Sali Berisha doli i pari të reagojë publikisht për pezullimin e zgjedhjeve në Tiranë nga Gjykata Kushtetuese.
Nga selia blu, jo për të shpallur fitoren e PD, por të Erion Veliajt.
“Sot Gjykata Kushtetuese mori një vendim të cilin unë e përshëndes. Kjo nuk ishte fitore e PD, është fitore për çdo shqiptar. Për ta dërguar në Gjykatën Kushtetuese e çuan avoketërit e Erion Veliajt. Në këtë kontekst kjo ishte fitore e avoketërve të Erion Veliajt, pra e Erion Veliajt.”, tha Berisha.
E përshëndet, por nuk e mbron, sepse për doktorin Gjykata Kushtetuese nuk mbron dot as veten. Ai thotë se kjo është beteja e Ramës dhe Veliajt, kurse Kushtetuesja mbetet ajo që mbetet.
“Shiko, që ka patur vendime që Gjykata Kushtetuese, i ka mjerane, këtë nuk mund ta mohoj. Nuk ka mbrojtur veten. Por nëse Gjykata Kushtetuese vendos të mbrojë Kushtetutën, ne nuk kemi pse të mos e vlerësojmë.”, shprehet kreu i PD.
Sidomos kur relatore është nusja e shtëpisë. Por a do ketë shtyrje zgjedhjesh? Berisha e do, por nuk e beson. Ndaj dhe thotë gati për 9 nëntor.
“Ne nuk kërkuam asnjë ditë, asnjë orë kohë edhe për Bashkinë e Tiranës. Ishim të përgatitur, motorët po ndizeshin, kandidati po bënte përgatitje të ethshme. Për Tiranën do të punojmë çdo ditë, por natyrisht do të respektojmë edhe vendimin e Gjykatës Kushtetuese”, thotë Berisha.
/abcnews.al/
