betimi

shameti.png
R D21:50 | 11/02/2020

Në seancën e neserme plenare pritet të miratohen ndryshimet ligjore për ceremoninë e betimit të anëtareve të Kushtetueses dhe Kryeprokurorit.  Kjo iniciativë u ndërmor nga mazhoranca pasi Presidenti Meta nuk thirri për tu betuar Arta Vorpsin e për pasojë ajo nuk arriti të bëhej anëtare e Gjykatës Kushtetuese, pavarësisht se mori një “leter betimi” tek noterja.

Për të folur për këto ndryshime ligjore, mbrëmjen e sotme është i ftuar në emisionin “Provokacija” deputeti i PS-së, Adnor Shameti.

Gjatë bisedës me Mustafa Nanon, ai theksoi se nuk do të ndryshohet Kushtetuta, por do të bëhen ndryshime në dy ligje organike ‘ligji për organizimin e Gjykatës Kushtetuese’ dhe ‘ligji për statusin e magjistratëve’ për të cilat duhet shumicë e cilësuar.

Shameti sqaroi me hollësi ndryshimet që pritet të votohen nesër në parlament:

“E drejta e ceremonisë së betimit, është e drejtë e Presidentit. Nuk do t’ia heqim këtë të drejtë. Ajo që kemi kaluar në Komisionin e Ligjeve dhe do të votohet nesër në seancë plenare, është një shtesë që parashikohet se nëse Presidenti nuk e ushtron këtë të drejtë brenda 10 ditëve, parashikohet që betimi i anëtarit të Kushtetueses të bëhet me shkrim dhe t’i niset Presidentit dhe Gjykatës. Pra e drejta e ceremonisë është e drejtë kushtetuese, ndërsa mënyra se si bëhet betimi do të rregullohet me ligjin organik”.

Sipas tij, kjo nuk bëhet për inate personale me Metën, por të zhbllokuar emërimet në këtë gjykatë.

“Nuk është personale me Metën, por është një nismë vetëm për të zhbllokuar emërimet në Kushtetuese që është detyrim i Bundestagut gjerman dhe pjesë e Reformës në Drejtësi. Këtë mekanizëm zhbllokues ne e kemi futur edhe në ligjin për statusin e magjistratit. Parashikojmë që edhe për Prokurorin e Përgjithshëm të bëhet e njëjta gjë si për anëtarët e Kushtetueses. Ceremonia e betimit për Prokurorin e Përgjithshëm bëhet nga Parlamenti, nëse parlamenti nuk e bën për 10 ditë, ai (kryeprokurori) e dërgon me shkrim aktin e betimit.

Këtë mekanizëm nuk e kemi shpikur ne por është sugjerim i Komisionit të Venecias që është dhënë për një rast të ngjashëm në Ukrainë. Ne këtë model kemi marrë si modelin më të mirë të zgjidhjes për të mos i lënë institucionet me vakanca. Sakaq ne presim mendimin e Komisionit të Venecias edhe për çështjen e Arta Vorpsit,. Kemi të parashikuar që në muajin mars të kemi marrë opinionin e Venecias për këtë rast”.

Gjatë bisedës, Nano e ngacmon Shametin duke i thënë se”Meta është president mistrec, se kështu e quan mazhoranca dhe unë do të thoja se është një president i keq, por çdo mazhorancë e ka për detyrë të merret me këtë president që e ka zgjedhur vetë. Por mendoj se nuk bëhet kështu duke i hequr kompetencat”.

Shameti përgjigjet se “në kushtetutë në ligj, akti i betimit është akt ceremonial dhe nuk cënon thelbin e gjësë. Do të doja shumë të mos kishim ardhur në këtë pikë, por i duhej prerë rruga këtij lloj bllokimi pavarësisht mistrecllëqeve të Presidentit (siç thoni ju)”. /abcnews.al

betimi-yuri-kim.jpg
nev ila21:21 | 09/01/2020

Yuri Kim bëri të enjten betimin si ambasadore e Shteteve të Bashkuara në Shqipëri.

Zonja Kim, u emërua nga Presidenti Donald Trump në qershor të këtij viti. Ajo ka thënë se do të nxisë udhëheqësit e Shqipërisë për të zgjidhur ngërçin aktual politik në mënyrë që të forcohet perspektiva e hapjes së negociatave të anëtarësimit në BE.

