Loading ...
Presidenti amerikan Donald Trump ka nënshkruar një urdhër ekzekutiv për shpalljen e Zyrës Ovale të Shtëpisë së Bardhë monument kombëtar, duke deklaruar se synon të pengojë presidentët e ardhshëm të ndërmarrin ndryshime të mëdha në strukturën dhe arkitekturën e saj. Gjatë një deklarate për gazetarët të enjten, Trump tha se Zyra Ovale është një simbol i Shteteve të Bashkuara dhe se nuk duhet të lejohet që ajo të shkatërrohet apo të rindërtohet sipas dëshirës së presidentëve të ardhshëm.
“Po e shpallim monument kombëtar dhe askush nuk do të lejohet ta prekë, ta shkatërrojë apo ta shembë, për ta ndërtuar në një formë paksa të ndryshme”, deklaroi Trump. Megjithatë, urdhri ekzekutiv nuk ua heq presidentëve të ardhshëm të drejtën për të ndryshuar arredimin e zyrës.
Dokumenti sqaron se presidenti ruan autoritetin për të ndryshuar dekorin, për të zgjedhur mobiliet dhe për të kryer ndërhyrje të zakonshme në funksionimin dhe sigurinë e ambientit, për sa kohë që këto ndryshime nuk dëmtojnë ndjeshëm strukturën historike apo karakterin arkitekturor të tij. Presidentët amerikanë kanë aktualisht kompetenca për të kryer disa ndryshime në Shtëpinë e Bardhë, ndërsa projektet e mëdha kërkojnë miratimin e Kongresit. Presidenti amerikan tha se urdhri synon ta bëjë të pamundur që dikush në të ardhmen të shkatërrojë këtë hapësirë, të cilën e cilësoi si të jashtëzakonshme.
Megjithatë, mbetet e paqartë nëse ky vendim mund të anulohet nga një president i ardhshëm ose të rrëzohet përmes një procesi gjyqësor. Shumica e urdhrave ekzekutivë mund të shfuqizohen nga administratat pasardhëse.
Territori i Shtëpisë së Bardhë është tashmë i përfshirë në listën e monumenteve historike kombëtare, një status që synon të mbrojë rëndësinë historike të ndërtesës dhe të parandalojë ndryshimet e pakontrolluara.
Në urdhrin e ri, Trump kërkon që Shërbimi i Parqeve Kombëtare të kujdeset për Zyrën Ovale në mënyrë që të ruhet karakteri i saj historik, integriteti arkitekturor dhe lidhja e saj me presidencën amerikane. Dokumenti argumenton se, pavarësisht mbrojtjeve ekzistuese për Shtëpinë e Bardhë, Zyra Ovale meriton një status të veçantë për shkak të rëndësisë së saj historike për vendin.
