Një dygolësh i të përhershmit Robert Lewandowski, i dhuroi Bayern Munchen suksesin 2-0 ndaj Al Ahly dhe kualifikimin në finalen e Botërorit për Klube. Rekordmenët gjermanë do të diskutojnë trofeun e madh kundër Tigres.
Kampionët e Meksikës eliminuan Palmeiras në gjysmëfinale. Portieri i Bayern Munchen, Manuel Neuer ka kujtime të trishta nga Meksika, që i shkaktoi humbjen dhe ndikoi në eliminimin në grup të Gjermanisë në Botërorin e fundit.
“Nuk e harroj ndeshjen kundër Meksikës në Rusi 2018, një kujtim aspak pozitiv. Finalja ndaj Tigres është edhe më e rëndësishme. Ne duam ta fitojmë këtë përballje. Të shkruash historinë është një gjë e veçantë.
Ne duam të lëmë shenjën tonë duke fituar trofeun e gjashtë“, thekson “gardiani” dhe kapiteni i Bayern Munchen. Finalja e madhe e Botërorit për klube do të luhet të enjten, duke filluar prej orës 19:00. /abcnews.al