Këtë e ka njoftuar edhe ambasadorja e Shqipërisë në SHBA Floreta Luli-Faber përmes një postimi në rrejtet sociale.

“Betohet Ambasadorja Kim!

Ajo është tashmë zyrtarisht Ambasadorja e Shteteve të Bashkuara në Shqipëri!

Urimet më të mira dhe suksese në misionin tuaj, me bindjen se do kemi një bashkëpunim të frytshëm!”, shkruan Faber.

Zonja Kim ka thënë gjithashtu se do të inkurajojë Shqipërinë të zbatojë plotësisht reformat në drejtësi. Ajo është shprehur se sheh si përparësi edhe ndihmën teknike për Shqipërinë në hetimin, ndjekjen dhe ndëshkimin e korrupsionit dhe krimit të organizuar ndërnacional.

Zonja Kim pritet gjithashtu të inkurajojë Shqipërinë për të arritur nivelin 2 përqind në shpenzimet e mbrojtjes deri në vitin 2024.

Yuri Kim është gruaja e parë koreano-amerikane që përfaqëson SHBA në postin e një ambasadori dhe personi i parë nga territori amerikan i Guamit që shërben në një post të tillë. Ajo ka lindur në Kore dhe është rritur në ishullin Guam, një territor i SHBA në Oqeanin Paqësor.

Ajo ka shërbyer në Departamentin e Shtetit si Drejtore e Zyrës së Çështjeve të Evropës Jugore, ka qenë drejtoreshë e Qendrës së Departamentit të Shtetit për Studimin e Diplomacisë, Shefe e Stafit për Zëvendëssekretarin e Shtetit dhe Drejtore e Zyrës për Sigurinë Evropiane dhe Çështjeve Politiko-Ushtarake./VOA

ulsi-manja-per-presidentin.jpg
nev ila21:12 | 13/12/2019

Kuvendi do t’i miratojë në janar ndryshimet ligjore që lejojnë betimin me shkrim të gjyqtarëve, nëse Presidenti nuk i thërret për betim. Kryetari i Komisionit të Ligjeve, Ulsi Manja, thotë se kjo nuk është një masë për Ilir Metën, por për të gjitha rastet në të ardhmen.

PS e konsideron Arta Vorpsin Gjyqtare Kushtetuese, por Manja saktëson se këtë debat do ta zgjidhe vetëm kjo gjykatë kur të plotësohet.

Mazhoranca do të votojë një mekanizëm zhbllokues për betimet e gjyqtarëve, pas përplasjeve me Presidentin Ilir Meta. Kryetari i Komisionit te Ligjeve Ulsi Manja thotë se Presidentit i lihen 10 ditë kohë.

Por drafti pritet te pesoje ndryshime, duke saktësuar betimin me shkrim, eksperiment të cilin e bëri e para Arta Vorpsi.

Socialistët e njohin Arta Vorpsin si gjyqtare Kushtetuese, dhe pse nuk po i kryen këto funksione.

Një tjetër ndryshim që socialistet synojnë të miratojnë është, lejimi i KLGJ-së dhe KLP-së të procedojë gjyqtarët e prokurorët, derisa të ngrihet Inspektorati i Lartë i Drejtësisë.

Javën e ardhshme parlamenti nis pushimet e dimrit dhe këto ndryshime ligjore pritet të kalojnë në fillim të vitit të ardhshëm./abcnews.al

ILIR-META.jpg
ger ta17:26 | 10/12/2019

Partia Socialiste ka firmosur në Kuvend ndryshimet e dy ligjeve, që i vendosin afat Presidentit të Republikës për betimet në gjyqësor. Nëse Meta nuk i thërret brenda 10 ditësh, atëherë në ligj parashikohet betimi me shkrim. Propozimi vjen pas konfliktit mes Kuvendit dhe Presidentit, për  emërimin e gjyqtareve kushtetuese, Marsida Xhaferllari dhe Arta Vorpsit.

Deri më tani presidenti nuk ka pasur një afat për betimin e asnjë zyrtari. Kështu, socialistët e korrigjojnë ligjin, psh, për Gjyqtarët Kushtetues, duke tentuar të shmangin rastin e përplasjes për Marsida Xhaferllarin dhe Arta Vorpsin.

“Presidenti i Republikës organizon ceremoninë e betimit jo më vonë se 10 ditë nga data e zgjedhjes, emërimit ose shpalljes të emëruar të anëtarit të Gjykatës Kushtetutese. Nëse anëtari i Gjykatës Kushtetuese nuk thirret për të bërë betimin, pas përfundimit të këtij afati, ai kryen betimin në formë të shkruar  dhe ia dërgon atë Presidentit të Republikës, organit të emërtesës dhe Gjykatës Kushtetuese. Data e organizimit të ceremonisë së betimit ose data e dërgimit të betimit me shkrim, konsiderohet si dita e betimit dhe e fillimit të detyrës së gjyqtarit të Gjykatës Kushtetuese dhe përfshihet në dosjen e tij personale. Në rast se gjyqtari nuk pranon të bëjë betimin, mandati i tij përfundon”

Në ndryshimin e ligjit për Gjykatën Kushtetuese, ka edhe një nen, i cili duket se është shkruar për t’i dhënë mundësi Arta Vorpsit të hyjë në Gjykatën Kushtetuese, si anëtare në vend në Marsida Xhaferllarit.

“Gjyqtarët e zgjedhur, të emëruar ose të shpallur të emëruar, por që nuk kanë bërë betimin, me hyrjen në fuqi të këtij ligji betohen sipas rregullave të këtij ligji.”

Ndryshime propozohen dhe në ligjin për statusin e gjyqtarëve dhe prokurorëve, ku betimi për Gjykatësit e Lartë, Prokurorin e Përgjithshëm, apo Prokurorët specialëë të SPAK, betohen pranë Këshillit të Lartë Gjyqësor dhe atij të Prokurorisë brenda 10 ditësh.

Presidenti i Republikës, tha se nuk provokohej nga këto nisma të mazhorancës.

“Presidenti i Republikës nuk është në punë, nuk është tashmë as në detyrë, është në mision nuk provokohet nga cicmice të tilla, nga kushdo që i orkestron ato. Presidenti i Republikës, ka qenë, është dhe do të jetë garant i Kushtetutës së Republikës së Shqipërisë”, tha Meta./abcnews.al

06fe6efb-e909-484a-b959-acb881639498.jpg
ent ela22:30 | 14/11/2019

Janë betuar në Presidencë 3 gjyqtaret e reja për në Gjykatën Kushtetuese, Elsa Toska dhe Fiona Papajorgji, të cilat u votuan nga Kuvendi dhe Marsida Xhaferllari, e dekretuar nga kreu i Shtetit.

E para në Presidencë për të marrë detyrën e gjyqtares në Kushtetuese është betuar Elsa Toska. Ky është plotësimi i vakancës së parë të Kuvendit, që zëvendëson ish-gjyqtarin, Vladimir Kristo. Në Presidencë është betuar mbrëmjen e sotme, edhe anëtarja e re e Gjykatës Kushtetuese, Marsida Xhaferllari, e dekretuar nga kreu i Shtetit.

Ky është plotësimi i vakancës së dytë të Presidentit që zëvendëson ish-gjyqtaren, Altina Xhoxhaj. Ndërkohë që për të njëjtën vakancë KED, emëroi automatikisht gjyqtaren Arta Vorpsi, të betuar para noteres.

E treta në Presidencë është betuar gjyqtarja, Fiona Papajorgji, e cila plotëson vakancën e dytë të Kuvendit, duke zëvendësuar ish-gjyqtarin Bashkim Dedja. Presidenti Ilir Meta deklaroi se Gjykata Kushtetuese nga sot nis funksionimin.

“I lumtur që më në fund, pas dy vitesh, fillon sot nga funksionimi Gjykata Kushtetuese e Republikës së Shqipërisë! Urime tre anëtareve të reja të kësaj Gjykate!”, u shpreh Meta.

Në ceremoninë e betimit të tre gjyqtareve Meta ka ftuar edhe anëtarët e tjerë të Gjykatës Kushtetuese.

Të pranishëm kanë qenë edhe gjyqtarja Vitore Tusha së cilës i ka mbaruar mandati dhe pret të zëvendësohet, si dhe Besnik Muçi, i dekretuar nga kreut i Shtetit për t’u bërë pjesë e Gjykatës Kushtetuese, por që nuk ka ende një vendim përfundimtar për procesin e vetingut. Që Gjykata Kushtetuese të bëhet funksionale ka nevojë për 6 anëtarë. /abcnews.al

ab470f01-69b5-4a1a-bb45-1fb21795f6bf-1280x853.jpg
ent ela19:33 | 14/11/2019

Është betuar para Presidentit të Republikës Ilir Meta anëtarja e re e Gjykatës Kushtetuese, znj.Elsa Toska. Ceremonia e betimit u zhvillua sot në mbrëmje në Institucionin e Kreut të Shtetit.
Ky është plotësimi i vakancës së parë të Kuvendit që zëvendëson ish-gjyqtarin, z.Vladimir Kristo.


Duke vendosur dorën mbi Kushtetutën e Shqipërisë, gjyqtarja Toska u betua para Presidentit Meta se do t’i qëndrojë besnike kushtetutës gjatë kryerjes së detyrave të saj.
“Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë!”
Presidenti Meta i uroi shumë suksese dhe punë të mbarë në këtë detyrë shumë të rëndësishme. /abcnews.al

PRESIDENCA-ILIR-META.mpg_snapshot_06.19-1280x720.jpg
nev ila14:45 | 14/11/2019

Presidenti i Republikës Ilir Meta ka publikuar njoftimin mbi organizimin e ceremonisë së betimit të gjyqtarëve të rinj të Gjykatës Kushtetuese.

Kështu Presidenti ka thirrur në ceremoninë e betimit kandidatet Elsa Toska, Marsida Xhaferllari, dhe Fiona Papajorgji ditën e sotme në orën 19:00.

Presidenti Meta e ka përjashtuar Arta Vorpsin nga ceremonia e betimit të gjyqtarëve të rinj të Gjykatës Kushtetuese. Kjo e fundit u betua sot para noteres si anëtare e Gjykatës Kushtetuese.

Njoftimi i plotë: 

REPUBLIKA E SHQIPËRISË
INSTITUCIONI I PRESIDENTIT TË REPUBLIKËS

Nr. 4312/1 Prot.                                                                                                                                                                                              Tiranë, më 14.11.2019

NJOFTIM  

MBI ORGANIZIMIN E CEREMONISË SË BETIMIT TË GJYQTARËVE TË RINJ TË GJYKATËS KUSHTETUESE. 

Presidenti i Republikës, Sh.T.Z. Ilir Meta, në mbështetje të nenit 129 të Kushtetutës dhe nenit 8 të ligjit nr. 8577/2000 “Për organizimin dhe funksionimin e Gjykatës Kushtetuese”, të ndryshuar, ka vendosur të thërrasë sot për betim, përpara Presidentit të Republikës, anëtarët e rinj të zgjedhur të Gjykatës Kushtetuese.

  • Zonja Elsa Toska e zgjedhur anëtare e Gjykatës Kushtetuese me Vendimin nr. 133/2019 datë 11.11.2019 të Kuvendit të Shqipërisë, thirret për betim përpara Presidentit të Republikës, sot në datë 14.11.2019, ora 19:00.
  • Zonja Marsida Xhaferllari, e emëruar anëtare e Gjykatës Kushtetuese nga Presidenti i Republikës me Dekretin nr. 11350, datë 13.11.2019, thirret për betim përpara Presidentit të Republikës, sot në datë 14.11.2019, ora 19:30.
  • Zonja Fiona Papajorgji e zgjedhur anëtare e Gjykatës Kushtetuese me Vendimin nr. 134/2019, datë 11.11.2019 të Kuvendit të Shqipërisë, thirret për betim përpara Presidentit të Republikës, sot më datë 14.11.2019, ora 20:00.

Ceremonia e betimit zhvillohet në Institucionin e Presidentit të Republikës dhe për këtë ftohen të jenë të pranishëm dhe anëtarët e Gjykatës Kushtetuese dhe Sekretari i Përgjithshëm i Gjykatës Kushtetuese./abcnews.al

 

presidenca.jpg
nev ila11:16 | 14/11/2019

Reagon presidenca për betimin e Arta Vorpsit:

Institucioni i Presidentit ka reaguar sot në lidhje me veprimin e Arta Vorpsit, e cila bëri betimin si anëtare e Gjykatës Kushtetuese përpara noterit.

Përmes zëdhënësit Tedi Blushi, presidenca ka sqaruar se kreu i shtetit, nuk ndalon askënd të betohet, as tek noterja dhe as tek parukierja. Gjithashtu në reagim, thuhet se Presidenti Meta, është betuar me dorë në Kushtetutë, dhe se Shqipëria dhe shqiptarët janë të parët.

“Të dashur gazetarë,
Lidhur me pyetjet tuaja për një lajm qesharak që qarkullon në media, dua t’ju sqaroj se:
Presidenti i Republikës Sh.T.Z Ilir Meta nuk ndalon askënd të betohet as tek noterja, as tek parukierja.
Presidenti Meta është betuar me dorë mbi Kushtetutë dhe për të Shqipëria dhe shqiptarët janë të parët.“, thuhet në reagimin e zëdhënëist Blushi./abcnews.al

 

 

 

edi-rama-erion-brace-1280x717.jpg
nev ila18:10 | 11/11/2019

Pavarësisht votimit në Parlament, 3 gjyqtaret e reja të kushtetueses nuk fillojnë dot punë pa bërë betimin tek Presidenti Meta siç e parashikon Kushtetuta. Ky prodhon një ngërç të ri në marrëdhëniet e tensionuara mes palëve, ndërsa edhe me 5 anëtarë, Gjykata Kushtetuese nuk është tërësisht funksionale.

Gjykata Kushtetuese ka tashmë 5 anëtarë. Vitore Tushën, e vetmja që i mbijetoi vettingut, Besnik Muçin të dekretuar nga Presidenti, Arta Vorpsin të emëruar automatikisht përmes Fletores Zyrtare pas mos zgjedhjes brenda 30 ditëve nga Presidenti, si dhe Elsa Toskën dhe Fiona Papajorgjin, të zgjedhur së fundmi nga Kuvendi.

Por, tre të fundit, nuk mund të vijojnë punën pa bërë më herët betimin përpara Presidentit, siç neni 129 i kushtetutës përcakton.

Meta e quajti kontrabandë botimin në Fletoren zyrtare të emrit të Arta Vorpsit, ndërsa nuk bie dakord me radhën e votimeve nga Kuvendi.

Socialistët e shqyrtuan daljen nga kjo situatë në Këshillin e Legjislacionit, dhe propozuan alternativën, që, nëse presidenti nuk organizon ceremoninë e betimit, atëherë 3 gjyqtaret të betohen në Kuvend.

Por edhe nëse gjithçka shkon mirë, me 5 anëtarë, Gjykata Kushtetuese nuk është tërësisht funksionale. Marrjen e vendimeve kjo gjykatë e bën me 6 anëtarë, dhe me 5 gjyqtarë ajo mund të bëjë vetëm verifikime paraprake, për t’i kaluar apo jo çështjet në seancë.

Ligji për teatrin, apo vlefshmëria e zgjedhjeve të 30 qershorit janë çështjet e nxehta që presin shqyrtim, ndërsa “patatja e nxehtë”, shkarkimi i presidentit do të mbërrije brenda vitit në këtë gjykatë./abcnews.al

gov.jpg
ent ela11:02 | 05/09/2019

Pas formimit të qeverisë së re, kryeministri i Italisë Xhuzepe Konte është betuar për besnikëri ndaj republikës dhe kushtetutës para kreut të shtetit Serxho Matarela, në presidencë. Pas Kontes, u betuan 21 ministrat e qeverisë së re. Anëtarët e ekzekutivit u zhvendosën më pas në kryeministri ku mbahet ceremonia e marrjes së posteve dhe më pas mbledhja e parë e këshillit të ministrave.

Detaji që ra në sy gjatë firmosjes së marrjes së postit, ishte fakti se që kryeministri Konte përdori stilolapsin e tij personal dhe ajo atë që ishte mbi tryezë. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono