Liverpool është shpërfytyruar totalisht në kampionat. Deri pak muaj më parë ishte e pamundur të merrje pikë në “Anfield”, teksa kampionët e Anglisë regjistruan sot humbjen e gjashtë radhazi në stadiumin e tyre.
Fulham fitoi 0-1 përballë “The Reds”, të cilët kanë humbur shumë nga shkëlqimi i sezonit të kaluar. Të flasësh pas një humbje të tillë është e vështirë, teksa Jurgen Klopp analizoi paraqitjen negative të djemve të tij.
“Sigurisht që nuk luajtëm një ndeshje të mirë. Pësuam gol, nuk ia dolëm të shënojmë dhe humbëm. Asgjë nuk shkoi siç duhet. Kemi modifikuar disi stilin tonë të lojës dhe duhet kohë për t’u përshtatur me dinamika të reja.
Gjithçka bëhet më e vështirë kur ke përballë një Fulham që ndodhet në formë të mirë dhe po luan një futboll të bukur. Krijuam disa raste për gol, por nuk ia dolëm të dërgonim topin në rrjetë. Më pas u goditëm kur s’e prisnim“, theksoi trajneri gjerman. /abcnews.al
