Jurgen Klopp
Vladimir Prenga10:39 | 31/03/2020
Philippe Coutinho do të ndryshojë ekip këtë verë, pasi Bayern Munchen nuk do ta ushtrojë të drejtën për ta blerë mesfushorin e avancuar që është nën kontratë me Barcelonën. Katalanasit nga ana tjetër duan ta shesin me çdo kusht, në mënyrë që të përfitojnë financiarisht.
Menaxheri i Coutinho ka nisur nga puna dhe po synon t’i gjejë ekip sa më shpejt brazilianit. Sipas gazetarit të Mundo Deportivo, Francesc Aguilar, së fundmi fantazisti i është propozuar anglezëve të Liverpool, por trajneri Jurgen Klopp nuk e ka në planin e tij Coutinho.
Gjermani nuk e preferon brazilianin, ai do një anësor tipik, si Ousmane Dembele. Ndoshta mund të tentohet edhe francezi, nëse Barcelona do t’i ulë pretendimet për kartonin e sulmuesi të blerë nga Borussia Dortmund për 120 milion euro. /abcnews.al
Igli Nikolli12:18 | 29/03/2020
Është e vështirë të thuash se kush është trajneri më i mirë në botë, por për atë që zgjedh Jurgen Klopp nuk mund të thuhet që ka gabuar. Gjermani i Liverpool është unik, një tip shumë karizmatik dhe futbolli i skuadrave të tij është spektakolar. Karrierën e trajnerit e nisi te Mainz.
Klopp ia doli të ngjiste klubin e vogël gjerman në Bundesligë për herë të parë në histori (sezoni 2003-2004). Historia më pas dihet, me sukseset e arritura te Borussia Dortmund dhe Liverpool. Trajner portierësh te Mainz ishte Stephan Kuhnert, me të cilin kishte luajtur si futbollist dhe kishte një miqësi të madhe.
“Më duhet të them që e njoh shumë mirë. Kam pasur gjithmonë një lidhje të veçantë me Jurgen. Askush nuk krahasohet me të në aspektin e emocioneve që përjeton dhe arrin t’i transmetojë skuadrës. Kjo dallohet lehtë nga raporti që krijon me lojtarët. Edhe futbollisti i 20-të i skuadrës ndihet i rëndësishëm”, deklaron Kuhnert për Goal.
Dikur ndodhi diçka aspak e këndëshme. Klopp u tërbua, nuk bëhej më fjalë për qetësi dhe ofendimet ndaj mikut të ngushtë nuk kishin fund. Kuhnert e mban mend mirë atë moment, nis e buzëqesh dhe fillon e tregon ngjarjen në kufinjtë e absurdes. “Duhet të shkonim në Schützenfest (një festë gjermane). Ishte larg, por zgjodhëm të niseshim me biçikleta.
Bëmë një udhëtim të gjatë përgjatë rrugëve të shkreta. Po errësohej dhe kur mbërritëm në destinacion, lexuam një tabelë ku shkruhej se festa do të zhvillohej javën pasardhëse… Kisha gabuar datë, ishte i gjithi faji im. Klopp më shplau me ofendime gjatë gjithë kthimit. E meritoja, por ai nuk pushoi asnjë moment së më ofenduari”, deklaron Kuhnert. /abcnews.al
Igli Nikolli20:06 | 27/03/2020
Koronavirusi nuk po ndalet dhe akoma nuk e dimë se kur do të marrë fund i gjithë ky tmerr. Mijëra njerëz po vdesin, e të tjerë po përjetojnë një dhimbje të madhe. Çdo vend është prekur dhe po lufton me këtë virus të çmendur.
Jurgen Klop vlerëson shumë punën e mjekëve, të cilët janë në rresht të parë në këtë betejë botërore. Trajneri i Liverpool i falënderon ata nëpërmjet një komenti për sajtin e klubit dhe zbulon momentin ku nuk i mbajti dot lotët.
“Më dërguan një video të disa mjekëve në spital. Po kryenin terapi intensive me të sëmurët dhe këndonin “You will never walk alone”. Nisa të qaja, ishte diçka e jashtëzakonshme. Është e pamundur të mos i admirosh ata njerëz. Jo vetëm që po punojnë, por kanë edhe një shpirt të madh. Janë mësuar të ndihmojnë të tjerët dhe e vendosin veten në rrezik për të ndihmuar të sëmurët”, deklaron trajneri gjerman i “The Reds”. /abcnews.al
Yesterday, radio stations in over 31 countries simultaneously played “You’ll Never Walk Alone” to show solidarity in the battle against coronavirus
Doctors and nurses in the Netherlands danced together as the song played with ambulance drivers on the other side of the glass pic.twitter.com/nG5epnEI5A
— Zack Guzman (@zGuz) March 21, 2020
Igli Nikolli15:17 | 26/03/2020
Liverpool ka lojtarë të mëdhenj në përbërje, por shpirti i skuadrës angleze është Jurgen Klopp. Trajneri gjerman është unik dhe ia del gjithmonë t’i japë karikimin e motivimin e duhur djemve të tij në dhomat e zhveshjes.
