marreveshja e prespes

greqia.png
ad min18:48 | 24/01/2019

Në Greqi është shtyrë seanca parlamentare për votimin e marrëveshjes së Prespës, që i jep fqinjit verior të shtetit helen emrin Maqedonia e Veriut.

Vendimi i klasës politike është marrë në mbledhjen e Konferencës së Kryetarëve, e cila e ka caktuar votimin për të premten në orën 14 e 30. Më herët gjatë muajit, marrëveshja e Prespës vuri në rrezik koalicionin qeverisës në Greqi.

Partia Grekët e Pavarur doli nga koalicioni pasi lideri i saj Panos Kamenos dha dorëheqjen nga posti i ministrit të Mbrojtjes pikërisht për shkak të rezervave ndaj akordit të arritur qershorin e kaluar me Shkupin.

Megjithatë, pavarësisht largimit të partnerit qeverisës, javën e kaluar qeveria e Aleksis Tsipras i mbijetoi votëbesimit në Parlament, duke marrë dritën e gjelbër për të vijuar me votimin e ujdisë./abcnews.al

parlamenti-grek.jpg
ad min17:15 | 23/01/2019

Nesër në mbrëmje, në parlamentin grek pritet të zhvillohet votimi për Marrëveshjen e Prespës. Pavarësisht debateve të forta që po zhvillohen dhe protestave të paralajmëruara duket se kryeministri grek Tsipras ka siguruar 151 votat që i duhen për ratifikimin e marrëveshjes.

Në parlamentin grek ka filluar të mërkurën seanca plenare për votimin e Marrëveshjes së Prespës. Mbrëmjen e kaluar, drafti i marrëveshjes u miratua nga komisioni parlamentar i politikës së jashtme, ku pati polemika të ashpra mes opozitës dhe qeverisë. Ana proceduriale parashikon që diskutimet të zgjasin dy ditë dhe marrëveshja të hidhet për votim përfundimtar vonë, mbrëmjen e të enjtes.

Siç tregojnë gjasat, kryeministri Tsipras i ka siguruar 151 votat e nevojshme për votimin e marrëveshjes. Përveç 145 deputetëve të SYRIZA-s në pushtet, kanë deklaruar se do të votojnë pro dhe tre deputetë nga partia e ish-ministrit të Mbrojtjes Kammenos, si dhe tre të pavarur. Debati pritet të zhvillohet në një atmosferë të elektrizuar.

Të enjten, është paralajmëruar një protestë e re para parlamentit, kundër marrëveshjes, ndërsa do të afrohet ora e votimit. Gjithashtu, organizatorët kërkojnë që shkollat dhe bizneset të qëndrojnë të mbyllura, ndërsa qytetarët të nxjerrin në dritaret e tyre flamujt kombëtarë të vendosur në gjysmë shtizë./abcnews.al

parlamenti-grek.jpg
ent ela11:45 | 23/01/2019

Në parlamentin grek sot do të ketë debate lidhur me Marrëveshjen e Prespës, ndërsa në darkë mund të votohet për ratifikimin e saj. Lideri i opozitës greke Micotaqis tha se “Nea demokracia” do të bëjë të pamundurën për të bllokuar këtë marrëveshje.

Në parlamentin e Greqisë vijojnë dhe sot debatet rreth ratifikimit të marrëveshjes së Prespës. Debate që do të përfundojnë me votimin e marrëveshjes së arritur mes Athinës dhe Shkupit, mbrëmjen e së mërkurës. Mediat greke raportojnë se kohëzgjatja e seancës do të varet nga numri I deputetëve që do të kërkojnë fjalën.

Edhe pse për ratifikimin nuk duhet një shumicë absolute, mediat greke shkruajnë se sipas parashikimeve marrëveshja do të miratohet me të paktën  151 vota duke pasur parasysh deklaratat e fundit të pjesës më të madhe të deputetëve.

Para zhvillimit të seancës debatet janë zhvilluar në komisionin parlamentar për punë të jashtme.

