Marrëveshja në Maqedoninë e Veriut, Bushati: Kontribut i pazëvendësueshëm, arritje e merituar!

Ish ministri i jashtëm Ditmir Bushati ka reaguar në lidhje me arritjen e marrëveshjes Zaev-Ahmeti për krijimin e qeverisë në Maqedoninë e Veriut.

Përmes një statusi në rrjetet sociale Bushati shkruan se shqiptarët në Maqedoninë e Veriut kanë qenë në ballë të proceseve tona kombëtare dhe se kontributi i tyre është i pazëvendësueshëm.

Sipas Bushatit përfaqësimi në parlament dhe marrja e përgjegjësive në të gjitha nivelet e qeverisjes është garanci për përmbushjen e të gjitha pikave të Deklaratës së Përbashkët të Partive Politike Shqiptare, të 7 Janarit 2017.

Postimi i plotë:

Pas rezultatit në zgjedhjet parlamentare të 15 Korrikut dhe marrëveshjes së nënshkruar sot për qeverinë e re, shqiptarët në Maqedoninë e Veriut, dëshmojnë qartë vullnetin për të çuar përpara agjendën demokratizuese dhe europianizuese.

Shqiptarët në Maqedoninë e Veriut kanë qenë në ballë të proceseve tona kombëtare. Kontributi i tyre për ndërtimin e një shoqërie europiane është i pazëvendësueshëm. Një përfaqësim sa më dinjitoz në parlament dhe marrja e përgjegjësive në të gjitha nivelet e qeverisjes, është garanci për përmbushjen e të gjitha pikave të Deklaratës së Përbashkët të Partive Politike Shqiptare, të 7 Janarit 2017. Pika, që do të siguronin barazinë e plotë ndërmjet dy komuniteteve shtetformuese, duke konsoliduar në të njëjtën kohë arritjet e deritanishme që kanë lidhje me përdorimin e simboleve kombëtare dhe përfaqësimin e drejtimin e institucioneve kryesore të shtetit.

Suksese për këtë arritje të merituar!.

 

/abcnews.al