E ardhmja e Gonzalo Higuain me Juventusin, mbetet në dyshim. Sulmuesi argjentinas ka një kontratë me bardhezinjtë italianë deri në verën e vitit të ardhshëm, por shumë është përfolur për një largim në fund të këtij sezoni.
Babai i tij, Jorge Higuian ka folur rreth situatës së 32-vjeçarit për TNT Sports, duke mohuar, për momentin, rikthimin te River Plate, teksa nuk përmbahet ndaj atyre që kritikojnë pafund në rrjetet sociale dhe vetëm krijojnë negativitet.
“Gonzalo ka ende një vit kontratë me Juventusin dhe dëshiron të respektojë atë. Nuk dua të flas për mundësinë e transferimit te River Plate tani, sepse është thjesht një fantazi. Merkato evropiane ndryshon nga ajo në Argjentinë, djali im nuk mund të kthehet në këto momente në shtëpi.
Ka lojtarë që janë shumë të kritikuar, por mendoj se fajin e kanë disa njerëz që janë budallenj. E kalojnë gjithë ditën duke sulmuar dhe krijuar meme. Nuk dihet se kush janë, ata që e bëjnë në rrjetet sociale janë frikacakë dhe qesharakë, janë njerëz të varfër që humbasin kohën kot”, deklaron Jorge Higuain. /abcnews.al
