Loading ...Ish-drejtoresha e SHISH, Vlora Hyseni, iu vetëdorëzua autoriteteve shqiptare në pikën kufitare të Vërmicës, në Morinë. Ajo ndodhej në territorin kosovar, ndërsa në vazhdim u mor në dorëzim nga autoritetet shqiptare dhe u shoqërua drejt banesës së saj në Tiranë. Ndaj saj u ekzekutuan dy masat e sigurisë, “arrest në shtëpi” dhe “pezullim nga detyra”.
Gjykata e Posaçme firmosi dy masat e sigurisë për Hysenin, “pezullim nga detyra” dhe “arrest shtëpie”, si person që dyshohet nga SPAK se ka përkrahur një autor krimi dhe ka nxjerrë sekrete shtetërore.
Operacioni i Prokurorisë lidhet me fraksionin e ndarë për abuzimet me tenderat e AKSHI-t, çështje që po hetohet nga dy prokurorë.
Ndërkaq, dy masa shtrënguese “arrest në burg” u ekzekutuan nga Policia e Shtetit për Fatjon Kallucin, shef laboratori shkencor i Policisë, si dhe për Embro Suljemanin, administrator i një lokali në Durrës.
Përveç masave të sigurisë, shkalla e parë e gjyqësorit firmosi edhe disa masa kontrolli. Agjentët e BKH-së zbarkuan mëngjesin e së martës në banesën e ish-drejtorit të Përgjithshëm të Policisë së Shtetit, Ilir Proda.
Ky i fundit, pas kontrolleve, u shoqërua në SPAK për të dhënë deklarime në cilësinë e personit që ka dijeni. Kontrolle ka pasur edhe në ambiente të tjera, si dhe në zonën e Shkozetit në Durrës, me qëllim sekuestrimin e sendeve apo materialeve që mund të jenë me vlerë për hetimin që po kryen SPAK.
Për aferën e AKSHI-t po hetohen dhjetëra persona, mes të cilëve dy biznesmenët Ergys Agasi dhe Ermal Beqiraj, të dy të arrestuar, si dhe ish-drejtoresha Mirlinda Karçanaj dhe një grup biznesmenësh të tjerë të akuzuar për vepra të rënda penale.
