Bundesliga ka nisur dhe kampionët e Gjermanisë zbritën në fushë dhe e nisën sezonin me një barazim 1-1 kundër Borussia M’Gladbach, në duelin debutues të trajnerit Julian Nagelsmann.
Sikurse zakonisht, kontrollin e lojës e patën bavarezët, por ata që shënuan të parët ishin vendasit, që me anë të Alassane Plea. Një thyerje aksioni në mesfushë u shfrytëzua prej tyre dhe sulmuesi nuk fali përballë Manuel Neuer.
Dhjetë minuta lojë dhe Bayern e pa veten në disavantazh. Reagimi ishte i menjëhershëm, me Robert Lewandowski që u shfaq rrezikshëm dhe iu afrua shumë golit.
Misionin e tij ai e kreu në fundin e pjesës së parë, pas një goditjeje këndi. Me një goditje “volej” polaku nuk fali dhe e çoi topin në rrjetë. 1-1, rezultat që u mbyll pjesa e parë dhe Lewandowski u mundua ta ndryshonte në 45 minutat e dyta.
Sulmuesi kishte mundësitë e veta, ndërkohë që edhe Borussia M’Gladbach rrezikoi. Në fund pati edhe një pretendim për penallti, por me ndihmën e VAR nuk u akordua dhe nuk pati ndryshim rezultati, duke bërë që skuadrat të merrnin nga një pikë. /abcnews.al
