Presidenti i Venezuelës është përfshirë nga polemika të ashpra për shkak të një darke të konsumuar në një restorant shumë të shtrenjtë në Turqi. Qytetarë të shumtë dhe lideri i opozitës, i cili jeton jashtë vendit, kanë kritikuar Maduron duke i kërkuar që të punojë për popullin që po vuan nga varfëria.
https://www.youtube.com/watch?v=F8A3pRy62rk
Duke u kthyer nga udhëtimi në Kinë, Nicolas Maduro, president i Venezuelës, vendosi të qëndrojë në Turqi për të darkuar me gruan e tij Cilia Flores në restorantin ‘Nusr-Et’ në Stamboll. Vendi është i famshëm për praninë e kuzhinierit të famshëm Nusret Gokce – i quajtur “Salt Bae” për mënyrën e tij të spërkatjes së mishit me kripë. Ai është i ndjekur në Instagram nga më shumë se 15 milionë persona.
Në video mund të shikohet presidenti i Venezuelës, ndërsa ushqehet me mish dhe tymos një puro me emrin e tij, përpara se të marrë dhuratë një bluze të personalizuar nga kuzhinieri turk. Pamjet filmike kanë shkaktuar polemika të shumta në Venezuelë, vend i cili është kapluar nga një krizë ekonomike shkatërruese.
“Ndërsa qytetarët në Venezuelë vuajnë dhe vdesin nga uria, Maduro dhe bashkëshortja e tij argëtohen në një prej restoranteve më të shtrenjtë të botës me paratë e vjedhura popullit të Venezuelës”.
Kështu shkruan lideri i opozitës, Julio Borges, i cili jeton jashtë vendit për shkak të frikës se mund të arrestohet./abcnews.al
