Fitorja e Superkupës së Italisë i ka bërë mirë Juventusit. Bardhezinjtë zbresin në fushë nesër (e diel, 12:30) dhe përballë do të kenë Bolognan. Andrea Pirlo ka folur për mediat përpara duelit shtëpiak në kampionat, duke dhënë edhe një koment në lidhje me merkaton e dimrit.
“Fitorja e Superkupës na ka dhuruar shumë entuziazëm, por fitimi i një trofeu nuk ndryshon asgjë. Ne duam të fitojmë trofe të tjerë. Për titullin do të ketë një garë mes 5-6 skuadrave, por në këtë moment është Milani skuadra për t’u mundur.
Jemi disi të lodhur, por jemi përgatitur mirë për sfidën me Bolognan. Jemi gati për takimin e nesërm. Chiellini? Giorgio vjen nga një periudhë e gjatë pa luajtur, por sakrifikoi dhe ia doli ta luante të plotë ndeshjen me Napolin.
Merkato? Jam i kënaqur me kontingjentin që kam në dispozicion, nuk kam nevojë për përforcime. Jemi të qetë me lojtarët që kemi, edhe pse në pjesën e parë të sezonit jemi prekur shumë nga dëmtimet“, theksoi trajneri i kampionëve të Italisë. /abcnews.al
