Flamurtari u rikthye te humbja pas fitores në Gjirokastër dhe dështoi përballë Laçit. Trajneri i kuqezinjve, Marcelo Troisi foli për ndeshjen, gabimet e skuadrës së tij dhe disfatën 1-3 në emisionin “Gol pas Goli” në Supersport.
“Realisht ishte një moment i vështirë, e nisëm ndeshjen shumë keq. Bëmë lëvizje fëminore mbrapa. Gjatë javës punoj mjaftueshëm për pjesën mbrojtëse, por nuk kam shumë alternativa. Ka shumë lojtarë që mungojnë në stërvitje dhe shumë dëmtime. E di që ishte shumë e vështirë, bëmë një paraqitje të keqe në fillim të ndeshjes. Është gjithmonë e njëjta pasqyrë, pësojmë gola prej gabimeve tona.
Pas 0-2 pësuam gol dhe nuk ditëm të administronim avantazhin numerik dhe pësuam golin e tretë prej fajit tonë. Tifozët? Është disi e ndërlikuar, ndikon edhe fakti që ekipi ndodhet në vendin e fundit, prandaj nuk afrohen tifozët.
Do bëjmë të pamundurën të grumbullojmë maksimumin e pikëve. Me siguri e kemi si synim të kalojmë Luftëtarin në renditje. Është shpejt të flas për vitin e ardhshëm. Është e vështirë, por kemi shanse matematikore dhe do të vazhdojmë të luftojmë, edhe pse është shumë e vështirë”, deklaron trajneri brazilian. /abcnews.al
