyrë Ramën, pavarësisht marrëdhënies së tyre.

Monologu nga Mustafa Nano:

Ka ndodhur ajo që pritej koronavirusi ka mbërritur edhe në Shqipëri. Janë shfaqur të infektuarit e para me koronavirus, megjithëse me shumë gjasa numri i të prekurve me këtë infeksion është i destinuar të rritet.

Situata duhet thënë se është serioze, në rrethana të tilla është me interes të shihet reagimi i shoqërisë, më saktë i disa përbërësve të rëndësishëm të shoqërisë shqiptare. Këtu kam parasysh masën e madhe të mjekëve, kam parasysh masën e madhe të gazetarëve, median, kam parasysh sidomos politikanët. Në këtë mes më ka kapur në befasi reagimi i Presidentit të Republikës. Them më ka kapur në befasi, sepse ai ka nxjerrë njoftimin që në Presidencë është krijuar një task-forcë.

Dje doli njoftimi që kjo task-forcë ka disa funksione dhe mes të cilave mund të përmendim faktin që task-forca presidenciale do të monitorojë gjendjen në terren. Do të përpiqet të aktivizojë të gjitha potencialet, resurset e vendit, të gjitha mundësitë që ka kombi shqiptar në këtë rrethanë. Dhe në fund nga Presidenca ju bë edhe një apel qytetarëve të Shqipërisë, të cilët nëse kanë shqetësime dhe ankesa duhet të njoftojnë Presidencën nëpërmjet një numri telefoni që ju dha dhe adrese e-mail.

Unë dua të them se e gjitha kjo mu duk qesharake, mu duk e çuditshme. Madje është pak të them qesharake dhe e çuditshme. Presidenti i Republikës së Shqipërisë është një figurë honorifike, sipas Kushtetutës ka vetëm kompetenca të natyrës honorifike. Kjo është më e vërtetë akoma në ditët e sotme, ku maxhoranca në mënyrë tinëzare edhe brutale me shumë të padrejtë ka tentuar ta zhveshë edhe prej këtyre kompetencave. Në këtë kuptim nuk ka asnjë lloj sensi që Presidenti i Republikës të ngrejë një task-forcë me kompetenca ekzekutive.

Nuk ka asnjë kuptim që kreu i shtetit të sillet si një funksionar që ka kompetenca të qarta ekzekutive. Ai nuk i ka këto kompetenca, ai nuk ka në dorë të mobilizojë resurse. Dhe prandaj gjesti i tij ishte ashtu siç e thashë pak më parë, i çuditshëm. Me këtë që bëri ai demonstroi edhe njëherë se ne shqiptarët vazhdojmë të jetojmë në kohë para politike, para demokratike, ku institucionet nuk ndihmojnë dot njëra-tjetrën, por i kundërvihen njëra-tjetrës.

Unë mendoj se në këtë rrethanë, në rrethana të ngjashme me këtë tonën kombet e mëdhenj dinë të reagojnë, dinë të nxjerrin më të mirën e tyre. Dhe unë kam pritur, kam përshtypjen se shumë njerëz kanë pritur që krerët e institucioneve të rëndësishme të shtetit shqiptar, si Presidenti i Republikës, në këtë rrethanë ai mund të nxirrte më të mirën e vet.

Këtë gjë ai mund ta bënte me një gjest shumë të thjeshtë, duke i bërë një telefonatë kryeministrit, armikut të tij, ta ftonte në zyrën e vet dhe ti thoshte: “ok unë e di që marrëdhënia jonë është e vështirë, të gjithë e dinë që marrëdhënia jonë është e vështirë, por ky është një moment i veçantë në zyrën e vendit, siç është një moment i veçantë i shumë vendeve në Evropë. Dhe prandaj është vendi, është koha që ne të lëmë mënjanë konfliktet, mllefet tona, është koha që ne të lëmë mënjanë goditjet nën brez dhe të bëhemi bashkë, të shfaqemi edhe përpara publikut në mënyrë që të përcjellim mesazhin që shoqëria shqiptare është e bashkuar”. Ky duhet të ishte mesazhi që duhej përcjellë. Kjo do ishte gjëja më e mirë që duhej bërë dhe jo krijimi i një task-force, e cila do bëheni dëshmitarë të gjithë që nuk do të ketë asnjë lloj funksioni praktik dhe real.

/abcnews.al

nano.png
in a21:49 | 06/03/2020

-Ligji mbi dekriminalizimin e politikës erdhi pas një nisme të opozitës dhe suksesi ishte i padiskutueshëm. Menjëherë u evidentuan një numër politikanësh lokalë e qëndrorë që kishin probleme me biografinë e tyre penale. Ishin dënuar, apo ishin paditur, për krime të kryera në të shkuarën, shpesh 20 vjet më parë. Akuzat ishin: vjedhje, kontroll prostitucioni, përdhunime, apo ku di unë çfarë tjetër. Këta janë larguar tanimë nga politika. Të gjithë, pothuajse të gjithë, ishin të lidhur me maxhorancën.

-Ky ligj ishte ok. Shumë mirë që u bë. E duhet të mbetet gjithë kohën në mënyrë që t’u bëhet pengesë gangove apo ish-gangove të kenë një zë, apo fuqi të plotë, në procesin e vendimmarrjes. Por….. ka një “por” që mua më duket e rëndësishme.

