Kryetari i PD Lulzim Basha deklaroi në Berat se vija e kuqe e opozitës për zgjidhjen e krizës politike është pastrimi i politikës nga krimi. Kryetari Basha ka ashpërsuar tonet duke paralajmëruar se ata që bëjnë pakt me kriminelët për vota, i pret burgu.
Ka dëgjuar thirrje nga brenda e jashtë vendit për tu rikthyer në parlament. Përgjigjen Lulzim Basha e dha nga Berati ku prezantoi platformën për çlirimin e politikës, zgjedhjeve dhe ekonomisë nga krimi.
Lulzim Basha, kryetar i PD: “Nuk ka për të patur asnjë lloj kompromisi pa pastruar politikën nga krimi. Kompromis me krimin nuk mund të bëjmë, ndaj u bëjmë thirrje të gjithëve, edhe atyre që bëjnë sikur nuk dëgjojnë se: kthim në parlamentin e lidhur me krimin nuk ka e nuk do të ketë”.
Kreu i opozitës tha se zgjidhja politike është aty. Gjithçka kërkojnë është i njëjti standard si ai që u miratua për prokurorët e gjyqtarët.
“I njëjti standard që Venezia rekomandoi për këta, i njëjti standard që bëri ligj për polciët dhe gardistët, i njëjti standard duhet të vleje për politikën. Kjo është vijë e kuqe për opozitën. Trajtim preferencial për politikanët nuk ka për të patur”.
Lulzim Basha artikuloi edhe një kusht tjetër për kapërcimin e krizës politike dhe që ka të bëjë me dekriminalizimin e zgjedhjeve.
“Ata që bëjnë pakt me kriminelët për vota, i pret burgu. Ky është kushti i dytë i panegociueshëm. Pa ndëshkuar krimin elektroal, pa ndëshkuar kryebashkiakët dhe ministrat që janë kapur duke bërë pakte me bandat, nuk mund të këtë kompromis me opozitën. Këta njerëz duhet të arrestohen! Duhet të jenë para drejtesisë, në burg! Ta mendojë mirë çdo politikan që pazari me bandat do ta çojë, jo në pushtet, por në burg”.
Një thirrje e ka edhe për ndërkombëtarët.
“Partnerët ndërkombëtarë të mos bëjnë sikur nuk dinë, nuk dëgjojnë e nuk shohin Nuk ka për te patur zgjidhje politke pa pastruar politikën nga krimi”.
Koha e deklaratave do të përfundojë së krimi vazhdon të jetë pjesë e politikës paralajmëroi kryetari i Partisë Demokratike.
“Pastrimi i politikës nga krimi shansi i fundit, në të kundërt, populli do të marrë në dorë fatin e tij”.
Apelin për të ngritur zërin kundër të keqes kryetari i Partisë Demokratike ia drejtoi edhe të rinjve të Beratit gjatë një bashkëbisedimi për problemet që i shqetesojnë.
“Diktatura më e egër në Europë u dorëzua përballë bashkimit të qytetarëve. Nuk ka nevojë për veprime heroike. Rëndësi ka të çohemi e të bashkohemi. Sikur vetëm rinia e Beratit të çohet, të jeni të sigurt se e keqja merr goditje vdekjeprurëse. Nuk ka mjaftueshëm pranga për të gjithë popullin, nuk ka mjaftueshëm policë për të gjithë popullin, nuk ka mjaftueshëm qeli për të gjithë popullin”.
Lulzim Basha iu tha të rinjve se Partisë Demokratike nuk i mungon as plani, as vizioni, as vullneti për ti kthyer çështjet e tyre në prioritet qeverisës./abcnews.al