Ndërkohë kryetari i Demokracisë së re, Misotakis deklaroi se partia e tij do të bënte të pamundurën që marrëveshja e prespës most ë ratifikohet në parlament. Lideri i opozitës u bëri apel deputetëve që të kenë kujdes me votën e tyre pasi do të përballen me ndërgjegjen e tyre dhe historinë në të ardhmen.

Sipas misotakis, marrëveshja e arritur nuk ëshët aspak e mirë pasi për herë të parë në Greqi hiqet dorë zyrtarisht nga gjuha maqedonase dhe identiteti maqedonas i fqinjëve duke braktisur në këtë mënyrë politikën dhjetëvjecare. Një politikë që sipas tij, kryeministri Aleksis Tsipras e njeh shumë mirë.

Kërkesa kryesore e partisë së tij është që në parlamentin grek të shqyrtohet fillimisht kushtetuta e maqedonisë, pasi sipas opozitës greke është e papranueshmë që të bëhen debate pa u analizuar fillimisht teksti përfundimtar, i rishqyrtuar dhe i korrigjuar i kushtetutës. /abcnews.al

 

GORO-MARREVESHJA-E-PRESPES-1280x720.jpg
ent ela20:35 | 18/01/2019

Brenda javës së ardhshme parlamenti grek pritet ta ratifikojë Marrëveshjen e Prespës. Çështja e emrit të Maqedonisë fqinje do të përplasë sërish në këtë seancë maxhorancën e Kryeministrit Tsipras dhe opozitën e Micotaqis. Ndërsa të dielën në Athinë është parashikuar të mbahet manifestimi më i madh i mbajtur ndonjëherë në Greqi, kundër Marrëveshjes së Prespës. /abcnews.al

greqia.jpg
ad min14:58 | 17/01/2019

Shkupi ka dërguar në Athinë notën verbale ku konfirmohen ndryshimet kushtetuese të miratuara në parlamentine vendit. Tashmë është radha e Athinës që të hedhë në votim Marrëveshjen e Prespës.

Pas marrjes së votëbesimit për qeverinë, të mërkurën në mbrëmje, Aleksis Tsipras tashmë e ka rrugën të hapur për votimin e marrëveshjen me Maqedoninë. Është momenti kur shpallet rezultati i procedurës për dhënien e votëbesimit qeverisë.

151 votat në favor të kabinetit qeveritar të kryeministrit Tsipras ishte një zhvillim i pritshëm. Ndërkaq, ishte tjetër lajmi interesant që doli mbrëmjen e të mërkurës. Në Athinë ka mbërritur nota verbale nga Shkupi, me të cilën informohet qeveria greke mbi finalizimin e procesit të ndryshimeve kushtetuese.

Lajmin e bëri të ditur kryeministri grek, Aleksis Tsipras, nga tribuna e parlamentit, duke u fokusuar në dy shënime në fund të notës:

“Çfarë sqarojnë fqinjët tanë? Së pari, nocioni nationalit i referohet ekskluzivisht nënshtetësisë dhe nuk përcakton kombësinë. Dhe e dyta, se gjuha e fqinjëve tanë siç është njohur nga konventa e OKB në 1977, i përket grupit të gjuhëve sllavike të jugut”.

Tsipras iu referua këtyre sqarimeve, në përgjigje të deklaratës së liderit të opozitës, Kyriakos Mitsotakis, që e ndërlidhi votëbesimin e qeverisë me votimin e marrëveshjen e Prespës.

Mitsotakis: “Dua të jem absolutisht i qartë: Kush i jep votëbesimin qeverisë, voton “po” edhe për Marrëveshjen e Prespës, që përbën një lëshim të madh kombëtar”.

Më herët, Tsipras ka thënë që sapo të mbërrinte nota verbale e Shkupit do të niste procedura e votimit edhe në parlamentin grek. Përkundër 151 votave të dhëna të mërkurën për mbijetesën e qeverisë, marrëveshja e Prespës ka shumë gjasë që të votohet edhe nga 3-4 deputetë të tjerë, siç ata kanë lënë të kuptohet, në deklaratat e tyre të deritanishme./abcnews.al

KAMENOS-REAGIMI-1280x594.jpg
ad min11:17 | 17/01/2019

Lideri i “Grekët e Pavarur” dhe ish-partner në koalicionin qeverisës në Greqi, Panos Kamenos, këmbënguli dhe njëherë në qëndrimin e tij kundër Marrëveshjes ë Prespës.

