Shqipëria fitoi 0-1 përballë Andorrës, duke i nisur me fitore takimet eliminatore të Botërorit Katar 2022. Tre pikët kanë gëzuar trajnerin Edi Reja, i cili pret edhe më shumë në aspektin e lojës. Trajneri i kombëtares foli për Supersport, aty ku analizoi suksesin e sotëm dhe çfarë nuk funksionoi.
“Isha shumë i kënaqur në pjesën e parë, bëmë aksione të bukura. Mund të shënonim më përpara. Në pjesën e dytë vuajtëm rreth çerek ore, Andorra është një skuadër e vështirë, pasi të bën shumë presing dhe të krijon tension. Të kënaqemi më këto tre pikë, jam i kënaqur edhe me 0-1. Janë tre pikë të rëndësishme, të shohim përpara me besim.
Kemi luajtur me 5 lojtarë në fazën sulmuese, por duhet të kemi edhe karakteristika force, jo vetëm teknikë. Do shfrytëzoj në maksimum këtë grup, më pas do i jap hapësira edhe të rinjve. Kalendari është i ngjeshur, do përdor rreth 20 lojtarë në këto tre ndeshje. Të shohim nëse do të dalë ndonjë element.
Ishte e vështirë për sulmuesit tanë, Andorra luajti me 5 pas dhe nuk la hapësira. Zgjidhjet duhet të vijnë nga mesfushorët, duhet të krijojnë hapësira në situata të tilla. U përpoqëm në krah, sidomos në krahun e majtë me Lenjanin. Ishim më të pastër në krahun e majtë dhe disi më të pisët në krahun tjetër. Ishim pak efikas në sulm, por ishte ndeshja e parë në një fushë të vështirë dhe t’i gëzohemi tre pikëve.
Do isha shumë i kënaqur nëse do të luanim gjatë gjithë ndeshjes me Anglinë siç luajtëm sot në 45 minutat e para. Nuk është hera e parë që ndodh të godasim vonë portën. Nuk na ka ndodhur vetëm ne, loja hapet nëse shënon shpejt, brenda 10-15 minutave të para, kundërshtari hapet më pas. E sigurt që duhet të bëjmë më mirë, nuk luajtëm shumë futboll në pjesën e dytë. Disa pasime dhe topa të gjatë, goditëm portën vetëm me Brojën, është fare pak.
Rezervim për t’u ruajtur me Anglinë? Mund të ketë ndodhur, nuk e mohoj, por në mbrojtje nuk u kursyem. Të tre mbrojtësit zhvilluan një ndeshje të shkëlqyer, shyqyr që ata nuk u kursyen. Mund të ketë diçka kur luan pas tre ditësh me Anglinë, por nuk do të thotë që nuk duhet të shtysh përpara pse je në avantazh 1-0“, përfundoi Reja. /abcnews.al
