Dronë, kamera dhe aparatë, policia shton “forcat” në rrugë, kapen shoferët me shpejtësi deri në 152 km/h

Nisur nga fluksi i madh i automjeteve pas përfundimit të sezonit veror, policia ka vijuar kontrollet në disa zona të ndryshme të vendit me qëllim konstatimin e drejtuesve të automjeteve që shkelin rregullat e qarkullimit rrugor.

Gjatë kontrolleve me radar në rrugën Kavajë-Rrogozhinë dhe Kavajë-Durrës janë konstatuar automjete me shpejtësi deri në 152km/h. Si rezultat janë pezulluar 25 leje drejtimi.

Njoftimi i policisë

Kavajë/Kontrolle me radar në rrugën interurbane Kavajë-Rrogozhinë  e Kavajë –Durrës.

Kontrollet për të evidentuar dhe  ndëshkuar ata drejtues mjetesh që  qarkullojnë me shpejtësi mbi normat e lejuara  dhe kryejnë parakalime të gabuara, rrezik potencial për përfshirje në ngjarje rrugore me pasoja për jetën.

Në zbatim të detyrave dhe masave të përcaktuara në Planin operacional  për rritjen e sigurisë rrugore përgjatë sezonit turistik e në vijimësi, Policia Rrugore e Kavajës,  ka vijuar kontrollet intensive gjatë dy muajve të fundit duke përdorur radarin   në rrugën interurbane Kavajë-Rrogozhinë e Kavajë-Durrës, për të parandaluar shpejtësinë tej normave të lejuara, e cila është rrezik potencial për aksidente rrugore.

Gjatë kontrollit, në të dyja kahet e lëvizjes, gjatë  sezonit turistik janë konstatuar shpejtësi deri në 167 km/h në kulmin e fluksit shumë të shtuar.

Si rezultat i kontrolleve  intensive  vetëm javën  e  fundit  janë  pezulluar  25 leje drejtimi për shpejtësi tej normave të lejuara që varionin nga 129 km/h deri në 152 km/h.

Gjithashtu janë vendosur 102  masa administrative për shpejtësi dhe manovra në rrugë po pa sanksionin plotësues , si dhe janë vendosur 8 masa administrative maksimale me vlerë 40.000 lekë të rinj pasi drejtuesit e mjeteve ishin shtetas të huaj.

Drejtues mjetesh, qarkulloni brenda limiteve të lejuara që destinacioni juaj të jetë i sigurtë, mos fluturoni  se shpejtësia vret jetë.

Në të gjitha akset nacionale nga Rruga e Kombit deri në Sarandë e nga Korça në Berat si dhe në qendrat kryesore urbane ka patrulla të Policisë Rrugore me radarë, alkooltestues, dronë, kamera e aparatë fotografik.

m.v/abcnews.al