kosove-serbi

0cc76db3-3ad8-4fc2-9391-df1a91afea63.jpg
R D18:06 | 14/02/2020

Në pikën kufitare të Morinës ka patur një fluks të lartë lëvizje pasditen e kësaj të premteje. Qindra automjete kanë hyrë në Shqipëri, por sakaq edhe shumë të tjera kanë shkuar drejt Kosovës.

Korespondenti i Kukësit, Bujar Muçmata thotë për Abc News se shumë qytetarë shqiptarë kanë shkuar në Kosovë për të festuar Shën Valentinin. Ndërsa qytetarët e Kosovës shprehen se vijnë në Shqipëri për të kaluar fundjavën me rastin e 12-vjetorit të Shpalljes së Pavarësisë. Policia kufitare ka punuar me procedurë të përshpejtuar për shkak të radhëve të gjata . /abcnews.al

ilir-meta-konferenca-1.jpg
R D19:27 | 13/02/2020

Presidenti i vendit Ilir Meta theksoi edhe njëherë se ndryshimi i kufijve nuk është zgjidhje as për Kosovën e as për rajonin. Teksa mori pjesë në ceremoninë e organizuar nga ambasada e Kosovës me rastin e 12-vjetorit të Pavarësisë, ai u shpreh se Kosova është faktor stabiliteti në rajon dhe e tillë duhet të mbetet. Sipas tij ka ardhur koha që të zgjidhet problemi mes Serbisë dhe Kosovës ashtu siç u zgjidh problemi mes Greqisë dhe Maqedonisë së Veriut. “Në zemër të një marrëveshje të normalizimit duhet të jetë njohja e ndërsjelltë mes dy vendeve”, u shpreh ai.

Fjala e Metës:

“Kam 2-3 mesazhe. Në Ballkan, nga eksperienca ime 30 vjeçare s’ka popull të keq e popull të mirë, por politikë të mirë dhe vizionare dhe politike të keqe dhe vrastare. Kjo është e vlefshme për çdo vend.

Së dyti në Ballkan çdo popull dhe çdo komb është shumicë në një shtet dhe pakicë në një shtet tjeter, dhe zgjidhja kurrë s’mund të jetë ndryshimi i kufijve, por respektimi i njëjtë i të drejtave të çdo pakice në çdo vend. Shqipëria është shembull sa i takon respektimit të të drejtave të pakicave.

Ne pas kësaj ceremonie,  kemi një ngjarje tjetër po të rëndësishme, që është festa e Serbisë ku duhet të marrim pjesë. Unë dua tu them të gjithëve se pavarësisht paragjykimeve unë kam patur fatin të njoh një udhëheq të madh të Serbisë pro europian me vizion të qartë që ishte Zoran Gjingjic. Edhe pse ai nuk jeton më, ëndrra e shumë qytetarëve të Serbisë është për një Serbi europiane.

Ndaj dua të theksoj se nuk duhet të udhëqihemi nga paragjykimet. Duhet të ecim me frymën e re të bashkëpunimit dhe zgjidhjes së problemeve për të mos qenë peng i së shkuarës. Siç u zgjidh problemi mes Maqedonisë se Veriut dhe Greqisë duhet të zgjidhet tashmë problemi mes Kosovës dhe Serbisë. Për këtë dua të sjell në vemendje fjalën e Sekretarit Amerikan të Shtetit, Pompeo, i cili ka thënë se në zemër të një marrëveshje të normalizimit duhet të jetë njohja e ndërsjelltë mes dy vendeve./abcnews.al

KOSOVE-SERBI-MARREVESHJA_ABC-M2-T1.mpg_snapshot_00.00-1280x720.jpg
ent ela13:07 | 29/10/2019

Eksperti i çështjeve politike nga Fondacioni Amerikan “Heritage”, Luke Coffey, tha se Shtëpia e Bardhë duhet të jetë e kujdesshme kur bëhet fjalë për dialogim me Serbinë rreth çështjes së Kosovës.

