Loading ...
Ndërsa hakerët po shënjestrojnë sistemet e ftohjes në supermarkete në vende të ndryshme të Evropës, një hulumtim i ri ka zbuluar se rreth 13 mijë sisteme të kontrollit të frigoriferëve dhe ngrirësve janë të qasshme drejtpërdrejt përmes internetit, në 99 shtete dhe territore.
Këto pajisje përdoren jo vetëm në supermarkete, por edhe në spitale, ferma dhe objekte të përpunimit të ushqimit, ndërsa shumë prej tyre funksionojnë me programe të vjetruara.
Një sulm kibernetik ka goditur sistemet e ftohjes në dhjetëra supermarkete në Belgjikë, duke i detyruar dyqanet të hedhin ushqime me vlerë rreth 100 mijë euro.
Nga sulmi janë prekur rreth 40 supermarkete të rrjetit Delhaize, të paktën 15 dyqane Carrefour, pesë pika të Spar dhe kompania e mishit De Laet en Van Haver. Mediat belge raportuan se temperaturat në frigoriferë janë rritur deri në 70 gradë Celsius.
Një zëdhënës i Delhaize i tha Euronews se kompania kishte “identifikuar një incident të teknologjisë së informacionit që preku sistemet e ftohjes në disa dhjetëra dyqane”.
Probleme janë raportuar edhe në disa dyqane të rrjetit suedez ICA. Ky sulm vjen pas një incidenti të ngjashëm më 12 tetor, kur sistemet e ftohjes në qindra supermarkete franceze u manipuluan nga sulmuesit.
Por, si është e mundur që dikush të marrë kontrollin e një frigoriferi apo ngrirësi në supermarket pa qenë fizikisht brenda dyqanit?
Pse frigoriferët janë të lidhur me internetin?
Sistemet e mëdha të ftohjes në supermarkete menaxhohen nga njësi qendrore kontrolli, të cilat rregullojnë temperaturën, ciklet e shkrirjes së akullit dhe alarmet për çdo frigorifer dhe ngrirës në objekt.
Lidhja e këtyre sistemeve me internetin është prej kohësh një mundësi e ofruar nga prodhuesit, sipas një hulumtimi të publikuar në tetor nga kompania e sigurisë kibernetike Forescout.
Kjo lidhje u mundëson kompanive të mirëmbajtjes të diagnostikojnë defektet dhe të ndryshojnë cilësimet nga distanca, pa pasur nevojë të dërgojnë teknikë në secilin dyqan.
