Loading ...
Rusia nuk ka forcat e nevojshme për të nisur sulm të madh ndaj NATO-s ndërsa ushtria e saj mbetet e angazhuar në Ukrainë, tha sot ministri i Jashtëm polak, Radoslaw Sikorski.
Duke folur për transmetuesin publik TVP Info, Sikorski elaboroi paralajmërimin e tij të javës së kaluar se Varshava kishte informacione nga burime të shumta që tregonin se “Rusia po përgatit diçka të madhe këtë vit”.
I pyetur se çfarë forme mund të merrnin planet e Moskës, ai tha: “Sigurisht, vetëm Putini e di këtë, por ne duhet të jemi të gatshëm. Nuk duhet të lejojmë të manipulohemi. Duhet të jemi vigjilentë, në mënyrë që si aleancë të mund të reagojmë menjëherë ndaj çdo provokimi”.
“Rusia nuk ka forcat për sulm të madh ndaj NATO-s. Të gjitha forcat e saj janë të angazhuara në Ukrainë”, tha ai.
Sikorski sugjeroi se Moska mund të tentojë “diçka në një shkallë më të vogël që mund të shkaktojë polemika mes aleatëve”. Një incident që do të përçante anëtarët evropianë dhe amerikanë lidhur me atë nëse zbatohet neni 5 i NATO-s për mbrojtjen e ndërsjellë do t’i përshtatej Kremlinit, tha ai.
“Rusia mund të bëjë në mënyrë më agresive atë që tashmë po bën”, shtoi Sikorski.
Qeveritë perëndimore e kanë akuzuar Moskën për kryerjen e akteve të sabotimit dhe shkeljeve të hapësirës ajrore, si pjesë e një fushate të luftës hibride kundër vendeve të NATO-s dhe BE-së.
