Loading ...Me fundin e verës, organizmi ka nevojë për një kujdes të veçantë dhe zgjedhjet që bëjmë në tryezë mund të ndikojnë në shëndetin tonë gjatë muajve të ftohtë. Boronicat, frutat e pyllit dhe arrat janë ndër ushqimet që meritojnë një vend të rëndësishëm në regjimin e përditshëm, falë fibrave, vitaminave dhe përbërësve antioksidues që përmbajnë.
Nutricionistja Shkëlqime Sula Mehmeti sjell këshilla për mënyrën se si mund ta përgatisim organizmin për dimrin, duke nisur nga ushqimet e thjeshta dhe të freskëta. Boronicat përmbajnë antocianina, përbërës antioksidues që janë studiuar për ndikimin e tyre në shëndetin e zemrës dhe në metabolizmin e glukozës. Megjithatë, ato nuk janë një kurë për diabetin dhe nuk zëvendësojnë trajtimin mjekësor.
Edhe arrat kanë përfitime të rëndësishme: ato janë burim i yndyrave të pangopura, përfshirë acidin yndyror omega-3 me origjinë bimore, si dhe të fibrave e polifenoleve. Konsumimi i tyre në sasi të moderuara mund të jetë pjesë e një diete që mbështet shëndetin kardiovaskular.
Por përtej boronicave dhe arrave, një rol të rëndësishëm luan edhe mënyra se si ushqehemi. Me rikthimin në rutinën e përditshme, stresi dhe lodhja mund të na drejtojnë drejt brumërave, ushqimeve të shpejta dhe produkteve të pasura me sheqer.
Këshilla e nutricionistes është të zgjedhim më shpesh fruta e perime të freskëta, tërshërë, vezë, kos natyral dhe gatime të përgatitura në shtëpi. Fibrat ndihmojnë funksionimin e zorrëve dhe ushqejnë mikrobiotën intestinale, e cila luan rol edhe në funksionimin e sistemit imunitar.
Hidratimi mbetet po aq i rëndësishëm. Uji me limon, kastravec, nenexhik apo xhenxhefil mund të jetë një alternativë freskuese, pa pasur nevojë për sheqer të shtuar.
Një tjetër këshillë lidhet me produktet e paketuara: etiketa me fjalën “dietike” apo ambalazhi jeshil nuk garantojnë se një ushqim është i shëndetshëm. Leximi i përbërësve dhe kontrolli i sheqernave të shtuara janë hapa të rëndësishëm për zgjedhje më të informuara.
Si t’i ruajmë boronicat për muajt e ftohtë? Sa arra duhet të konsumojmë dhe cilat ushqime ia vlen të kemi çdo ditë në tryezë? Shkëlqime Sula Mehmeti ndan këshillat për një fund vere me më shumë kujdes për shëndetin dhe një mënyrë ushqyerjeje që na shoqëron edhe gjatë dimrit./abcnews.al