Gjithsesi, ka raste kur batutat e tij nuk kuptohen nga futbollistët. Mbrojtësi i “The Reds”, Joel Matip rrëfen për 11freunde se lojtarët hutohen ndonjëherë nga shprehjet e Klopp, duke sjellë edhe shembuj.
“Ka raste kur Jurgen thotë: ‘Nuk ishte fiks si e verdha e vezës’, që do të thotë ‘Nuk ishte diçka brilante’. Vetëm ndihmësi i tij dhe unë, nisim e qeshim. Shokët e mi mbesin hutohen komplet, nuk dinë çfarë të mendojnë dhe shumë herë jam unë që u shpjegoj kuptimin”, deklaron Joel Matip. /abcnews.al
Vladimir Prenga10:39 | 19/03/2020
Ciro Immobile ka vendosur të flasë me fansat përmes rrjeteve sociale. Sulmuesi i Lazio, shënuesi më i mirë në Serie A deri në momentin e pezullimit të kampionatit, ka analizuar trajnerët e tij të mëparshëm dhe vlerëson shumë teknikun aktual të Liverpool, Jurgen Klopp. Me të ka punuar u transferua te Borussia Dortmund.
“Emery është një trajner shumë taktik, më kujton pak Antonio Conte-n në mënyrën se si i përgatit ndeshjet. Klopp ishte totalisht ndryshe. Seancat e tij stërvitore ishin të lidhura vetëm me topin, ishte gjithë kohën në lëvizje, asnjë moment nuk qëndroje në vend.
Më ka dhënë shumë në karrierën time. Inzaghi, padyshim që është më italian në stilin e tij, por e balancon me anën teknike. Punohet shumë me topin në seancat e tij, por duhet shumë përqendrim tek ana taktike”, është shprehur sulmuesi.
Immobile ka edhe dëshira dhe ajo është të shkëmbejë fanellën me Lionel Messi, të cilin e ka takuar dhe zbulon një pjesë të bisedës së bërë me të: “Do të doja të shkëmbeja fanellën me një lojtar si Messi. Me Ronaldon e kam bërë diçka të tillë pas njërës prej ndeshjeve me Juventusin.
E kam takuar Messin dhe kemi bërë një fotografi së bashku, edhe pse ai nuk po luante kur Italia kishte një miqësore me Argjentinën. Biseduam për djalin e tij dhe e pyeta atë pse e kishte quajtur atë Ciro”. /abcnews.al
Igli Nikolli16:12 | 14/03/2020
Liverpool zhvilloi një ndeshje shumë të mirë kundër Atletico Madrid, por skuadra e Jurgen Klopp u dorëzua në shtesa. Spanjollët përmbysën rezultatin, fituan 2-3 në shtesa dhe u kualifikuan në çerekfinaket e Champions League.
Trajneri gjerman akuzoi Atleticon për lojën mbrojtëse, por Klopp ka përfunduar nën shënjestrën e anglezes The Times, që nuk i pranon kritikat e Klopp, e qorton atë dhe futet në analizë taktike.
LEXO EDHE: Shfryn Jurgen Klopp: Nuk e kuptoj si Atletico bën këtë lloj futbolli!
“Nuk është faji i Simeones nëse Joao Felix u gjend i lirë në mes të fushës pas gjuajtjes së Lodit, nuk është faji i Simeones nëse Henderson e lejoi Llorente t’i afrohej zonës. A nuk duhej që Alexander-Arnold të largonte topin më vend që t’ia pasonte Adrian, i cili nuk është aq i sigurt sa Alisson? Klopp mund të mos e pëlqejë atë që simbolizon Atletico Madrid, por ka gjëra që Liverpool duhet t’i mësojë nga rivalët”, shkruan gazeta e njohur. /abcnews.al
Klejdi Kaimi16:11 | 12/03/2020
Coronavirusi tashmë ka mbërthyer gjithë globin. Frika ndaj tij është reale dhe secili nga ne duhet të tregohet më i kujdesshëm. Këtë gjë ka bërë dhe trajneri i Liverpool, Jurgen Klopp, mbrëmjen e djeshme në duelin kundër Atleticos.
Përpara fillimit të takimit, në momentin kur lojtarët futen në fushë për të bërë nxehmjen ka hyrë dhe gjermani. Në tunelin që të çon në fushë teknikut i janë zgjatur shumë duar nga tifozë për ta takuar atë.
Reagimi i Klopp ka qenë shumë i ashpër ndaj tyre, duke mbajtur gjatë gjithë kohës duart në xhepat e xhupit të tij. ‘’Largojini ato dreq duarsh’’, ishin fjalët që Klopp iu drejtua tifozëve. Një veprim shumë i mirë nga ana e tij, e cila parandalon përhapjen e virusit vdekjeprurës. /abcnews.al
Now is NOT the time to be asking for high-fives, guys 😬 pic.twitter.com/UNwfQTC9oz
— Football on BT Sport (@btsportfootball) March 11, 2020
Vladimir Prenga09:13 | 12/03/2020
Jurgen Klopp nuk është ndjerë mirë pas eliminimit nga Champions League. Liverpool e dorëzoi kurorën shumë shpejt, pasi Atletico Madrid i mposhti me rezultatin 2-3. “The Reds” triumfuan 1-0 në kohën e rregullt dhe ndeshja shkoi në shtesë.
Skuadra e Klopp madje realizoi edh golin e dytë, por më pas Atletico Madrid përmbysi gjithçka me Llorente (2 gola) dhe Morata. Gjermanin e habit shumë mënyra e lojës që bëjnë spanjollët e drejtuar nga Diego Simeone dhe e thotë hapur diçka të tillë.
“Nuk e kuptoj pse Atletico këtë lloj futbolli me kualitetin që kanë. Ata mund të luajnë futbollin e duhur. E kuptoj që jam një humbës i keq, veçanërisht kur djemtë përpiqen kundër lojtarëve të klasit botëror që mbrojnë me dy rreshta me nga katër lojtarë. Ata as kundërsulme nuk kishin. Gjithsesi jam shumë krenar për djemtë”, tha gjermani pas ndeshjes. /abcnews.al
Veronik Istrefaj17:41 | 10/03/2020
Liverpool dhe Atletico Madrid do të ndeshen nesër në orën 21:00 në “Anfield Road”, sfida e kthimit e Champions League. Në Spanjë, Atletico triumfoi 1-0 ndeshjen e parë, falë një goli të Saul që në minutën e katërt.
Klopp ka dalë në konferencë për shtyp sot para sfidës së kthimit, duke lëshuar një akuzë të rëndë ndaj rivalit. “Atletico përdori magjinë e zezë në ndeshjen e parë dhe në Anfield, nuk duhet ta lejojmë kurrsesi këtë gjë.
Simeone ka një skuadër cinike. Kur një lojtar i yni bënte një ndërhyrje jo të gabuar, sërish ndëshkohej… Uau! Lojtarët e Atleticos përplaseshin te lojtarët e mi dhe merrnin faull, ne merrnim kartonë. Kjo gjë nuk duhet të ndodhë.
Shpresoj që të gjithë lojtarët e mi të qëndrojnë në fushë për 90 minuta. Gjithashtu, shpresoj që arbitrimi të jetë korrekt dhe të shohë gjithçka, në çdo moment, çdo episod. Do të na duhet të luajmë si trima, të bëjmë një futboll më të shpejtë për të fituar. Do të jetë një atmosferë tjetër në Anfield, padiskutim, dhe lojtarët do të kenë motivimin e duhur për tu kualifikuar”, tha mes të tjerash Klopp./abcnews.al
Igli Nikolli16:40 | 06/03/2020
Tre humbje në katër ndeshjet e fundit janë shumë për një skuadër si Liverpool, por nuk është momenti për panik. Gjithsesi, humbja ndaj Chelsea dhe eliminimi nga FA Cup e ka mërzitur Jurgen Klopp.
Trajneri gjerman po fillon të humbasë durimin dhe ka reaguar ndaj lojtarëve të skuadrës së tij. Ai zgjodhi Takumi Minamino si titullar në majë të sulmit, por lojtarët e tjerë u treguan egoistë me japonezin. The Sun sjell fjalët e Klopp, i cili ka folur troç përpara lojtarëve të tij.
“Skuadra duhet ta shfrytëzonte Minaminon. Takumi zhvilloi një ndeshje pozitive, por shokët nuk i shërbyen si duhet. Duhet të shfrytëzonim më mirë karakteristikat e tij, duhet t’i pasonim topin dhe të përfitonim nga freskia e tij.
Nëse Neco (Williams) do t’i kishte shërbyer, ndoshta gjërat do të merrnin një tjetër rrjedhë. Kishte dy raste që Takumi ishte i lirë në zonë, nëse Neco do ta kishte parë dhe do t’i kishte pasuar topin, ndoshta do të kishim përfituar“, ishin fjalët e Klopp në analizën e humbjes. /abcnews.al
ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.
NUIS/NIPT K01711004FKontaktTelefono
07:12 | 01/04/2020
07:04 | 01/04/2020
23:43 | 31/03/2020