-Ky ligj është bërë nga njerëz që janë, me shumë gjasë, më të inkriminuar sesa ata që ligji synon të godasë. Autorët e ligjit, e në përgjithësi miratuesit e ligjit, në fakt një pjesë e mirë e tyre, jo të tërë, do duhej të ishin dënuar për faje më të rënda.

Ata kanë abuzuar me pushtetin, kanë shpërdoruar fondet publike, janë pasuruar vetë. Një pjesë e tyre kanë pasurira të pallogaritshme sot, shkojnë në Kuvend me makina që kushtojnë mbi 100 mijë euro dhe të mendosh se ata nuk kanë qenë biznesmenë asnjë ditë.

Sikur të mos mjaftonte ky krim, ata kanë kryer edhe krime të tjera që për mua janë edhe më të rënda: kanë provokuar herë pas here trazira sociale, kanë provokuar kriza politike, ja, si kjo e këtyre ditëve, na kanë penguar neve të mbajmë zgjedhje normale, na kanë vjedhur votat, kanë penguar ndërtimin e një administrate publike të qëndrueshme, na kanë bërë gazin e botës me sherret e tyre, etj, etj.

-Por ata nuk janë dënuar sepse kanë pasur imunitet, e sidomos impunitet. Dhe impunitetin ua jep edhe shoqëria shqiptare që në një mënyrë a në një tjetër u ka dalë në mbrojtje, por edhe pushteti, të cilin e përdorin pikërisht për të mbrojtur vetveten. E keni pyetur ndonjëherë veten se pse kudo politikanët vjen një ditë që ikin, e veç këta tanët nuk ikin kurrë? Përgjigja është: kanë bërë aq shumë të pabëra e paudhësira sa vetëm imuniteti e impuniteti politik mund t’i mbrojë. Dhe këtë imunitet a impunitet nuk mund ta kenë, nëse ikin nga politika.

-Si përfundim, ligji i dekriminalizimit është ok, e duhet të mbetet e duhet të funksionojë, por ky ligj nuk bën dekriminalizimin e vërtetë.

Ligji i dekriminalizimit na ka pastruar fushën prej një pisllëku të lehtë, por llumi i madh ka mbetur brenda. Sepse vetëm një budalla mund të mendojë se Elvis Rroshi apo Valdrin Pjetri janë për vendin një e keqe më e madhe, e janë me bëma kriminale më të forta, sesa do politikanë shqiptarë që përveçse janë milionerë në euro pa bërë kurrë një biznes, kanë bërë edhe një dëm shumë më të madh: kanë mbjellë varfëri e padrejtësi, e kanë vrarë dashurinë për këtë vend te shumica e shqiptarëve.

 

mustafa-nano-provokacija-monologu-1280x787.jpg
nev ila21:35 | 03/03/2020

Edi Rama nuk po ngopet me pushtetin që ka marrë apo që i ka rënë në duar. Partinë më të rëndësishme në vend, atë socialiste, e ka bërë zap si njëherë e një kohë Enver Hoxha të vetën.

E patë Kongresin e fundit. Lajmi i vetëm ishte që mbajti një fjalim shoqja Nexhmija, dmth Linda Rama. E sikur të mos mjaftonte kjo, pjesa më e bukur e fjalimit të Ramës iu dedikua asaj.

Rama e konsideroi atë opozitaren më të madhe në këtë vend. Opozitaren e vetme. Dhe në fund, nuk mund të mos përmendte emrin e të birit, që na e ka bërë personazh urban. Nuk është çudi që në Kongresin tjetër t’ia japë fjalën edhe nënës, djalit të madh, vëllait.

Edi Rama ka në dorë parlamentin. Nuk e ka uzurpuar këtë pushtet. Ia lanë, ç’është e vërteta. Ia la opozita. Ai ka në dorë edhe pushtetin lokal. Edhe këtë nuk e ka uzurpuar. Ia la opozita sërish. Dhe Ramës i pëlqeu kjo punë.

Siç i pëlqeu edhe fakti që opozita ishte kundër Reformës në Drejtësi, e cila, Reforma në Drejtësi pra, tanimë është e komprometuar, më së pari ngaqë socialistët i kanë veshur një dhe vetëm një qëllim, arrestimin e Metës, Berishës e të ndonjë opozitari tjetër, dhe së fundmi me lojrat për të shtënë në dorë Gjykatën Kushtetuese.

Kështu i ka mbetur veç posti i presidentit pa e bërë të vetin. Dhe këtë po kërkon ta fitojë nëpërmjet shkarkimit të Metës. Ky e fundit e ka hak të shkarkohet, në fakt. Shkarkimi i tij është gjëja e duhur.

Por puna është se kjo maxhorancë i ka marrë të gjitha. Prandaj ia ka djegur shanset vetes për të bërë gjënë e duhur në këtë rast. Dhe kështu, ne jemi të detyruar të kemi në krye të shtetit një njeri si Ilir Meta.

La situazione politica non è buona. 

Lulzim Basha donte të bëhej kryeministër. Donte shumë. I lëshonte goja lëng. Dhe prandaj nuk i pritej. Pasi provoi të bëhej me kryengritje, me kanosje, me djegie mandatesh, me bojkotim zgjedhjesh lokale, me luftë kundër Perëndimit të korruptuar, tani duket se ka vënë mend dhe i është kthyer rrugës normale.