Eksperti amerikan Luke Coffey i cili është edhe drejtor i ‘Allison Center” për Studime të Politikës së Jashtme, tha se nuk beson që i dërguari i Shtëpisë së Bardhë, ambasadori Richard Grenell, mund të gjejë një zgjidhje mes dy palëve shumë shpejt, duke shtuar se nuk është reale të pritet një marrëveshje për normalizim të raporteve deri në pranverën e vitit 2020, raporti Zeri I Amerikes.

Ai vuri në dukje situatën politike në Kosovë, dhe zgjedhjet që pritet të mbahen në Serbi duke thënë se nuk pret të arrihet një marrëveshje para pranverës së ardhshme. Coffey theksoi gjithashtu se duhet mbajtur dera hapur për Serbinë që të integrohet në komunitetin Euroatlantik, por duhet mbajtur parasysh lidhjet historike, kulturore dhe fetare që ka Serbia me Rusinë.

Coffey ka kujtuar faktin se Serbia ka nënshkruar një marrëveshje për ekonomi Unionin Euro-Aziatik, dhe që është duke bërë ushtrime të përbashkëta ushtarake me forcat ruse. Ai theksoi megjithatë se brezat që do të vijnë në Serbi do ta kuptojnë që e ardhmja e tyre është Evropa më shumë sesa EuroAzia. /ABC News Albania 24/7

josep-borell-1280x720.jpg
nev ila15:57 | 07/10/2019

Përfaqësuesi i ri i caktuar për politikën e jashtme dhe të sigurisë së Bashkimit Europian, Josep Borrel kalon ” testin” e komisionit të punëve të jashtme të Parlamentit Evropian.

Në dëgjesë në këtë komision, Josep Borrell është shprehur që në fillim se ka si qëllim që të angazhohet në procesin e reformave të integrimit të vendeve të Ballkanit Perëndimor, të mbështesë demokracinë dhe integritetin territorial të Ukrainës, të përballet me sfidat në vendet fqinje, të zhvillojë një strategji gjithëpërfshirëse për Afrikën, një strategji me Azinë, të forcojë marrëdhëniet me Amerikën Jugore dhe adaptojmë marrëdhëniet transatlantike me SHBA-të, me zotin Pompeo.

“Kosova dhe Serbia duhet të gjejnë një marrëveshjë dhe do të bëj ç’është e mundur për këtë. Vizita ime e parë do jetë në Kosovë”, tha Borell./abcnews.al

98936D48-5E11-455C-B7C5-9A3AD7C62736_w1023_r1_s-1.jpg
ent ela08:27 | 04/10/2019

Presidenti Trump njoftoi të enjten se do të emërojë ambasadorin amerikan në Gjermani, Richard Grenell si të dërguarin e tij të posaçëm për bisedimet e paqes midis Kosovës dhe Serbisë.

Richard A. Grenell është ambasador i Shteteve të Bashkuara në Gjermani që nga muaji maj i vitit të kaluar. Zoti Grenell, ekspert i politikës së jashtme, është themelues i firmës “Capitol Media Partners” në vitin 2010, që ofron konsulencë për çështje të jashtme.

Ambasadori Grenell, ka qënë zëdhënës i ambasadës së Shteteve të Bashkuara në OKB për shtatë vjet, 2001-2008, duke e mbajtur këtë post më gjatë se çdo ambasador tjetër, duke shërbyer për katër ambasadorë të ndryshëm.

Ai mban gradën Master për Administratën Publike nga universiteti i Harvardit. /VOA

70167112_405758950063631_8971331020779421696_n.jpg
ent ela10:32 | 07/09/2019

Policia e Kosovës ka arritur që të ndalojë 8 shtetas çek, të cilët kishin planifikuar të ngrinin një dron në stadiumin “Fadil Vokrri” me mbishkrimin “Kosova është Serbi”.

Arrestimi i tyre edhe bërë në flagrance nga Policia e Kosovës, duke iu sekuestruar dhe pajisjet që do të përdoreshin. Sipas raportimeve të policies, njëri nga të ndaluarit ka nënshtetësi serbe.

