Policia britanike në Devon dhe Cornwall ka shpërndarë listën e kriminelëve më të kërkuar të cilët janë në arrati. Në të bën pjesë edhe një shqiptar, i cili kërkohet për trafik droge në Beaumont Road të Plymouth-it.
Bëhet fjalë për Ferbent Sakajn, 32-vjeç. Ai njihet ndryshe me emrin grek Giannis Papas.
Autoritetet britanike thonë se janë duke ndjekur një sërë pistash për të gjetur vendondodhjen e tij dhe synojnë ta arrestojnë menjëherë sapo të lokalizohet. Ai ka lidhje në zonat Kingswinford, Birmingham, Wood Green, Barnet dhe Maidstone.
Sakaj ka flokë të shkurtër, të zinj dhe mundësisht mban edhe mjekër. Ai ka trup të palestruar njoftojnë autoritetet britanike, duke u kërkuar informacione njerëzve që e kanë parë në mënyrë që ta kapin shqiptarin.
Në kërkim janë shpallur edhe disa persona të tjerë me kombësi të ndryshme për krime si vrasje, përdhunim, mashtrim dhe sulm ndaj punonjësve të policisë./abcnews.al