Mirëpo nuk ka gjë në terezi. Transformimi nga fajkua në pëllumb e ka zvogëluar fare si figurë, e ka bërë qesharak, e ka bërë karakter portokallie. Dhe me këtë ka bërë nervozë opozitarët, të cilët kanë mbetur me gisht në gojë.

Janë pa pushtet, pa mundësi për të abuzuar. Sepse gara politike në Shqipëri bëhet bash për këtë: për të shtënë në dorë mundësinë për të abuzuar.

Prandaj, pretendimi i opozitarëve se mbrëmë dolën në protestë për demokraci, për kushtetutë, për shtet ligjor, për ta çuar Shqipërinë në europë, se dolën të luftojnë edhe për të mirën time, që si budalla që jam nuk jam në gjendje ta kuptoj, se ata janë burrat e vërtetë të këtij kombi, se ata ishin në bulevard për flamur, madje për të dy flamujt, edhe për atë amerikan, ky pretendim pra të bën të gajasesh me të madhe.

Në mos, t’i sjell zorrët te goja. Sepse gjërat në të vërtetë janë ndryshe. Shumë ndryshe. Ajo protestë ishte një horrlik.

Protestuesit opozitarë nuk kanë gjë me socialistët e korruptuar. Thjesht do donin që të korruptuarit të ishin ata vetë. Atyre u qan syri për një tender, për një PPP, për një vend pune në polici, në dogana, për mundësinë për t’bo ndonji lek që ua ka vjedhur pala tjetër.

Ata thellë-thellë nuk kanë gjë me Edi Ramën. Përkundrazi, ata thjesht vuajnë pse nuk kanë në krye një si Edi Rama, që t’u dilte për zot pritmërive të tyre.

Menduan se kishin Lulzim Bashën, por janë bindur tanimë që nuk e kanë për këtë punë. Dhe tani i kanë shpresat te Ilir Meta. Madje, Ilir Meta është shpresa e vetme. Kjo është arsyeja që dolën në protestë mbrëmë.

La situazione politica non è buona…./abcnews.al

nano-provokacija.jpg
ger ta21:26 | 28/02/2020

Këtë të premte Mustafa Nano ia ka kushtuar monologun e tij emrit të emisionit “Provokacija”, i cili komentohet shpesh.

Nano i është referuar librit “Brenga e Ballkanit”, e Edith Durhan. Fillimihst ai sjell monologun origjinal të Durhamit me një shqiptar nga Kosova dhe më pas sjell edhe dialogun imagjinar se si do të bisedonte Durham me një shqiptar të Kosovës ditët e sotme.

Monologu i Mustafa Nanos:

Ka ende njerëz që nuk po ndjejnë qetësi për titullin e programit tim televiziv, “Provokacija”. Këta njerëz bëhen keq, turfullohen, zemërohen me mua nuk i mban vendi. E gjithë kjo mua më kujton një moment nga libri i Edith Durhamit, “Brenga e Ballkanit”. Në faqet e para është një bisedë, që Durhami e bën me një shqiptar të Kosovës dhe unë po e them këtu”

“Ti flet serbisht?”

“E di serbishten, por nuk e flas.”

“Pse nuk e flet?”

“Sepse nuk dua ta flas. Nuk kam ndërmend ta ndyj gojën time me fjalët e tyre.”

“Pse i urren kaq shumë?”

“Sepse i urrej. Nuk mund të mos i urrej. Kështu kemi lindur. Kështu jemi ne.”

“Si macet me qentë.”

“Bash ashtu, zonjushë! Si macet me qentë.”

Ky është dialogu dhe gjërat nuk është se kanë ndryshuar shumë. Unë e kam të lehtë ta përfytyroj situatën që Edith Durahami të ngjallet sot dhe të shkojë në një familje në Kosovë. E kam të lehtë të përfytyroj Durhamin të hyjë në një familje të Kosovës në një mbrëmje të së martës kur jepet programi “Provokacija”. Ndërsa familja është duke parë programin dhe është një anëtar i familjes që është duke turfulluar dhe Eduth Durhami bëhet kurioz dhe ndërhyn. I thotë: çfarë ke?’

“Ja ky bastard e ka titulluar këtë programin e emrin serb “Provokacija”

“Si quhet ky bastadrdi?”

“Mustafa Nano”.

“Është shqiptar?”

Shqiptar është me letra, por nuk besoj se ka gjak shqiptari, nuk ka sesi, shqiptari nuk i fyen shqiptarët? Pse do zgjidhte të emëronte programin me këtë emër të ndyrrë “PROVOKACIJA”

“Po ti flet serbisht?”

“Kurrën e kurrës unë e di serbishten, por nuk e flas.

“Po pse?”

“Sepse edhe ata nuk e flasinm gjuhën timë, kështu kemi lindur, kësjyu kemi jetuar ne”

“Si macet me qentë?”

“Po, bash ashtu zonjushë si macet me qentë dhe kështu do jemi sa të ketë jetë”.

Ky është një dialog imagjinar. Tani ka njerëz që mëndojnë se ku shqiptar imagjinar ashtu sikur shqiptari real i Edith Durhanit në dialogun eparë. Ka njerëz që mendojnë se shqiptarët dhe serbët janë si macet me qentë.