Gjatë fjalës së tij në parlament, në debatet për para votëbesimit të qeverisë së kryeministrit Aleksis Tsipras, Kamenos përsëriti se nuk është dakord me  emrin e zgjeruar me përcaktim gjeografik me termin Maqedoni.

Ai kërkoi që të mbahet menjëherë një referendum për marrëveshjen e arritur mes Athinës dhe Shkupit./abcnews.al

MOSKE-ATHINE-MARREDHENIA-1280x632.jpg
ent ela19:26 | 15/01/2019

Tensionohen sërish marrëdhëniet mes Moskës dhe Athinës. Pas miratimit të ndryshimeve kushtetuese në parlamentin e Shkupit, Moska zyrtare i konsideron si të imponuara nga jashtë. Kjo ka sjellë reagimin e palës greke.

Moska ka bërë një tjetër ndërhyrje të ashpër pas zhvillimeve të fundit rreth marrëveshjes së Prespës. Një deklaratë e ministrisë së jashtme ruse, “godet” njëkohësisht Shkupin dhe Athinën. Deklarata nënvizon se ndryshimet kushtetuese të votuara në parlamentin maqedonas “janë imponuar nga jashtë dhe nuk shprehin  vullnetin e popullit”.

Po ashtu, edhe Athina kritikohet se ka injoruar opinionin e popullit grek që e kundërshton këtë marrëveshje. Deklarata i referohet edhe largimit të Panos Kammenos nga koalicioni qeveritar dhe procesit të votëbesimit për qeverinë Tsipras. Me tone gjithashtu të ashpra ka qenë përgjigjja e ministrisë së jashtme greke. Në reagimin e Athinës shprehet “shqetësimi i përligjur” që deklarata ruse nuk merr parasysh funksionimin demokratik të institucioneve në Greqi, i cili funksionim “nuk përbën terren të përshtatshëm për komente nga palë të treta”.

Gjithashtu Athina nënvizon se deklarata e ministrisë së jashtme ruse “nuk i shkon për shtat nivelit që karakterizon marrëdhëniet Greqi-Rusi dhe lidhjeve shekullore të miqësisë midis të dy popujve”.

Ky është tensionimi i dytë në raportet Athinë – Moskë, që nga vera e kaluar. Atëherë Greqia dëboi dy diplomatë rusë, të cilët u akuzuan se po përpiqeshin të korruptonin zyrtarë lokalë, klerikë ortodoksë dhe qytetarë, me qëllim që ata të zhvillonin protesta kundër marrëveshjes së Prespës. /abcnews.al

TSIPRAS-DEKLARATA-1280x609.jpg
ad min11:34 | 14/01/2019

Kryeminisitri grek, Aleksis Tsipras, ka këmbëngulur se vendi I tij nuk do të tërhiqet nga Marrëveshja e Prespës dhe finalizimi i procesit. Ai u kërkoi qytetarëve grekë që pavarësisht bindjeve politike ta mbështesin atë.

Athina nuk do të tërhiqet nga Marrëveshja e Prespës dhe do t’i shkojë deri në fund procesit të realizimit të saj, njësoj si vendi fqinj. Ka qenë kjo deklarata e Kryeministrit të Greqisë, Aleksis Tsipras, në konferencën për shtyp për marrëveshjen në fjalë, vetëm disa orë pas dorëheqjes së ministrit të Mbrojtjes Kamenos nga koalicioni qeverisës.

Kreu i ekzekutivit grek dhe njëherë më shumë uroi homologun Zoran Zaev, duke shtuar se me arritjen e kësaj marrëveshjeje Greqia është çliruar nga logjika e nacionalizmit për një çështje kaq delikate kombëtare. E njëjta gjë sipas tij ka ndodhur dhe nga ana e tjetër e kufirit.

