Kryetari i Partisë Demokratike Lulzim Basha tha se kryeministri Edi Rama po gënjen shqiptarët për vendet e punës. Për kreun e demokratëve heqja e ndihmës ekonomike nga shumë familje është vepër kriminale.
Ka vendosur t’ia thotë me zë e figurë kryeministrit Edi Rama se po i gënjen shqiptarët nga Berati.
“E para, nuk ka vende pune. Ekonomia është në krizë, politika e taksave të larta, fryma armiqësore ndaj biznesit, TVSH-ja që tani pritet t’i vihet mbi shpinë sipërmarrjes së vogël, po shkatërrojnë vendet e punës.
Nuk ka vende pune në Berat ku ndodhet sot Edi Rama. Nuk ka vende pune në asnjë rreth, në asnjë qytet të Shqipërisë. Përkundrazi, vendet e punës po mbyllen.
E dyta, pasi ka shëtitur dhe ka bërë ekskursion në çdo cep të Beratit nuk ka gjetur kohë të shkojë në një familje të cilës i është prerë ndihma ekomomike, t’i shohë në sy dhe të kuptojë se ndihma ekonomike iu është hequr në mënyrë abuzive, pa asnjë shpjegim“.
Kryetari i Partisë Demokratike Lulzim Basha i kujton kreut të qeverisë deklaratat që ka bërë para elektoratit.
“E mbani mend para 5 vitesh dhe prapë para 1 viti si tha: “Më punësoni që t’ju punësoj. E pra, qytetarë të Beratit dhe të gjithë Shqipërisë keni punësuar një parazit dhe një hajdut.
Mos e lejoni t’ju kërcënoj me bukën e fëmijëve tuaj!
Përjashtimi nga skema e ndihmës ekonomike të shumë familjeve në Berat e në të gjithë Shqipërinë është vepër kriminale për kryetarin demokrat. Përllogaritjet e tij tregojnë seme shpenzimet e kësaj fundjave të kabinetit të kryeministrit do të mund të ishin paguar ata që kanë vërtetë nevojë për 5 mijë lekëshin e ndihmës ekonomike.
“Në vend që këto familje të kenë 50 mijë lekëshin dhe të blejnë dy thasët e miellit për një muaj, ato lihen në mëshirën e fatit për bukën e gojës që Edi Rama dhe banda e tij qeveritare të hazdisen në luks, në gostira dhe në ekskursion në Qarkun e Beratit”.
Zgjidhjen Lulzim Basha e sheh në largimin e kryeministrit Edi Rama
“Merreni fatin tuaj në dorë, mos e lejoni të vazhdojë më kjo farsë e shëmtuar !
Ne nuk do t’i ndahemi asnjë sekondë kësaj emergjence kombëtare.
Një politikan abuziv, një parazit, një hajdut i cili nuk meriton gjë tjetër, veçse kryengritje qytetare dhe largimin e tij sa më parë nga përgjegjësitë të cilat nuk i kryen, duke dhunuar ditë për ditë fatin e qytetarëve”.
/abcnews.al
