TELEVIZIONI I NJOHUR DAZN, REPORTAZH PER KUMBULLEN. MBROJTESI I KOMBETARES CILESOHET SI ZBULIMI I SEZONIT
Po hedh hapat e parë në karrierë, edhe pse duket i madh që tani. Marash Kumbulla, ylli më i ri i kombëtares shqiptare, ka tërhequr vëmendjen në Europë dhe një reportazh, ia kushton edhe platforma e njohur që transmeton ndeshjet e futbollit me pagesë, DAZN.
Mbrojtësi 20-vjeçar i Veronës, vlerësohet si Chiellini i ri i futbollit italian dhe jo më kot, shërbimet e tij janë duke i menduar klube nga më të rëndësishmit në Europë.
Komentet janë që shqiptari është shfaqur si protagonisti i ri i mbrojtjes, duke qenë i aftë jo vetëm për rolin e tij në prapavijë, por edhe duke ndihmuar sulmin.
Interi është më i interesuari për të dhe trajneri Antonio Conte, është gati të paguajë klauzolën e kërkuar nga Verona, për të mos krijuar më shumë konkurrencë sesa është shfaqur deri tani.
Edhe Lazio, po në Serinë A, mendon për 20-vjeçarin, ndërsa besohet se Reali i Madridit dhe Pep Guardiola i Manchester Ciyt e kanë një mendim për shqiptarin.
Në Itali janë edhe Napoli e Fiorentina, ndërsa në Angli besohet se Çhelsea nuk do të hezitonte të jepte 23 milion euro për kartonin e tij.
Kumbulla ka luajtur 19 ndeshje këtë sezon për Veronën, duke qenë në fushë për afërsisht 1 600 minuta, duke shënuar gol, fituar penallti, e duke ndihmuar skuadrën që të mbajë portën të paprekur në 7 ndeshje./abcnews.al