Haris Dilaver, sulmuesi i Vllaznisë, shënoi golin e fitores kundër Kastriotit dhe më së shumti i ka shijuar triumfi i skuadrës së tij. Për mediat, pas ndeshjes me krutanët ai tha: “Më vjen shumë mirë që shënova, më i gëzuar jam për ekipin. Që në fillim të sezonit kemi luajtur shumë mirë.
Sot ishte një ndeshje shumë e vështirë, sepse dhe ata kishin ardhur për të marrë pikës se s’bën. Të gjithë lojën e dominuam dhe në fund fituam”. Në lidhje me titullin kampion Dilaver shtoi: “Sigurisht që ne jemi në luftën për titull, kemi gjithë kohës që luajmë mirë dhe meritojmë që së paku të jemi në Kupat e Europës”.
Shënimi i golit normalisht e gëzon Dilaver: “Çdo lojtari i mungon goli dhe ka dëshirë të shënojë, por sidomos ne që jemi sulmues. E përsëris edhe njëherë, më vjen mirë për ekipin, që në fillim kemi dhënë maksimumin. Golin ia dedikoj ekipit. Një herë na ktheu shpinën fati, por sërish ia dolëm”.
