Kreu i Shtëpisë së Bardhë Joe Biden ka akuzuar rrjetet sociale se informacionet e rreme rreth vaksinave që ato publikojnë, po vrasin njerëz dhe se pandemia aktuale është ajo mes personave të pavaksinuar.
Zëdhënësi i qeverisë amerikane për shëndetin publik, një ditë më parë i cilësoi informacionet e rreme për pandeminë si një kërcënim urgjent. Sipas tij shumë amerikanë refuzojnë të vaksinohen kundër Covid pikërisht prej këtyre lajmeve të rreme që publikohen në rrjetet sociale.
Shtëpia e Bardhë i ka kërkuar Facebook dhe platformave të tjera të rrjeteve sociale që të jenë më agresivë në heqjen e postimeve të dëmshme për vaksinat, duke filluar nga lajmi se vaksinimi shkakton sterilitet.
Facebook hodhi poshtë kritikat duke theksuar përpjekjet e grupit në betejën kundër dezinformimeve. Zëdhënës i Facebook, Deni Lever u shpreh se nuk do të merren me akuza të pabazuara. Ai shtoi se më shumë se dy miliard persona kanë parë informacione të rëndësishme për Covid-19 dhe vaksinat, në këtë platformë.
Lever shtoi se më shumë se 3.3 milion amerikanë kanë përdorur Facebook për të zbuluar ku dhe si mund të vaksinohen: Faktet tregojnë se Facebook po ndihmon në shpëtimin e jetëve, përfundoi ai.
Facebook nuk është aspak e vetmja kompani që është akuzuar se nuk ka marrë veprime kundër informacioneve të rreme, YouTube është kritikuar gjithashtu. Rreth 67.9% e të rriturve në SHBA kanë marrë një dozë të vaksinës, ndërsa 59.2% e të rriturve janë vaksinuar plotësisht./abcnews.al
