Brenda pak orëve në katër aksidente një 18 vjeçar humbi jetën, kurse gjashtë persona të tjerë mes tyre një fëmijë janë plagosur.
Një 18 vjeçar humbi jetën kur një Benz e përplasi në rrugë. Aksidenti automobilistik ndodhi në segmentin Çerravë – Pogradec. Djali po ecte në këmbë në rrugën e fshatit tij Çerravë dhe mjeti e mori para. Ai vdiq ne vend, kurse policia ndaloi drejtuesin nga Korça.
Në segmentin e “Transballkanikes” në qytetin e Vlorës nje tjeter aksident. Makina tip Benz që drejtohej nga një invalid, përplasi një burrë dhe një fëmijë, të cilët u plagosën dhe u dërguan në spital. Gjyshi me nipin po lëviznin me biçikletë në anë të rrugës.
Aksidenti i tretë ndodhi në Moglicë të Korçës. Një automjet i ngarkuar me dru kontrabandë doli nga rruga dhe u përmbys. Drejtuesi dhe pasagjeri morën plagë të rënda dhe u dërguan me urgjencë fillimisht në spitalin e Korçës. Por për shkak të gjendjes së rëndë u transportuan në spitalin e traumes në Kryeqytet.
Dy gra u plagosën në Xibrakë të Elbasanit nga përplasja e dy mjeteve. Dyshohet se mjeti tip Volkvagen ka dalë në krah të kundërt të lëvizjes dhe për pasojë goditi mjetin tjetër. /abcnews.al