Në rrjetet sociale ka reaguar dhe futbollisti Valon Berisha. Berisha i kujton tifozëve çek, se vetëm një flamur mund të valëvitet në stadiumet e Ballkanit, “Autoktonus”. /ABC News Albania 24/7

beograd-prisht.jpg
ent ela09:20 | 04/09/2019

Dialogu për normalizimin e marrëdhënieve ndërmjet Kosovës dhe Serbisë, i cili duhet të përmbyllet me një marrëveshje gjithëpërfshirëse dhe juridikisht obliguese, do të jetë një nga çështjet parësore, por edhe sfidë kryesore për qeverinë e ardhshme të vendit, e cila pritet të dalë pas zgjedhjeve të parakohshme parlamentare, që do të mbahen më 6 tetor, vlerësojnë njohësit e zhvillimeve politike.

Politologu Ramush Tahiri, thotë për Radion Evropa e Lirë, që presioni ndërkombëtar për të rifilluar dialogun me Serbinë, ashtu siç ishte ndaj Qeverisë së Kosovës në largim, do të jetë edhe ndaj qeverisë së ardhshme.

“Qeveria e Republikës së Kosovës, pas këtyre zgjedhjeve, është mirë që të jetë një qeveri e spektrit të gjerë dhe të ketë numër të mjaftueshëm të votave, që në mënyrë të zotërueshme dhe kompetente t’i udhëheqë bisedimet me Serbinë, drejtë arritjes së një marrëveshjeje për normalizimin e marrëdhënieve. Këto bisedime duhet të çojnë në njohje reciproke, por para së gjithash, duhet t’i hapin Kosovës perspektivën euroatlantike”, tha Tahiri.

Analisti i çështjeve politike, Agon Maliqi, duke folur për Radion Evropa e Lirë, thekson që rifillimi dialogut me Serbinë, për qeverinë e ardhshme të vendit do të jetë prioritet, madje edhe i imponuar nga bashkësia ndërkombëtare. Kjo, sipas tij, është bërë e qartë edhe nga deklarata e ambasadorëve të vendeve të Quint-it, por sinjale të qarta, siç thotë ai, janë dërguar edhe me emërimin e Matthew Palmer si Përfaqësues i Posaçëm i Shteteve të Bashkuara për Ballkanin Perëndimor.

Maliqi, vlerëson se të gjitha këto janë shenja që vendet perëndimore, e në veçanti SHBA-ja, do të insistojnë që tema parësore e qeverisë së re, të paktën në vitin e ardhshëm, të jetë dialogu. Çështja e dialogut, sipas tij, mund të jetë edhe tema që do ta përcaktojë edhe koalicionin e mundshëm për formimin e qeverisë së re.

“Meqë tema parësore do të jetë dialogu, kjo do të jetë temë që ndoshta edhe e përcakton natyrën e koalicionit. E dyta, pastaj, meqë dialogu ose çfarëdolloj marrëveshjeje, nëse arrihet, do të kërkojë njëfarë lloj konsensusi më të gjerë, ndoshta do të shkohet edhe me ndonjë formë – por, kjo është shumë spekulative në këtë moment – që të zgjerohet, të jetë më gjithëpërfshirëse. Kushdo që të jetë në qeverinë e re, për shkak të përvojës së kaluar, duhet ta ketë parasysh që nuk mundet të shkojë të negociojë pa u siguruar që e ka një lloj shumice kushtetuese, nëse jo në qeveri, të paktën parapa procesit të dialogut”, theksoi Maliqi.

Ai ka theksuar se qeveria e re mund të shpëtojë nga kjo rrethanë vetëm për arsye të tjera të jashtme, që ndërlidhen me atë se cili do të jetë roli i BE-së në dialogun Kosovë-Serbi dhe a do ta trashëgojë shefi i zgjedhur i Politikës së Jashtme të BE-së, Josep Borell punën e paraardhëses së tij, Federica Mogherinit, si dhe zgjedhjet në Serbi, të cilat priten në pranverën e vitit të ardhshëm. Në të kundërtën, presioni ndërkombëtar ndaj saj do të jetë mjaft i madh, për rifillimin e dialogut dhe arritjen e një zgjidhjeje përfundimtare.

