Në emisionin “Pas Mesnate”, në ABC News kompozitori i njohur shkodran David Tukiçi erdhi me një rrëfim ndryshe. Larg kamerave e duartrokitjeve të spektatorëve, ai u ndal tek një etapë e hershme e jetës së tij.
Jemi mësuar që figurën e David Tukiçit ta shohim në sallat më të mëdha të operave kombëtare e ndërkombëtarë, duke korrur çmime e lavde, por gjithashtu duke dhënë një kontribut të jashtëzakonshëm në kulturën tonë shqiptare.
Gjatë rrëfimit të tij të sinqertë e mjaft të ndjerë kuptojmë që fati i tij ka qenë disi “i paracaktuar”. Ishte pikërisht i ati ai që zbuloi talentin e tij, që kur Davidi lindi, madje ai i vendosi emrin e një mikut të tij kompozitor duke thënë besimplotë: “Ai do të bëhet kompozitor dhe dirigjent”.
“Jam rritur me muzikën e Puçinit dhe unë e kam ëndërruar gjithmonë që dhe unë të kisha mundësi që të bëhesha kompozitor, por atëherë nuk e imagjinoja. Babai im e pa që unë kisha një talent dhe më futi në piano. Unë isha një çapkën djalë, luaja gjithë kohës me kalamajtë në lagje dhe babai im më shtyu pak. Madje dhe emrin ma vendosi të një dirigjenti dhe të një kompozitori. Dhe i tha mikut të vet, për miqësinë që kam me ty, unë djalit tim do ia vendos emrin David. Ai do të bëhet kompozitor dhe dirigjent. Unë studiova për 12 vjet piano dhe më çoi tek një mësuese italiane. U diplomova për piano, në atë kohë më çuan në Laç ku unë gjeta miq shumë të mirë, që sot u thërras edhe vëlla”, tregoi kompozitori David Tukiçi./abcnews.al
