“Boks” për një vend parkimi, Baldwin arrestohet në Nju Jork

Aktori amerikan Alek Bollduin është arrestuar në Nju Jork, nën akuzën se ka rrahur me grushte një person, pas një debati për një vend parkimi. Një zëdhënës i policisë lokale deklaroi se aktori u ndalua dhe iu komunikua akuza e agresionit. Kjo nuk është hera e parë që 60-vjeçari përballet me ligjin. Në vitin 2014, ai u arrestua për prishje të rendit publik. Bollduin është i njohur për interpretimin në filmin “Gjuetia për Tetorin e Kuq” dhe së fundmi për shfaqjet televizive në serialin “Thërti Rok” dhe “Setërdej Najt Llajv”. Agresioni për të cilin ai akuzohet ka ndodhur në zonën perëndimore të Manhatanit ditën e premte. Sipas policisë, një anëtar i familjes së tij kishte zënë një vend parkimi për Kadillakun e Bollduin, kur papritur një person tjetër ndërhyri me automjetin e vetë dhe e zuri hapësirën. Mes aktorit dhe personit tjetër nisi një sherr verbal që kaloi në shtyrje fizike dhe më pas në goditjen me grusht. Personi i lënduar, 49-vjeç, u dërgua në spital pas dhimbjeve në nofull. /abcnews.al