Ëndrra e tij është Real Madrid, por një deklaratë e Florentino Perez ia ka qartësuar gjithçka sulmuesit të PSG, Kylian Mbappe. Edhe këtë vit do të duhet të qëndrojë në Francë. “Mbappe duhet të presë. Nuk mund t’u kërkoj futbollistëve të mi ulje pagash dhe në krahun tjetër të bëjmë afrime të mëdha. Kjo nuk ka sens”, tha Perez pas fitimit të titullit kampion.
Tani ka qenë radha e vetë sulmuesit të flasë dhe qartazi e ardhmja e tij është vendosur, të paktën edhe për sezonin e ardhshëm. “Jam në Paris dhe dua të jem pjesë e projektit. Do të jem pjesë e PSG sezonin e ardhshëm dhe do të përpiqem të fitoj sa më shumë trofe që të jetë e mundur”, ka deklaruar kampioni i botës për BeinSports.
Më tej ai ka shtuar: “Jam në vitin e katërt të këtij projekti. Është një vit i rëndësishëm, pasi është 50 vjetori i klubit. Kjo është e rëndësishme në sytë e ekipit dhe të tifozëve, ndaj do përpiqem të bëj çmos që të fitojmë gjithçka”. PSG u shpall kampion sivjet, ndërkohë që është në garë për fitimin e Champions League. /abcnews.al