Politologu Tahiri, shpreh mendimin që dialogu do të jetë sfidë e paalternativë për Qeverinë e ardhshme të Kosovës. Sipas tij, dialogu është detyrues për Kosovën dhe për Serbinë, për shkak se për këtë i obligon rezoluta e Asamblesë së Kombeve të Bashkuara e 10 shtatorit të vitit 2010, të cilën e kishin propozuar 27 vende të Bashkimit Evropian.

“Qeveria e ardhshme duhet të jetë qeveri e mendjes së hapur, qeveri që i respekton të gjitha rregullat dhe konventat ndërkombëtare. Si e tillë, duhet një qeveri, e cila nuk frikësohet të marrë vendime dhe e cila e ka autoritetin të marrë vendime. Në këtë rast, duhet të jetë qeveri, e cila që në javën e parë do të suspendonte taksën e institucioneve të Kosovës për mallrat e Serbisë dhe të Bosnjë e Hercegovinës”, vlerësoi Tahiri.

Marrë parasysh që çështja e dialogut me Serbinë dhe përfolja e opsionit të ndryshimit të kufirit, si zgjidhje e mundshme, kanë krijuar rrethana që kanë çuar në ndërprerjen e dialogut, e më pas edhe arsye shtesë për rënien e qeverisë në Kosovë, analisti Maliqi vlerëson që nuk përjashtohet mundësia që situata të përsëritet.

“Në një kohë kur nuk e dimë se cila do të jetë përbërja e qeverisë dhe nuk e dimë se për çfarë lloj marrëveshje përfundimtare po flasim, është vështirë të parashikohet. Por, edhe nëse Qeveria e Kosovës ndoshta do të mund ta përballojë ndonjë presion dhe të mund t’i rezistojë bashkësisë ndërkombëtare, kjo do të jetë me kosto dhe pasoja afatgjate për Kosovën, në kuptimin e mbështetjes ndërkombëtare qoftë në Bruksel, qoftë në Uashington. Duket sikur ka një lloj përafrimi në bashkësinë ndërkombëtare në insistimin që Kosova të ecë përpara në dialog dhe Kosova mund të refuzojë pafundësisht, po me një kosto të lartë që nënkupton humbjen e mbështetjes së partnerëve ndërkombëtarë”, u shpreh Maliqi.

Sidoqoftë, senatorët amerikan, Chris Murphy nga radhët e demokratëve dhe Ron Jonson nga radhët e republikanëve, kanë paralajmëruar se bashkë më një delegacion të Kongresit, gjatë kësaj jave do ta vizitojnë Kosovën dhe Serbinë, për të shprehur, siç kanë thënë, mbështetje për dialogun midis dy vendeve./REL

Palmer-deklaratat-1280x739.jpg
ent ela11:40 | 03/09/2019

Në një intervistë për serben Tanjug, i ngarkuari për çështjet e Ballkanit perëndimor, Metju Palmer, u shpreh se njohja reciproke mes Kosovës dhe Serbisë mbetet pika qendrore e një marrëveshjeje të mundur mes palëve.

I ngarkuari i Shteteve të Bashkuara të Amerikës për Ballkanin Perëndimor, Metju Palmer u shpreh se zgjidhja e çështjes së Kosovës mbetet prioritet në axhendën e tij të punës. Në një intervistë për median serbe, Tanjug, Palmer deklaroi se Shtetet e Bashkuara të Amerikës presin që të ndodhë njohja e ndërsjelltë Kosovë-Serbi, si pikë qendrore e marrëveshjes.

Ai theksoi se synonte që të kthejë Beogradin dhe Prishtinën në tryezën e bisedimeve sa më shpejt të jetë e mundur dhe të sigurojë një marrëveshje.

