Mauro Icardi nuk do të qëndrojë te PSG. Klubi francez ishte gati ta paguante shumën prej 70 milion eurosh, që ishte si klauzolë në kontratë. Gjithsesi dëshira e lojtarit vendoste dhe argjentinasi kërkon një tjetër aventurë. Tek Interi nuk e dinë ende se çfarë do të bëjnë me të, por janë të hapur për ta shitur.
Elio Letterio Pino, konsulenti ligjor i sulmuesit dhe partneres së tij, Wanda Nara, ka folur së fundmi për mundësinë e kalimit të Icardi te Napoli dhe ai është shprehur për “Radio marte” kështu: “Aurelio De Laurentiis nuk duhet të ndjejë keqardhje, pasi gjithmonë është përpjekur të nënshkruajë me Mauro Icardi”
“Për një arsye apo tjetër, Mauro nuk donte të qëndronte në Itali sezonin e shkuar, kështu që presidenti thjesht zgjodhi kohën e gabuar. Nëse kërkoni një sulmues që shënon gola, atëherë Mauro është gjithmonë një opsion”, shton Pino, i cili në fund thekson se Napoli mund të ishte zgjedhja e duhur për sulmuesin.
“Natyrisht Wanda Nara është agjentja dhe kujdeset për interesat e tij. E njoh Mauron mirë, ai është si një djalë për mua. Ideja e kalimit te Napoli i ka pëlqyer gjithmonë. Ka pasur një polemikë në të shkuarën me Maradonën, por ai e di historinë e klubit dhe Napoli është qyteti i idhullit të tij, idhullit të të gjithë argjentinasve.
Ndoshta Napoli do të ishte klubi ideal për ta ‘ndezur’ atë, kështu që nuk ka absolutisht asgjë kundër këtij klubi”, ka përfunduar Elio Letterio Pino. Icardi është nën kontratë me Interin, që duhet të vendosë përfundimisht nëse do e rikthejë në skuadër, apo do të presë ofertën e duhur për ta shitur. Sigurisht që shumë klube të mëdha do ishin të interesuara për ta afruar sulmuesin. /abcnews.al
