Loading ...
Qeveria gjermane ka vendosur të ulë taksën e energjisë për benzinën dhe naftën, ndërsa po përgatit edhe një mekanizëm për vendosjen e një tavani të përkohshëm për çmimet e karburanteve.
Paketa e masave, e ndërmarrë në përgjigje të pasigurisë së krijuar nga kriza energjetike dhe zhvillimet në Lindjen e Mesme, pritet t’u kushtojë buxheteve publike rreth 2.5 miliardë euro.
Nga 1 tetori deri në fund të vitit, taksa e energjisë për benzinën dhe naftën do të ulet me 14 cent për litër. Duke përfshirë edhe TVSH-në, ulja totale e kostos për konsumatorët pritet të jetë rreth 17 cent për litër.
Sipas qeverisë gjermane, rreth 1.25 miliardë euro të paketës do të lidhen me efektin e TVSH-së. Berlini argumenton se një ulje e mëparshme e taksës, e aplikuar në maj dhe qershor, u reflektua pothuajse tërësisht te konsumatorët.
Kancelari Friedrich Merz deklaroi se qeveria po vepron me shpejtësi për të lehtësuar barrën mbi qytetarët dhe bizneset.
“Kushdo që mbështetet në makinën e tij çdo ditë tani po arrin kufijtë e tij. Ne po veprojmë shpejt dhe kemi një plan të qartë për vitin 2027”, tha Merz.
Në një fazë të dytë, qeveria planifikon të nisë negociatat me industrinë e naftës për vendosjen e një tavani të përkohshëm të çmimeve të karburanteve, që synohet të jetë në fuqi deri më 1 janar 2027.
Sipas Berlinit, mekanizmi synon të garantojë sigurinë e furnizimit dhe të parandalojë rritjet e pajustifikuara të çmimeve. Për këtë masë po shqyrtohen edhe praktikat e aplikuara në vende të tjera evropiane, përfshirë Belgjikën dhe Luksemburgun.
Qeveria gjermane ka bërë të ditur gjithashtu se do të vijojë monitorimin e çmimeve dhe ndikimit të krizës energjetike te qytetarët dhe bizneset.
Në kuadër të masave të mëtejshme, Berlini planifikon edhe krijimin e një mekanizmi për pagesa direkte të lidhura me të ardhurat, me synimin që ndihma të shkojë te kategoritë më të prekura nga rritja e kostove.
/abcnews.al/