“Ne kemi zgjedhje në Kosovë më 6 tetor, dhe ato do të mbahen në Serbi në pranverën e ardhshme. Ne do të kemi mundësinë që të vazhdojmë negociatat midis dy zgjedhjeve, të cilën duhet ta shfrytëzojmë. Shpresojmë që të dyja palët të shfrytëzojnë këtë mundësi”, është shprehur ai, duke shtuar se shpreson që Qeveria e re e Kosovës të pranojë të pezullojë tarifat ndaj produkteve serbe dhe Beogradi të ndalë lobimin tek shtetet e tjera për të tërhequr njohjen e Kosovës. /ABC News Albania 24/7

ambasadori-hill.jpg
nev ila15:12 | 25/05/2019

Në një intervistë për Deutche Welle, ish-ambasadori amerikan në Kosovë, Kristofer Hill u shpreh se ky është momenti i duhur që Europa të ndërhyjë për të zgjidhur çështjen mes Kosovës dhe Serbisë. Sipas tij, vendet europiane që nuk e kanë pranuar ende pavarësinë e Kosovës, kanë nga një problem të ngjashëm në territorin e tyre.

Ambasadori Kristopher R. Hill mendon se në çështjet midis Kosovës dhe Serbisë, ka ardhur moment i Europës. Në një intervistë për Deutsche Vele, Hill shprehet ndër të tjera se Kosova ka qenë një çështje historike me të cilën Shtetet e Bashkuara të Amerikës u morën më në fund në vitet 1998/99. Edhe pse dukej sikur ishte një problem që do të zgjidhej ditën tjetër, ai shton se nuk u kuptua historia që çonte tek problemi i Kosovës.

Ai theksoi se nëse flitet aktualisht me politikanët amerikanë, do të kuptohet se se janë duke u marrë me çështje si Korea e Veriut, Irani, Venezuela. Kosova nuk është në krye të çështjeve me të cilat merren.

Por, ambasadori Hill shprehet unë mendoj se Kosova mbetet një çështje që e bën Europën të mos jetë krejtësisht e lirë dhe në paqe. Prandaj është e domosdoshme të vazhdohet angazhimi për të normalizuar marrëdhëniet e Kosovës me fqinjët dhe për të siguruar. Që marrëdhëniet e Kosovës me Serbinë të jenë të tilla, që tu lejojnë të dy vendeve që të ecin përpara.

Duke komentuar idenë e korrigjimit të kufijve Hill thotë se kur flitet për territore flitet gjithnjë për emocione të thella; po ashtu flitet për precedentë në zona të tjera. Sipas tij këmbimi i territoreve është një gjë që duhet bërë kur nuk ka zgjidhje tjetër. Por nëse këmbimi territorial është një gjë për të cilën bied dakord të gjitha palët, atëherë ai duhet të përfshijë Akordet e Helsinkit të vitit 1975, të OSBE, sigurisht që mund të bëhet një përzierje, shton ai.

Duke iu rikthyer rolit të Shteteve të Bashkuara të Amerikës dhe Bashkimit Europian në këtë cështje, Hil thekson se që nga janari 2017 administrata amerikane i ndjek çështjet europiane duke patur qasje të njanshme. Ai u shpreh i shqetësuar që administrata e Trump ia ka lejuar këtë vetes, dhe në këtë lloj njëanshmërie është bërë e parëndësishme në çështje, që është rëndësishme për SHBA.

I pyetur në cilësinë e të dërguarit special për Kosovën dhe për punën shumë vjeçare në Ballkan, se cili është mendimi i tij për Kosovën, Hil shprehet qartë. Administrata e Obamës humbi kohë kot. Tani, administrata e Trumpit jo vetëm që po humbet kohë, por është krejt e painteresuar për disa nga këto çështje. Sipas tij Kosova do bënte gjënë më të mirë për njerëzit e saj, nëse bashkëpunon në rajon, krijon marrëdhënie të mira me fqinjët dhe kualifikohet si vend për tu pranuar në BE.

Mua më vjen shumë keq që në vitin 2019, ka ende 5 vende europiane që nuk e njohin Kosovën. E di pse-në, sepse secili nga këto vende ka Kosovën e vet. Jo vetëm Spanja, por ka edhe vende të tjera që kanë situata të ngjashme me Kosovën. Unë nuk e kuptoj si ka ndodhur kjo. Unë do të doja të shihja një Kosovë që doli e pavarur, si shtet i pavarur sepse njerëzit e saj donin të ishin të pavarur, por një shtet i pavarur duhet të pranohet nga fqinjët dhe nga e gjithë Europa”, përfundoi ai./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono