Loading ...
Aksionet e kompanive Tesla dhe SpaceX të Elon Musk kanë shënuar rënie, pasi Demokratët fituan kontrollin e Dhomës së Përfaqësuesve dhe Senatit të SHBA-së në zgjedhjet e mesmandatit të së martës.
Aksionet e prodhuesit të automjeteve elektrike Tesla ranë me 2,6 për qind deri në orën 10:30 sipas kohës lindore (15:30 GMT), ndërsa ato të kompanisë së raketave SpaceX shënuan rënie prej 2,1 për qind. Rëniet e mëhershme ulën pasurinë e vlerësuar të Musk-ut me më shumë se 60 miliardë dollarë.
Sipas gazetës Financial Times, Musk, një aleat i afërt i presidentit amerikan, Donald Trump, shpenzoi rreth 446 milionë dollarë në mbështetje të republikanëve në zgjedhjet e mesmandatit. Një pjesë e madhe e këtyre shpenzimeve shkoi në Teksas, ku kanë selinë të dyja kompanitë.
Dy kandidatët e mbështetur nga Musk humbën garat në nivel shtetëror në Teksas. Demokrati James Talarico mposhti republikanin Ken Paxton për të fituar një vend në Senat, ndërsa demokratja Gina Hinojosa mposhti guvernatorin republikan Greg Abbott.
Gjatë fushatës, Hinojosa bëri thirrje për ndalimin e ndërtimit të qendrave të reja të të dhënave, derisa ligjvënësit e shtetit t’u japin komuniteteve mundësinë të shprehen për vendndodhjen e këtyre objekteve.
Guvernatorja e zgjedhur kërkoi gjithashtu që operatorët të dëshmojnë se projektet e tyre nuk do të rrisin faturat e energjisë elektrike apo të ujit për banorët.
Në muajin korrik, Hinojosa deklaroi se qendrat e të dhënave “po konsumojnë gjithë ujin dhe gjithë energjinë elektrike”. SpaceX ka plane për të zgjeruar kapacitetet e qendrave të saj të të dhënave në kompleksin Starbase në jug të Teksasit.
Kontrolli i të dyja dhomave të Kongresit nga Demokratët mund të sjellë gjithashtu një mbikëqyrje më të rreptë nga ana e Kongresit ndaj çdo përpjekjeje të Musk për bashkimin e Tesla dhe SpaceX.