Unë personalisht nuk mendoj kështu. Unë mendoj ndryshe. Unë mendoj se problemi i armiqëisë mes shqiptarëve dhe serbëve ka lindur në momentin që Kosova ka lidnur si problem dhe ky problem armiqia do të vazhdojë për sa kohë që serbët do të vazhdojnë të besojnë se Kosova është “djepi i qytetërimit serb”. Për sa kohë që serbët nuk do të njohë shtetin e pavarur kosovar.

Në momentin që do të ndodhin këto gjëra, Kosova nuk do të jetë më problem dhe armiqësia mes serbëve dhe shqiptarëve ngadalë-ngadalë do të hidhet pas shpine. Kjo është një gjë që do të ndodhë sesbën sepse kështu ka ndodhur me të gjithë kombet e tjerë që kanë përjetuar armiqësi të kësaj natyre. Unë vë bast për këtë gjë.

/abcnews.al

 

mustafa-nanoo.jpg
ger ta21:07 | 25/02/2020

Në monologun e  tij në “Provokacija” këtë të martë, Mustafa Nano është ndalur tek rasti i futbollistit me origjinë serbe që pranoi të luajë me kombëtaren kosovare.

Bëhet fjalë për Ilia Iviç, vendimi i të cili u prit mjaft ashpër dhe u kushtoi vendin e  punës prindërve të tij. Të dy prindërit që punonin në administratën e Graçanicës u pushuan.

Ndërkohë, Nano teksa e cilëson vendimin e tij për arsye sportive, aludon se çfarë do të ndodhte nëse një djalë me origjinë shqiptare do të luante në kombëtaren serbe.

Pararësisht të gjithave thotë, Nano, vendimi i 17-vjeçarit mund të shërbejë edhe për të transmetuar mesazhe të rëndësishme që tensionet duhen ulur. Sipas Nanos, nëse motivi të jetë ky Ilia duhet të jetë hero i të gjithëve.

Monologu nga Mustafa Nano:

Në ekran është fotoja e një djali të ri. Është një djalë që jeton në Kosovë, punon në Kosovë, por është me origjinë serbe. Quhet Ilia Iviç. Është 17 vjeç, luan futboll. Luan me Flamurtarin, banon në Graçanicë dhe kohët e fundit autoritetet e Federatës së Futbollit në Kosovë, e ftuan këtë djalë që të bëhet pjesë e Kombëtares kosovare për moshat nën 19 vjeç. Ilia pranoi ta veshë fanellën e kombëtares kosovare. Mirëpo, ky fakt nuk u pëlqeu disave në Kosovë, një pjese të Kosovës, e kam fjalën për pjesën serbe. Për shkak të këtij gjesti prindërit e Ilias janë pushuar nga puna. Ata ishin pjesë e administratës lokale në Graçanicë dhe autoritetet serbe atje i kanë pushuar nga puna. Menjëherë kanë reaguar autoritete e Federatës së Futbollit në Kosovë, ata kanë protestuar deri pranë organizmave ndërkombëtare dhe kanë bërë shumë mirë.

Mirëpo, mendja ime prapë menjëherë shkon te një paralele e caktuar dhe unë kam menduar, po sikur kjo që ndodhi në Kosovë me këtë djalin me origjinë serbe të ndodhte në Preshevë me një djalë me origjinë shqiptare. Pra po sikur një djalë me origjinë shqiptare 17 vjeç atje të vendoste në një moment ta caktuar që të bëhej pjesë e kombëtares serbe. Çfarë do ndodhte? Kam frikë se do ta shpallnin tradhtar dhe prindërit do ia pushonin nga puna, dhe madje prindërit e tij nuk do gjenin vend ku të fshiheshin, sipas meje. Kjo është ajo që do ndodhte.

Tani për t’u kthyer te Ilia, te ky djalë që shohim në ekran. Unë nuk e di çfarë ka ndodhur në kokën e Ilias në momentin që ai ka marrë këtë vendimin e rëndësishëm. Unë nuk e di çfarë ka ndodhur në familjen e tij sepse ai e ka konsultuar këtë gjë me prindërit e vet dhe vendimin e ka marrë bashkërisht. Unë nuk e di nëse prindërit e tij kishin ndonjë mëdyshje në momentin që ky u ka thënë që duhet të bëjë këtë gjë. Unë nuk e di gjithashtu edhe se çfarë mendon pjesa tjetër e Kosovës. Nuk ka ndonjë anketim se çfarë mendojnë shqiptarët, por unë jam i prirur të besoj duke parë reagimet që qytetarët në Kosovë bëjnë në rrethana të tilla dhe të ngjashme, jam i prirur të mendoj se nuk u ka pëlqyer shumë fakti që Ilia Iviç ka dashur apo ka pranuar ftesën për të qenë pjesë e kombëtares kosovare. Shumë shqiptarëve me siguri u ka pëlqyer fakti që Ilia ka “tradhtuar” sojin e vet, por nuk besoj se u ka pëlqyer shumë fakti që Ilia do të jetë pjesë e kombëtares kosovare.

Ky ka bërë një gjest të rrallë dhe të guximshëm, ai bën vaki që e ka marrë këtë vendim për arsye krej sportive. Ai në një moment të caktuar ka dashur të afirmohet, ka pritur ndonjë ftesë nga kombëtarja serbe, nuk i ka ardhur kjo ftesë. Federata e futbollit shqiptar është treguar më e shkathët i ka bërë ftesën dhe ky ka pranuar menjëherë. Unë besoj se ky është varianti. Sikur të kishte edhe një variant tjetër, unë prap e përshëndes se duhet përgëzuar edhe për këtë se është një gjest gjithësesi i guximshëm.