Tsipras u tha qytetarëve grekë se ai dhe qeveria e tij nuk do të tërhiqen nga marrëveshja dhe se grekët pavarësisht bindjeve politike duhet ta mbështesin këtë proces./abcnews.al

marreveshja-maqedoni.jpg
ad min17:54 | 27/12/2018

Sipas analistëve në Maqedoni, marrëveshja e arritur mes Athinës dhe Shkupit për çështjen e emrit mund të konsiderohet si ngjarja e vitit për vendin. Ata e cilësojnë si vitin e fitoreve në skenën e politikës së jashtme veçanërisht në diplomaci, por edhe të dështime në planin e brendshëm sidomos në sferën ekonomike.

Analistët njëzëri thonë se Marrëveshja e Prespës ka qenë moment historik për Maqedoninë, që ka shënuar vitin 2018. Por, profesor Sefer Tahiri thotë se në këtë marrëveshje, shqiptarët nuk janë përfshirë në mënyrë konkrete, por siç thotë, sërish kanë qenë konstruktivë, me qëllimin e vetëm, vendi të ecë përpara.

“Shqiptarët megjithatë në atë marrëveshje nuk janë cekur në mënyrë decide, por ajo që mbetet si përfundim është se marrëveshja për emrin e mori pajtimin edhe të popullit maqedonas, të shqiptarëve dhe u dëshmua se rreth interesave strategjike mund të arrihet një pajtueshmëri”, u shpreh ai.

Profesor Qashif Bakiu duke komentuar miratimin e Ligjit për Amnisti, shprehet se “pazari” që bëri Maqedonia ndoshta e “pagoi çmimin politik”, por nuk mund ta paguajë atë social. Siç thotë, nuk u “dhunuan” deputetët e Kuvendit, por vullneti i popullit.

“Jo të amnestojmë njerëz të cilët kanë fyer në organin më të lartë legjislativ. Kanë hyrë dhe kanë rrahur jo vetëm deputetët, kanë rrahur vullnetin e popullit”, tha ai.

20 ditët ardhshme janë vendimtare rreth rrugëtimit të Maqedonisë, thotë Prof. Milaim Fetai. Sipas tij anëtarësimi në NATO, do të thotë fund për “agoninë” në të cilën gjendet Maqedonia.

“Këto 20 ditë do të bëjnë çmos ata që nuk e dëshirojnë Maqedoninë të jetë pjesë e integrimeve euroatlantike që këtë ta ndalin. Prandaj kur i numërova të arriturat e vitit 2018, kulminante është Marrëveshja e Prespës që simbolizon duke i respektuar të gjitha dilemat dhe dyshimet se çfarë kupton ai në brendi, por simbolizon anëtarësimin e anëtarësimit të Maqedonisë në NATO”, tha ai.

Arratisja e Gruevskit, sipas Ahmet Selmanit, i ngjan një teatri të paralajmëruar, siç thotë për ta tërhequr vëmendjen nga problemet reale. “Nuk po hyj unë se kush e organizoi, por i ngjau një teatri sepse të flitet 24 orë se pritet që Gruevski të futet në burg dhe të mos e dijë policia nga shkon, kjo është pak a shumë e paralajmëruar”, u shpreh Selmani.

Rreth përplasjeve në bllokun politik shqiptar, Bardhyl Zaimi shprehet se ato kanë ardhur si pasojë e problemeve që i ka pasur shteti, dhe dyshimet që kjo marrëveshje ngjalli tek shqiptarët, por edhe përfitimet eventuale politike nga kjo marrëveshje.

“Rreth jo përmbajtjes në fakt të Marrëveshjes së Prespës, por devijimeve atyre fobive, që shfaqen dhe jo që si kemi parë gjatë periudhës 30-vjeçare këtu në Maqedoni”, u shpreh ai.

Analistët e ftuar në “Klan Debat” vitin 2018 e karakterizojnë si vit i fitoreve në skenën e politikës së jashtme veçanërisht në diplomaci, por edhe dështime në planin e brendshëm sidomos në sferën ekonomike. Është koha e fundit thonë ata që autoritetet e vendit më me shumë seriozitet t’i qasen problemeve reale të qytetarëve, fundja atë që e kanë premtuar para zgjedhjeve./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono