Drejtoria e Qytetit Studenti dhe Rezidencat 1 dhe 2 përmes një njoftimi kanë sqaruar studentët të cilët kanë kryer pagesat për konviktet, se detyrimi i paguar i nëntorit do të mbartet në dhjetor.
Ky sqarim vjen pas mbylljes së Universitetit dhe Konvikteve si masë parandaluese për përhapjen e koronavirusit nga Komiteti Teknik i Ekspertëve.
Njoftimi:
Konviktet/ Drejtoria e QS dhe Rezidencat 1 dhe 2 qetësojnë studentët: “Pagesat e nëntorit mbarten në dhjetor”
Asnjë student nuk duhet të shqetësohet për vendet e rezervuara në godinat e konvikteve në Tiranë, pas vendimit për zhvillimin e mësimit online gjatë muajit nëntor, për shkak të masave të reja për parandalimin e përhapjes së Covid-19. Drejtoria e Qytetit Studenti, Rezidenca Studentore Universitare 1 dhe Rezidenca Studentore Universitare 2, përmes një njoftimi zyrtar, qetësojnë çdo student që ka kryer rezervimin për qëndrimin gjatë vitit akademik 2020-2021 në Qytetin Studenti dhe konviktet e Inxhinierisë dhe Mjekësisë, se me rihapjen e konvikteve të gjithë studentët e regjistruar do të vijojnë frekuentimin në konvikte sipas kontratave të nënshkruara.
“Duke marrë shkas nga vendimi i Komitetit Teknik të Ekspertëve për zhvillimin e mësimit në universite online gjatë muajit nëntor dhe mbylljen e konvikteve, ju njoftojmë se: Të gjitha regjistrimet aktuale në konviktet e Qytetit Studenti, për sezonin arsimor 2020 – 2021, do të jenë të vlefshme. Ky vendim nuk prek regjistrimet dhe si i tillë, asnjë prej tyre nuk do të anulohet. Me rihapjen e konvikteve, të gjithë studentët aktualë do të vijojnë frekuentimin në konvikte sipas kontratave të nënshkruara,” thuhet në njoftimin publik.
Po ashtu, është vendosur që çdo pagesë e kryer për muajin nëntor, kur do të nisë edhe viti i ri akademik, do të mbartet për muajin dhjetor.
“Pagesa e tarifës për muajin nëntor, për ata studentë që nuk do ta marrin shërbimin, do të jetë e mbartur për muajin dhjetor,” thekson deklarata.
n.d./abcnews.al
