Sulmuesi i PSG-së, Kylian Mbappe, shkëlqeu mbrëmjen e djeshme në fitoren 4-0 kundër Montpellier. 22-vjeçari arriti të shënonte dy gola dhe dhuroi një asist, duke u rikthyer kështu në formën e tij më të mirë. Pas përfundimit të takimit ai u pyet sërish nga gazetarët mbi të ardhmen, por francezi kërkoi kohë për reflektim.
“Jam shumë i lumtur këtu, gjithmonë kam qenë. Tifozët dhe klubi gjithmonë më kanë ndihmuar. Do t’i jem gjithmonë mirënjohës klubit. Por, tashmë dua të mendoj për atë që dua të bëj në vitet e ardhshme, atje ku dua të jem. Po e mendoj tani dhe duhet të marrim një vendim së shpejti”, deklaron francezi.
“Vendimi im ka të bëjë vetëm me reflektimin. Unë nuk dua të nënshkruaj një kontratë dhe më pas të thëm se dua të largohem pas një viti. Jo! Nëse nënshkruaj është se dëshiroj të qëndroj dhe kjo kërkon reflektim. Nëse rinovoj, besoj do të qëndroj për një kohë të gjatë këtu”, përfundon Mbappe. /abcnews.al