Sikur të ishte situata tjetër, sikur ky të kishte motivime më të fisme, sikur ky ta kishte marrë këtë vendim me idenë që unë jam kosovar, unë jam banor i Kosovës dhe unë dua të luaj për kombëtaren e Kosovës dhe unë ftoj dhe të tjerë ta bëjnë këtë gjë, dhe përcjellin mesazhin jo vetëm te pjesa e Kosovës, por edhe te pjesa serbe. Përcjellin mesazhin që tensionet duhet të ulen, ka ardhur koha që të vendoset paqja. Sikur motivimet të ishin të tilla për mua, Ilia do të ishte heroi im, unë mendoj se do të duhej të ishte heroi i të gjithëve.

/abcnews.al

nano-meta.jpg
eri Ida21:58 | 21/02/2020

Monologu i kësaj të premteje i Mustafa Nanos është fukosur tek grushti i shtetit i paralajmëruar ng presidenti Ilir Meta dhe nga thirrja e tij për qytetarët që të protestojnë me 2 mars në mbrojtje të institucioneve.

Nano thekson se nuk është në të drejtën e një presidenti që të thirrë një protestë të tillë, sipas tij kreu i shtetit ka dalë nga binarët kushtetues dhe është bërë njësh me një palë.

Ndër të tjera në Monologun e tij Mustafa Nano është shprehur se Meta ka marrë qartë një funksion të qartë opozitar, ai është bërë një politikan  ekstremist i kushtetutës dhe me këtë ai ka kompromentuar detyrimin kushtetues për të qenë simbol i unitetit kombetar.

Monologu i plotë:

Po e filloj duke thënë një gjë në favor të presidentit mazhoranca e majtë po bën përpjekje për ta anashkaluar rolin e presidentit në procedurën e zgjedhjes së anëtarëve të Gjykatës Kushtetuese që sipas Kushtetutës i takojnë presidentit. Ti zgjedhë emërojnë dhe ti dekretojë. Kjo është një përpjekje që ato bëjnë për të marrë nën kontroll këtë institucion që është një institucion shumë i rëndësishëm që sipas meje, shqetësimi i presidentit Meta është i drejtë,ky është edhe një shqetësim i imi. Prandaj mazhoranca duhet të heqë dorë nga tentativa të tilla. Ajo që po kërkon presidenti është përtej kufinjve të logjikës përtej kufijve të arsyes, përtej kufijve të logjikës, përtej madje të kufinjve të imgjinatës. Ai ka zbuluar dhe po denoncon një një grusht shteti në Shqipëri  një grusht shteti që po zhvillohet para syve tanë sipas atij.

Me grusht shteti sipas të gjithë përkufizimeve ne duhet të kuptojmë një përpjekje të pak njerëzve të një pakice me qëllim për të rrëzuar pushtetin legjitim të një shumice dhe nuk mund të kuptojmë përpjekjet që mund të bëjë një shumicë për ti rritur më shumë fuqitë vetes, ky është grushtri i shtetit. Ndërsa presidenti Meta mund të ketë një përkufizim tjetër për grushtin e shtetit në kokë, prandaj është duke denoncuar një grusht shteti fantomatik, është vërtet një grusht shteti fantomatik. Prandaj ai u bën thirrje shqiptarëve që në datën 2 mars të mblidhen të gjithë dhe të dalin në Bulevardin Dëshmorët e Kombit dhe të prirë nga presidenti i Republikës, dhe kjo është një gjë e paprecendentë që presidenti të dalë dhe të organizojë protestë, ato të p[ërpiqen të frenojnë këtë për të organizuar këtë grusht shteti dhe e dyta kjo është më e rëndësishme më qesharakja qytetarët duhet ti thonë jo dhe duhet ti vënë kufirin çdo përpjekje të mafias ndërkombëtare për të marrë nën kontroll vendin tonë. Presidenti Meta ka lënë të nënkuptohet se me datën 2 mars do të bëhet nami në Bulevardin Dëshmorët e Kombit, sepse qytetarët do të marrin në dorë institucionet.

Për mua presidenti i Republikës ka dalë nga binarët kushtetues, në asnjë faqe apo rresht të kushtetutës presidentit nuk i njihet e drejta, apo detyrimi apo atributi për të mbrojtur apo ruajtur kushtetutën, e dyta është se presidenti është bërë njësh me njërën palë. Ai ka marrë një funksion të qartë opozitar, ai është bërë një politikan  ekstremist i kushtetutës dhe me këtë ai ka kompromentuar detyrimin kushtetues për të qenë simbol i unitetit kombetar. Ai nuk mund të jetë simbol i unitetit kombëtar duke vjellë dhe nxjerr zjarr nga mëngjesi deri mëngjesin tjetër nga goja. Unë përsëris shqetësimi i tij është i drejtë por nëse zien nga ky shqetësim ai duhet të lërë presidencën ai nuk mund të bëjë opozitarin brenda presidencës. Nëse ai vendos të bëjë opozitarin brenda presidencës atëherë ai bën pis funksionin e shenjtë të presidentit. Në fakt ai e ka bërë pis gjithmonë këtë fuinksion, madje ai e ka bërë pis që në krye të herës. Nuk e di nëse ju kujtohet ai u zgjodh president dhe pati një interval kohe në dispozicion deri në në momentin që i duhej të bënte betimin si president, dhe ky interval kohe përkoi me zgjedhjet parlamentare të fundit dhe në këto zgjedhje ne pamë Ilir Metën të sapo zgjedhur si president që veshi qyrkun e kryetarit të LSI-së që nuk ishte zhveshur akoma në fakt, bëri një nga fushatta më të egra dhe luftarake që ai ka bërë në karrierën e vet politike duke kompromentuar rëndë ngjarjen e sapondodhur që kishte të bënte me zgjehdjen e tij si president.

