Manchester United është pjesë e klubeve themeluese të Superligës Europiane dhe si i tillë, ka hasur në kundërshti të mëdha të tifozëve dhe ish-lojtarëve të klubit. Gary Neville është më aktivi.
Mbrëmjen e djeshme ai reagoi ashpër ndaj drejtuesve dhe sot e bën sërish, akoma më direkt dhe troç. Ai kundërshton ashpër pronarët e klubit dhe shprehet se e kaluan cakun.
“Kur e morën Glazers klubin, nuk bëra zë. Mendova: Ok, do shoh ende futboll, Manchester United. Do marrin ca fitime, do e pranoj, nuk kam ç’bëj. Por tani këta e kaluan cakun, janë bërë hiena dhe këtë nuk mund ta pranojmë.
Ata që ishin kundër Glazers para 15 vitesh do thonë: Tani është vonë! Por nuk është vonë. Duhet të ngrihemi, t’i shporrim këta pronarë klubesh”, tregon Neville.
Në të njëjtën mënyrë reagoi edhe legjenda e Arsenal, Ian Wright, që çuditet me nivelin që ish-klubi i tij ka arritur. “E tmerrshme, ja sa poshtë kemi rënë si klub. Nuk fitojmë dot në fushë Premier League apo Champions dhe duam kompeticione të reja për të fituar para”, shprehet Wright. /abcnews.al
