Loading ...
Presidenti i SHBA-së, Donald Trump, u shfaq në një qëndrim çuditërisht pajtues pas humbjes së thellë të republikanëve, raporton BBC, duke deklaruar se demokratët “bënë një punë të mirë” dhe se ishte i gatshëm të bashkëpunonte me ta.
Megjithatë, mbetet e paqartë nëse ai do ta bëjë realisht këtë.
Trump nuk pritet të jetë i gatshëm të bashkëpunojë për asnjë projektligj të propozuar nga demokratët. Përkundrazi, ai ka sinjalizuar tashmë synimin për t’u bërë “zoti veto”, duke mos firmosur asnjë nismë që do të mbërrijë në tryezën e tij.
Gjithashtu, ai synon të përdorë “kompetencat e jashtëzakonshme” të presidencës për të anashkaluar Kongresin sa herë që të jetë e mundur, duke u mbështetur te urdhrat ekzekutivë dhe një vendim i Gjykatës së Lartë, i marrë në fillim të këtij viti, që i mundëson të ushtrojë kompetenca të gjera mbi agjencitë federale, pavarësisht se cila parti kontrollon Kongresin.
Në fund, Trump thotë se mund të përdorë të drejtën e vetos dhe kompetencat ekzekutive për t’i detyruar demokratët të ulen në tryezën e negociatave dhe të pranojnë kushte më të favorshme për të.
Megjithëse ruan kompetenca të mëdha në politikën e jashtme dhe në nxjerrjen e urdhrave ekzekutivë, pushteti i tij do të ketë kufizime. Ai nuk do të mund të miratojë ulje të reja taksash apo të shkurtojë shpenzimet për programet e mbrojtjes sociale pa miratimin e demokratëve.
Gjithashtu, nuk do të mund t’i shmanget mbikëqyrjes së Kongresit. Trump nuk do të ketë mundësi t’i ndalojë demokratët të nisin një valë hetimesh të reja ndaj tij dhe zyrtarëve të lartë të administratës së tij, një plan që demokratët e kanë paralajmëruar tashmë.