Unë mendoj se Ilir Meta po e bën këtë gjë jo se ka ndonjë gjë kundër ramës, ai thellë thellë në mendjen e vet është duke e uruar Ramën, se i ka dhënë një alibi ky i fundit një arsye që Ilir Meta të çojë deri në fund betejën e tij politike që ai e ka prej kohësh në kokën e vet dhe kjo beteje ka të bëjë me qëllimin e tij për të marrë në dorë frenat e opozitës, gjithçka që po ndodh po ndodh kundër Lulzim Bashës. Nëse Meta do ta bëjë këtë gjë le ta bëjë madje kam përshtypjen mund ti bëhet mirë edhe opozitës por ai këtë gjë nuk mund ta bëjë nga zyra e presidencës duke mbajtur veshur kostumin e presidentit, ai duhet ta heqë këtë kostum. Apeli im është i thjeshtë. Zoti Meta bëni presidentit dilni për zot funksionit të Presidentit, nëse në mendje keni betejën politike për sa fola atëherë duhet të largoheni nga Presidenca, kjo është për të mirën tuaj dhe mbi të gjitha për të mirën tonë, ky është një imperativ ne nuk e meritojmë, ne nuk duam të kemi në presidencë një njeri që e ka mendjen tek betejat e veta politike ne duam një president që të jetë simbol i unitetit kombëtar./abcnews.al

mustafa-nano-provokacija-1280x761.jpg
nev ila21:57 | 18/02/2020

Dje u mblodh në Bruksel një forum i rëndësishëm ndërkombëtar që ne e kemi quajtur Konferenca e Donatorëve, ku u mblodhën 1.15 miliard euro për Shqipërinë e goditur, të dërrmuar, të traumatizuar nga tërmeti i 26 nëntorit 2019.

Fillimisht u krijua ideja e një mrekullie sepse u la të kuptohej që bëhej fjalë për 1.15 miliardë euro donacione. Ne pamë kryeministrin Rama të shokuar, të emocionuar, të shastisur.

Pamë kryeministrin Rama që foli për hudhra dhe të enormen sysh, pamë në të njëjtën kohë një gjë që nuk e kishim parë kurrë këto 30 vitet e fundit. Pamë opozitën që mbeti pa fjalë, mbeti absolutisht pa fjalë, dhe kjo ishte një gjë e paprecedentë.

Në këto rrethana kam përshtypjen që edhe të tjerët kanë bërë të njëjtën gjë që bëra edhe unë, unë vura në dyshim dijet e mia në fushën e leksikut, dhe zura të shfletoja për të verifikuar këto dije.

Zura të shfletoja fjalorët e Oksfordit dhe të Kembrixhit madje edhe fjalorët e Kostallarit për të parë nëse fjala “donacion”, fjala “grante” dhe fjalë të tjera, që përdoreshin dje, kishin atë kuptim që dija unë apo jo.

Në fakt verifikova se dijet e mia ishin të sakta, që donacionet ishin ashtu si unë e dija që ishin. Që do të thotë, para, mallra apo gjëra dhe një si me vlerë që i jepen një personi ose disa personave, ndoshta një kombi apo organizate, në rrethana që këto të fundit janë goditur nga një fatkeqësi e madhe, nga një tragjedi e madhe.

Por situata u sqarua më vonë, në orët e mbrëmjes kam dëgjuar ministrin e qeverisë Rama, Arben Ahmetajn, i cili sqaroi që nuk bëhet fjalë që 1.15 milion euro të jenë donacione, vetëm një pjesë e tyre janë donacione.

Donacione janë 400 milion euro, pjesa tjetër janë hua dhe kredi të buta të cilat i jepen Shqipërisë nga qeveritë e vendeve të ndryshme, nga bankat e ndryshme, për projekte të ndryshme investimi, qeverisë shqiptare, shumica e të cilave nuk ekzistojnë ende në letër.

Kjo do të thotë se nuk dihet se do të merren këto para, kjo do të thotë gjithashtu se një ditë këto para do të kthehen madje do të kthehen me interesa, sipas një % të ulur duhet thënë sepse janë kredi të buta.

Kjo do të thotë më në fund se Konferenca e Donatorëve nuk ishte një konferencë thjesht donatorësh por ishte një konferencë edhe kreditorësh. Lind pyetja ajo që ndodhi dje ishte një dështim ?

Jo, absolutisht jo. Ishte një sukses!

Ishte absolutisht një sukses, ishte sigurisht më i vogël se sa e bënë fillimisht por ishte shumë më i madh se sa pritej dhe mendohej.

Madje duhet thënë se ishte një sukses personal i Kryeministrit Edi Rama i cili ka qenë i vetmi show man në gjithë këtë spektakël prej muresh qysh nga momenti që ndodhi tërmeti.

