Policia e Elbasanit ka arrestuar një person të gjashtë në kuadër të operacionit “Domosdova” për goditjen e veprimtarisë kriminale në fushën e narkotikëve, finalizuar një muaj më parë.
Si rezultat i hetimeve, është bërë kapja dhe ndalimi i shtetasit R. M., 30 vjeç, banues në fshatin Salce, Kuçovë, bashkautor në këtë veprimtari kriminale
Gjatë këtij operacioni deri më tani janë arrestuar 5 shtetas dhe u sekuestruan 28.5 kg kanabis, ndërsa operacioni ka vijuar me hetime të thelluara.
Njoftimi:
Elbasan
Vijon operacioni “Domosdova”.
Shkon në 6 numri i të arrestuarve.
Kapet dhe vihet në pranga dhe 1 shtetas tjetër i implikuar.
Në vijim të operacionit policor të koduar “Domosdova”, për goditjen e veprimtarisë kriminale në fushën e narkotikëve, finalizuar një muaj më parë nga DVP Elbasan, si rezultat i të cilit u vunë në pranga 5 shtetas dhe u sekuestruan 28.5 kg kanabis, operacioni ka vijuar me hetime të thelluara, nën drejtimin e Prokurorisë së Rrethit Gjyqësor Elbasan, për identifikimin dhe kapjen e personave të tjerë të implikuar në këtë veprimtari kriminale.
Si rezultat i hetimeve, nga specialistët për Hetimin e Narkotikëve në DVP Elbasan, në bashkëpunim me DVP Berat, pas një pune të mirorganizuar, u bë kapja dhe ndalimi i shtetasit R. M., 30 vjeç, banues në fshatin Salce, Kuçovë, bashkautor në këtë veprimtari kriminale.
Materialet hetimore do t’i kalojnë Prokurorisë pranë Gjykatës së Shkallës Parë Elbasan, për veprimet e mëtejshme./abcnews.al
