Joao Felix erdhi te Atletico Madrid për plot 127 milionë euro nga Benfica në verën e vitit të shkuar, teksa presioni i madh duket se e dëmtoi dhe në sezonin e parë vuajti për të ardhur në formë.
Në edicionin aktual talenti portugez ka ardhur në formë të mirë dhe po shënon rregullisht. Para ndeshjes së nesërme me Chelsean ai foli për Ronaldon dhe Mbappe e Haaland.
“Cristiano Ronaldo ka ndikim të madh tek unë, kur jemi në ekipin kombëtar ai gjithmonë përpiqet të më ndihmojë dhe u jep të gjithë të rinjve këshilla për punën, ai na motivon. Kaka ishte referenca ime e parë në futboll. Unë shikoja videot e tij dhe nganjëherë përpiqesha të kopjoja lëvizjet e tij, u përpoqa të luaja si ai.
Ne gjithmonë flasim për çmimin tim, por unë e kam harruar atë shumë. Ndonjëherë është e vështirë, por përpiqem të jetoj me të në mënyrën më të mirë.
Shpresoj të arrij atë nivel. Cristiano dhe Messi kanë arritur një nivel, që asnjë lojtar tjetër nuk e ka arritur më parë. Mbappe dhe Haaland janë në rrugën e duhur. Unë dua të bëj të njëjtën gjë.
Më parë kishte vetëm Real Madrid dhe Barcelona, por Atletico ka provuar të jetë një klub i shkëlqyer dhe mund të konkurrojë me ta. Champions League është një motiv për ne. Flitet më shumë për Real Madridin dhe Barcelonën, por ne po kalojmë një sezon të shkëlqyer”, u shpreh Felix. /abcnews.al