Ky ka qenë një sukses i kryeministrit Rama sepse ishte ai që ia doli ta mblidhte këtë forum ndërkombëtar, ishte ai që bëri bashkë një numër të madh shtetesh, qeverish, organizatash, dhe bankash ndërkombëtare.

Ishte ai që evidentoi, në mënyrë ndjellëse, tërheqëse, përmasat e tragjedisë që u shkaktua prej tërmetit. Ishte ai që diti ta ekspozojë në forum ë gjithë këtë tragjedi që ndodhi. Ishte ai mendoj unë, që bëri që u mblodhën ato para që u mblodhën.

Në këto rrethana mendoj se ky është një rast i mirë që ne këtë fatkeqësi që na ndodhi ta shndërrojmë në një shanse këtu kryeministri Rama dhe Qeveria kanë në dorë shumë për të bërë, në mënyrë që këtë fatkeqësi ta shndërrojnë në shans, pyetja është:

A do tja dalin ta bëjnë këtë gjë? Kjo është një pyetje, përgjigjen e të cilës nuk e kemi dot tani. Këtë përgjigje do ta marrim vesh muaj më vonë./abcnews.al

mustafa.jpg
in a07:16 | 15/02/2020

Nga Mustafa Nano

E keni parë kryeministrin tonë, Edi Rama në marrëdhënie me gazetarë të huaj, kur ai është në studio televizive të huaja, përballë gazetarëve që nuk janë shqiptarë.

Besoj që keni mundur të vini re që Edi Rama është një burrë i qetë, me tone të qeta, dhe që bën figurë të mirë. Hera e fundit që u pa ishte në studion e Bruno Vespës, në “RAI”, ku bëri një figurë të mirë. Ishte i kujdesshëm , përdori tone të qeta me një kontroll të hatashëm. Kam përshtypjen që të gjithë shqiptarët që e kanë parë, janë ndjerë mirë që kryeminstri i tyre, ishte një zotëri i vërtetë në një studio televizive të huaj.

Por kjo është një gjë që nuk ndodh në Tiranë. Ndodh krejt e kundërta. Mbrëmë (të enjten) kryeministri Edi Rama ishte i ftuar në “Opinion” dhe ndodhi ajo që ju e keni parë. Debati ishte kacafytje. Ndodhi ajo që ndodh shpeshherë mes gazetarëve në studion e “Opinion”, dhe prania e Ramës e bëri debatin më të keq se çdo debat i keq, i bërë mes gazetarësh pa praninë e Ramës. Kjo ndodhi për faj të Ramës.

Kjo ndodh sigurisht për faj të gazetarëve që kanë qejf ti drejtohen me “Ti”. Jam shumë kritik ndaj gazetarëve që shfrytëzojnë rrethana të tilla për të nxjerrë në evidencë madhështinë e tyre. Por nuk është çështja te gazetarët. Debate të tilla ku Rama merr pjesë janë të këqija sepse është faji i kryeministrit Rama.

Asnjë kryeministër, asnjë shtetar në botën e civilizuar nuk sillet në studio televizive, ashtu siç sillet Rama në Tiranë. Ka kryeministër në botë që janë të pakujdesshëm, kemi rastin e Donald Trump, i cili sillet shumë keq. Por nuk e kemi parë në studio televizive të sillet siç sillet Rama. Unë nuk e di arsyen pse Rama sillet ndryshe jasht Tirane. Mendoj që Rama duhet ti evitojë daljet e veta në televizionet e Tiranës në prani të gazetarëve. Është një gjë që nuk i vlen askujt. Debate të tilla televizive bëhen me synimin për të garantuar transparencën e qeverisjes dhe për të diskutuar mbi çështje më rëndësi kombëtare, që na shqetësojnë të gjithëve. I bëj apel jo vetëm Ramës, por edhe kolegëve të mi, që të mos organizojnë debate të tilla me kryeministrin sepse nuk i duhen askujt.

 

Capture-43-1280x786.jpg
in a22:18 | 11/02/2020

Në festivalin  “Sanremo 2020”  u ngjit në skenë edhe një prezantuese shqiptare. Moderatorja Alketa Vejsiu, ka qenë njëra ndër prezantueset e natës së dytë. E ftuar në “Provokacija” me Mustafa Nanon, Iris Luarasi aktiviste e të Drejtave të Grave, ka folur për performancën e Alketa Vejsiut në “Sanreamo 2020”.

Gjatë bisedës në studio Luarasi theksoi se është më e rëndësishme të shihet fenomeni. Më tej ajo u shpreh se nuk e kishte impresionuar shumë monologu i Alketa Vejsiut.

“Çfarë bëri Alketa ndryshe nga mijëra shqiptarë të tjerë?  Çfarë do të bënim ne të gjithë nëse Alketa nuk do të ishte grua, por do të ishte burrë. Me siguri do të reagonim ndryshe. Luarasi theksoi se gjuha e urrejtjes ndaj grave është një fenomen që i ndodh të gjithëve. Po të kishte qenë një prezantues burrë do të ishin më të butë me reagimet”, tha Luarasi.

Gjithashtu Luarasi theksoi se arritjet e femrave në pozitë nuk pranohen shumë lehtë.

Çfarë mendon për Alketa Vejsiun?

Luarasi: Është një vajzë e talentuar, është e bërë vetë. Por ka pasur fatin e madh që ka pasur mentore një grua si Vera Grabocka, pavarësisht inteligjencës së saj.

Mendon se monologun e ka realizuar vetë?

Luarasi: Nuk mendoj që Alketa ia ka lënë dikujt tjetër në dorë. Mund të jetë konsultuar me njerëz të tjerë edhe pse rezultoi se nuk ishte i duhuri. Kjo nuk mund të hedhë poshtë 30 vite karrierë.  

Sa i përket performancës së saj në “Sanremo”, Luarasi u shpreh se ajo ka menduar të përdori kartën e komunizmit edhe pse kjo nuk ishte pika më e fortë e saj. “Te gazetat italiane gjen pak ose aspak njerëz që e kanë kritikuar performancën e saj”, tha Luarasi.

Më tej ajo theksoi se një nga gjërat që i kanë lënë përshtypje negative ishte mënyra se si u soll me motrat Vjollca apo me statusin e Xhemi Shehut, veprim me të cilin tregoi që ishte një vajzë e vogël.

Sa i përket mënyrës se si prezantoi në “Sanremo 2020” dhe Festivalit të Këngës në RTSH, Luarasi tha se duhet të ishte më modeste në Festivalin e Këngës në RTSH dhe jo të bënte vetëm show për të treguar që është njeriu i vetëm që di ti bëjë të gjitha sepse publiku nuk është injorant. Skena e Radio Televizionit Shqiptar nuk ishte vendi i duhur që Alketa të tregonte se di ti bëjë të gjitha”, u shpreh Luarasi.

Në përfundim të bisedës Iris Luarasi theksoi se është shumë me rëndësi që në botën e sotme të marketimit Alketa mund të jetë krenare për veten./abcnews.al

shameti.png
R D21:50 | 11/02/2020

Në seancën e neserme plenare pritet të miratohen ndryshimet ligjore për ceremoninë e betimit të anëtareve të Kushtetueses dhe Kryeprokurorit.  Kjo iniciativë u ndërmor nga mazhoranca pasi Presidenti Meta nuk thirri për tu betuar Arta Vorpsin e për pasojë ajo nuk arriti të bëhej anëtare e Gjykatës Kushtetuese, pavarësisht se mori një “leter betimi” tek noterja.

Për të folur për këto ndryshime ligjore, mbrëmjen e sotme është i ftuar në emisionin “Provokacija” deputeti i PS-së, Adnor Shameti.

Gjatë bisedës me Mustafa Nanon, ai theksoi se nuk do të ndryshohet Kushtetuta, por do të bëhen ndryshime në dy ligje organike ‘ligji për organizimin e Gjykatës Kushtetuese’ dhe ‘ligji për statusin e magjistratëve’ për të cilat duhet shumicë e cilësuar.

Shameti sqaroi me hollësi ndryshimet që pritet të votohen nesër në parlament:

“E drejta e ceremonisë së betimit, është e drejtë e Presidentit. Nuk do t’ia heqim këtë të drejtë. Ajo që kemi kaluar në Komisionin e Ligjeve dhe do të votohet nesër në seancë plenare, është një shtesë që parashikohet se nëse Presidenti nuk e ushtron këtë të drejtë brenda 10 ditëve, parashikohet që betimi i anëtarit të Kushtetueses të bëhet me shkrim dhe t’i niset Presidentit dhe Gjykatës. Pra e drejta e ceremonisë është e drejtë kushtetuese, ndërsa mënyra se si bëhet betimi do të rregullohet me ligjin organik”.

Sipas tij, kjo nuk bëhet për inate personale me Metën, por të zhbllokuar emërimet në këtë gjykatë.

“Nuk është personale me Metën, por është një nismë vetëm për të zhbllokuar emërimet në Kushtetuese që është detyrim i Bundestagut gjerman dhe pjesë e Reformës në Drejtësi. Këtë mekanizëm zhbllokues ne e kemi futur edhe në ligjin për statusin e magjistratit. Parashikojmë që edhe për Prokurorin e Përgjithshëm të bëhet e njëjta gjë si për anëtarët e Kushtetueses. Ceremonia e betimit për Prokurorin e Përgjithshëm bëhet nga Parlamenti, nëse parlamenti nuk e bën për 10 ditë, ai (kryeprokurori) e dërgon me shkrim aktin e betimit.

Këtë mekanizëm nuk e kemi shpikur ne por është sugjerim i Komisionit të Venecias që është dhënë për një rast të ngjashëm në Ukrainë. Ne këtë model kemi marrë si modelin më të mirë të zgjidhjes për të mos i lënë institucionet me vakanca. Sakaq ne presim mendimin e Komisionit të Venecias edhe për çështjen e Arta Vorpsit,. Kemi të parashikuar që në muajin mars të kemi marrë opinionin e Venecias për këtë rast”.

Gjatë bisedës, Nano e ngacmon Shametin duke i thënë se”Meta është president mistrec, se kështu e quan mazhoranca dhe unë do të thoja se është një president i keq, por çdo mazhorancë e ka për detyrë të merret me këtë president që e ka zgjedhur vetë. Por mendoj se nuk bëhet kështu duke i hequr kompetencat”.

Shameti përgjigjet se “në kushtetutë në ligj, akti i betimit është akt ceremonial dhe nuk cënon thelbin e gjësë. Do të doja shumë të mos kishim ardhur në këtë pikë, por i duhej prerë rruga këtij lloj bllokimi pavarësisht mistrecllëqeve të Presidentit (siç thoni ju)”. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono