Loading ...
“Një relaksim i qëndrimit të presidentit amerikan Donald Trump ndaj luftës në Ukrainë është vënë re së fundmi, kryesisht për shkak të zhvendosjes së fokusit drejt krizës me Iranin”, kështu u shpreh ekspert i sigurisë dhe marrëdhënieve ndërkombëtare, Egon Loli gjatë një interviste në emisionin “War Report” në ABC News.
Sipas tij, pasi situata me Iranin ka marrë një drejtim më të qartë, Trump është shfaqur më i relaksuar edhe gjatë Samitit të G7, duke lënë të kuptohet për një qasje më pak të tensionuar ndaj konfliktit në Ukrainë.
Eksperti vlerësoi se mund të ketë hapësirë për zgjidhje të pjesshme politike, si nga vendet perëndimore ashtu edhe nga Ukraina, por theksoi se mbështetja ushtarake për Kievin mbetet thelbësore.
“Ukrainës i duhen ende armatime dhe mbështetje e vazhdueshme. Megjithatë, vijojmë të mbetemi përballë ndarjeve të mëdha të hemisferave të influencës”, deklaroi ai.
Në përfundim, eksperti e cilësoi situatën aktuale si “një frymëmarrje të shkurtër”, por paralajmëroi se palët janë ende larg ndërtimit të një platforme të qëndrueshme politike për zgjidhjen e konfliktit që vazhdon prej më shumë se tre vitesh.
