Loading ...
Departamenti Amerikan i Shtetit është detyruar të kërkojë falje pasi gjatë një prezantimi përpara konferencës ndërkombëtare AIDS 2026 u shfaq një hartë e Afrikës me gabime të shumta gjeografike, duke etiketuar në mënyrë të pasaktë disa shtete afrikane.
Sipas raportimeve, në hartën e prezantuar çdo vend i identifikuar ishte vendosur gabimisht.
Nigeria ishte zhvendosur në brendësi të kontinentit, Mozambiku ishte pozicionuar në veri të Ugandës, ndërsa edhe disa shtete të tjera ishin vendosur në vende të pasakta.
Pas reagimeve, Departamenti i Shtetit mori “përgjegjësinë e plotë” për incidentin dhe sqaroi se harta ishte përgatitur nga një anëtar i ekipit, i cili kishte bërë ndryshime me nxitim në materialet e prezantimit pak para zhvillimit të aktivitetit.
Raporti thekson gjithashtu se fotografitë e diapozitivëve përmbanin të dhëna që sugjeronin se materiali ishte krijuar duke përdorur teknologjinë OpenAI.
Emily Bass, eksperte e politikave për HIV-in, e cila ishte e pranishme në seancë dhe publikoi imazhet e prezantimit, deklaroi se gabimet nuk ishin thjesht teknike, por pasqyronin shqetësime më të gjera mbi mënyrën se si administrata amerikane po paraqet përpjekjet globale të SHBA-së në fushën e shëndetit publik.
