Loading ...
Tre persona humbën jetën këtë të enjte në jug të Holandës, mes tyre dy fëmijë dhe një i rritur, pasi një automjet përplasi një grup çiklistësh që po merrnin pjesë në një kamping të organizuar nga shkolla.
Autoritetet holandeze raportuan se 4 fëmijë të tjerë kanë mbetur të plagosur rëndë dhe janë dërguar për trajtim të specializuar shëndetësor në spitalet e zonës në Holandë, por edhe në Belgjikën fqinje.
Viktimat dhe të plagosurit ishin pjesë e një grupi prej 14 nxënësish dhe dy shoqëruesish të rritur, të cilët po merrnin pjesë në këtë kamping.
Policia ka nisur hetimet për të përcaktuar shkaqet e aksidentit, i cili ndodhi në një rrugë provinciale në një qytezë të vogël, rreth 200 kilometra në jug të Amsterdamit.
Drejtuesi i mjetit është arrestuar, ndërsa autoritetet nuk kanë dhënë më shumë detaje mbi shkaqet e aksidentit, duke theksuar se hetimet vijojnë.
Aksidente të tilla me përfshirjen e një numri të madh çiklistësh janë të rralla në Holandë, një vend ku biçikleta është pjesë e përditshmërisë dhe ku shumica e rrugëve janë të pajisura me korsi të dedikuara për çiklistët.
