“E kanë sjellë sipas gjatësisë”, Rama batuta me legjendën e futbollit për Kupën e Botës

I pranishëm në këtë event ishte edhe Kryeministri Rama i cili gjatë fjalës së tij përshëndetëse falënderoi organizatorët për këtë realizimin e këtij turneu. Bashkë me të ishte edhe ish-futbollisti legjendar i Arsenalit dhe kombëtares braziliane Grabiel Silva. Ky i fundit, kishte një surprizë për kryeministrin, që nuk ka lojë pa batuta.

“Po e kanë sjellë sipas gjatësisë”, tha Rama teksa mori në duar një model me përmasa të vogla të Kupës së Botës.

Në fjalën e tij, Rama falenderoi edhe ish-kapitenin e Kombëtares, Lorik Cana.

“Shikoj që mes të tjerësh këtu është kapiteni ynë i përhershëm i ekipit tonë kombëtar, Lorik Cana, se unë të them të drejtën nuk e di kush është kapiteni sot edhe kjo është për hir të së vërtetës përgjegjësi e Lorikut sepse Loriku ishte një i atillë kapiten që tani të gjithë ata që do e ndjekin nga pas do duken si kapiten të përkohshëm, njësoj si kupa e botës që është e Brazilit dhe shkon herë pas here në duar të tjera edhe shiriti i kapitenit të kombëtares është i Lorikut dhe tani shkon nëpër duar të tjera thjesht për arsye procedurale. Kështu që falenderoj shumë dhe Lorikun për praninë e tij këtu. Nuk dua të zgjatem më tutje. Uroj që gjithë miqtë që kanë ardhur së bashku me Gilberton të ndihen mirë në këto orë, të kalojnë një mbrëmje të këndshme në Tiranë. Ne jemi gati t’i mbajmë edhe për më gjatë, madje unë Gilbertos i thashë kur tha që tani jam ne Brazil, por po mendoj të kthehem në Europë, i thashë: një nga stacionet mund të jetë këtu se për momentin jemi duke u marrë me kupat e të tjerëve por mbase vjen dita ta fitojmë një kupë edhe ne, nuk i dihet, asnjëherë mos thuaj kurrë”, tha Kryeministri.

Ish-futbollisti Gilberto Silva, në fjalën e tij falenderoi kryeministrin Rama për mikpritjen, teksa tha se “kemi shijuar çdo minutë këtu në Shqipëri, ku kemi sjell Trofeun e origjinal të Kupës së Botës, që do të thotë shumë”.

“Nuk ka rëndësi nëse e kam parë dje dhe e shoh në të ardhmen trofeun por, ky moment për mua është shumë i veçantë duke qenë se e kam ndarë këtë moment me Kryeministrin Rama, përfaqësuesin e Coca Colës dhe të tjerë, sepse për mua kjo ka të bëjë me ëndrrën, frymëzimin”, tha ai.

Sipas tij, kjo vlen që të bëhesh më i mirë.

“Trofeu në fakt është diçka unike që frymëzon brezin e ri që të bëhet më i mirë në futboll e në jetë. Sepse futbolli ka fuqinë t’i bëjë njerëzit bashkë, për të mirën”, u shpreh Silva, teksa uroi që “që ky Trofe t’ju japë mundësinë për të ëndërruar dhe punuar fort”.

Kjo ndalesë e veçantë, e gjen Shqipërinë në kushtet e mikpritjes të finales së UEFA Conference League mes Romës dhe Feyenoord, më 25 maj, çka shënon organizimin e parë të një finaleje europiane në historinë e kombit shqiptar.